Filipi 3 - NTSHOB NSI

¹ Fèt tshàm, ndonni bin tsiaṅte num Tshùaben. Me ke' be lô nekite be tshu ntshù' bin, nummbe a' tomte zine.

Ghatswite tse tatte

² Bin zete num ba mbù, bin zete num ghafa' kebwô, bin zete num nesi ket tuswe!

³ Nummbe bag à bin bèn mbe nesi ket ze nenùne, be tse be num mfa' ntùm Ywèt Nsi là, be tse be num nta' nsoṅ num Kristô Yésu, be tse be ke' be nywinte num mbàb wut là.

Paulo ghua' nunetsin ntshù' num Kristô

⁴ Mba me ku'ni nenywinte yàm num mbàb wut. A be ze mo' mèn kwate ndù a ku'ni nenywinte num mbàb wut là, mba me ku'ni ntshùate.

⁵ Me lo si ket num mbatte lé'njù fome, me b'a nzwit Israél, ntùm tunndà Benjamin, ze Héber, mbe ze Férésia num ntshù',

⁶ mbe ngatsho' nku ntse'te benkristô kebàn num nkôni ntshù', mbe ke lo' num nunetsin z'a ntùm ntshù' là.

⁷ Là tshu ts'a na' mbe bin me là, me lo' yub mba bi là num Kristô.

⁸ Kua' nenùne, me lo' njoṅ i fa mba bi là num nelèn Kristô Yésu Tshùaben àm z'a tshùate là; me lo bi njoṅ i fa num i, me num ndo' njoṅ i fa mba ju neghua' là, ndù me ghù Kristô;

⁹ mbe num i, nkwé nunetsine, ke b'a yàm nunetsin z'a fe à ntshù' là, là nunetsin z'a fe à bamntù Kristô là, nunetsin z'a fe à Nsi, ze bamntù be mfà là;

¹⁰ ndù me lèn i mba neta ze nelo num vù, mba ndù me tamte ntùm nge' tse, ngù mfuni vù se num àm,

¹¹ ndùlala ndù a be z'a ku'ni là, me tsho ntùm nelo num vù fe ben.

¹² Ke b'a ndù m'a tshùbe, ke b'a ndù m'a miagte nezine, là me ke nànt'a ndù me tshùbe, mba Yésu Kristô na' ntshùb tu wul àm nà.

¹³ Fèt tshàm me ke' kwate ndù mba tu wul àm tshùb, là me lèn nda' ju ntshù', me lagte ju z'a tôg là, nke ma' zin nèn mbwe,

¹⁴ me tshwèt nànte nèn dù' ze me nèn nà, ndù me kwé ntsho'ngu' mfe tù, ntsho'ngu' netsiaṅ Nsi num Kristô Yésu.

¹⁵ Njoṅ be fa tse be ku' là, be kwate yen nà; a be ze bin ghù nkwate ghua num mo' dù' nu là, mba Nsi a' la'te mba yen nà bin.

¹⁶ Mba ndùlala bag à bin tshùb wut be dù' ze be zin nkum nà, ntamte nzine.

¹⁷ Fèt tshàm, bin tù' ghafi't'àm; là bin ke nzete num ben tse bo num nzin ndaṅndaṅ mba bin na' njen mfi' num bag là.

¹⁸ Nummbe ben yàm tshwèt nzine, tse me na' ntshob bin ngelaṅ yàm nà, là ndonni me tshwèt ntshob bin à ntùm ntsenyà ndù bo b'a ghakeban fanta'tù Kristô;

¹⁹ yub miagt'é b'a nebi, yub Nsi b'a bam sobe, ghamte yub be ntùm ju tuswe yube, bo ke nkwat'a tshu nsitsha'a.

²⁰ Là mba be là, la' be b'a mfe kamànyam dù' ze bag à bin tshwèt mbéb ngayôg be, Tshùaben Yésu Kristô,

²¹ z'a nsi kaṅ wut nge' be, a tù' wut nkuni mi, num neta z'a ku'ni neghù a tô njoṅ tshu fa là.