Galatia 1 - NTSHOB NSI

Tsha'te

¹ Me Paulo, ngantum, ke b'a num ze tu benntùn ke njam mènntùn no, là njam Yésu Kristô mba Nsi tà, z'a na' mbam i num vù là

² mba njoṅ fètfèt fa tse bag à bo be là, kite yen ṅwa'ni li à ntse'te benkristô Galatia.

³ Kondèn be bin mba fite z'a fe Nsi, Tshùaben Yésu Kristô,

⁴ z'a na' mfà wul i num nukebwô be ndù a kwé be yen njù nukebwô li, ndaṅndaṅ mb'a be ntùm ze nekô Nsi, Tà be là;

⁵ ghamte be yi ngu'ngu'. Amén.

Nkùn mebwô b'a ntshù'

⁶ Me tshàm mba bo sô zin ndende njam mèn z'a na' ntsiaṅ zin ntùm kondèn Kristô, bin bam mo' nkùn mebwô là.

⁷ A ke b'a ndù mo' nkùn mebwô num bwe, là, tsemo' ben num bwe, tse bo tshwèt ntshu' tu zine, nke nkô nekaṅ taṅ nkùn mebwô Kristô là.

⁸ Là, a be ze kua' tu wut tshage, ke Angél mfe kamànyam no, tshob mo' nkùn mebwô bin, ke b'a ze bag na' ntshob bin nà, ndon tsho tu i.

⁹ Bag lo à tshobe, me bèn ntshob mo' yoṅ i ndonni ndù: A be ze mèn tshob mo' nkùn mebwô bin, ke b'a ze bin na' nkwé là, ndon tsho tu i.

¹⁰ Ndonni me b'a num nu benntùn ké, ke num nu Nsi à? Me ke ndiag à nebwô benntùn ké? Me lo nke nke' mbwô benntùn, mba me ke' be nkuan Kristô.

Mba Nsi tsiaṅ Paulo là

¹¹ Fèt tshàm, me tshob bin ndù nkùn mebwô ze me na' ntshob bin nà, ke' b'a ze mènntùn.

¹² Nummbe me lo ke kwé i, ke bèn nzi't'é à mènntùn, là Yésu Kristô bèn ntswit'é me.

¹³ Bin lo ke nju' mba ke njôg yen ngelaṅ nà ntùm nu ba Yuda là, me lo tsho' nku ntse'te ben Nsi kebàn neshu, mbèn nke mbagte yube;

¹⁴ me lo nèn mbwe ntùm nu ba Yuda ntshùa ghuan tshàm yàm ntùm nzwit yag, nke nkô nu ba tà tshàm na' ntshob là ntshùate.

¹⁵ Mèn z'a na' ntsho' àm tà fe bam màa, ntsiaṅ àm ntùm kondèn i là, lo yen ndù a bwô,

¹⁶ nela'te Mén i me, ndù me tshob i netèt ghakelèn Nsi; yen ngelaṅ nà, me nèn Arabia be ndùse, ke kwé ntag mbàb mba lem,

¹⁷ ke nèn Yérusalém neyen ben tse bo bwôg be ghantum me là. Me bèn mbèn njam Damas.

¹⁸ A be tshùa ngu'njù tat, me nèn Yérusalém neyen Kéfa, ntswe bag yi lé'njù ntshob tàn gham.

¹⁹ Là me ke yen mèn netèt ghantum, k'a ke nda' Yakobo, mfèt Tshùaben.

²⁰ Ju ze me tshwèt nkite bin nà, tshù, a b'a mbwe Nsi, me ke netatte.

²¹ Me lo bèn nèn ntùm ngô Siria mba Kilikia.

²² Ntse'te benkristô ts'a be Yudéa là lo ke lèn àm se se,

²³ nda' ndù bo lo ke nju' ndù: Mèn z'a na' nke ntsho' nku ben nebàn nà, tshwèt ntshob nu bamntù z'a na' nke mbagt'é là;

²⁴ bo lo ke ngamte Nsi num àm.