Filipi 2 - NTSHOB NSI

Nefà wut nsi

¹ Ndùlala, a be ze nefitentù be num Kristô, a be ze netsho'te lèt be ntùm nkôni, a be ze netamte be ntùm Ywèle, a be ze ntù kondèn be là,

² bin zwiagte tsiaṅt'àm, yen nà b'a ndù bin kwate ju ntshù': Bin ghù nkôni ntshù', mbe ntù ntshù', bin ghù ta' nkwate ntshù'.

³ Kà bin ghù sàm ju ntùm ntsha ke njam ghamte banban no, là ntùm nefà wut nsi, mba we lo netèt bin ke ndo' mo' mèn mb'a tshùa i là,

⁴ kà mba we lo ke ndôte be nda' tse tshu, là mba we lo lôte tshu tsemo' fètfèle.

⁵ Bin ghù men nkwate là netèt bin, nkwate mi bin ghù num Kristô Yésu là.

⁶ Yi z'a be ndaṅndaṅ mba Nsi là, a lo ke tshùb yen dù' ndaṅndaṅ nà mbwe Nsi ntùm ghe'te,

⁷ là, a lo tshwètte ntù' ndaṅndaṅ mba nkuan nà, nse' ntùm mfuni benntùn ntùm ntshù mi, bo yen i mba mènntùn nà.

⁸ A lo fà wul i nsi, ntù' nju'ntshu tà nkum num vù, tà nkum num vù fanta'tù.

⁹ A ndùlala, Nsi lo bù't'é tù, mfà lén s'a tshùa njoṅ ndèn fa là yi ntùm kondèn,

¹⁰ ndùlala ndù njoṅ ntunkekwi' fa mfe kamànyam, num nsitsha' mba mànjam nsi kwimte nsi num lén Yésu,

¹¹ mba ndù njoṅ ndém fa tshob ndaṅndaṅ ndù Yésu Kristô b'a Tshùaben, num nkuni Nsi Tà.

¹² Ndùlala, fètfèt tse nkôni, bin ke nju' ntshu be ndaṅndaṅ, ke b'a nda' ngelaṅ me be netèt bin nà; là bin ghù ntshùate ngelaṅ me be ngùanesà là, bin fa' num ko' yôg sin ntùm bwôg mba nevètte.

¹³ Nummbe Nsi b'a mèn z'a num mfà nekô mba neghù netèt bin mb'a bwô i là.

¹⁴ Bin ghù njoṅ i fa ke tshobte tun ntô, ke ta ntshu,

¹⁵ ndùlala ndù bin be ke lo', mbe nelàne, ntù' bon Nsi tse lo' ke num bo là netèt zwiaṅ ben kebwô mba ben neṅu'te, tse bin num nké' netèt bo mba nka' ntùm njù,

¹⁶ nke nket ntshob yôg ndù bin be nta'nsoṅ me mum lé'njù Kristô là, nummbe me lo ke kù nde à banban, ke bèn ngùtni wul àm à banban.

¹⁷ Là, a be ze me b'a mba ju ze bo fètte num jule'te Nsi mba fa' bamntù zin nà, mba me tshwèt ntsiaṅte; me tshwèt ntsiaṅte bag à njoṅ zin fa.

¹⁸ Mba bin zin tsiaṅte be ndaṅndaṅ, bin tsiaṅte bag à bin.

Netum Timôtio mba Epafrôditô

¹⁹ Me tshwèt nywinte num Tshùaben Yésu netum Timôtio bin ndende, ndù mba yàm ntù tswe'te, ngelaṅ me nsi lèn zin tshô là.

²⁰ Nummbe me ke' ghù sàm mèn z'a ghù nkwate num bin mba yi, nke nywin kua' nenùn num zin tshô là.

²¹ Nummbe njoṅ yub fa ke ndiag à ko' tshob tshu, ke b'a tse Kristô.

²² Là, mba yi là, bin lèn bamntù i ze nenùne, bag yi lo fa' nkùn mebwô mba tà bo mén nà.

²³ Me tshwèt nywinte netum i bin ngelaṅ me nsi to' neyen ntun yàm ntsha là.

²⁴ Là me tshwèt nywinte num Tshùaben ndù mba tu wul àm nsi se' ndende.

²⁵ Là me lo yen ndù a bwô netum Epafrôditô, mfèl àm, nshun fa' àm, nshun ntsho àm, ze bin tum i ndù a fa' me ntùm ngùtni àm nà, bin.

²⁶ Nummbe a lo kù ntù num njoṅ zin fa, nke ntswe nge' mba bin na' nju' ndù a lo ke ngon nà.

²⁷ A lo ke ngon kua' nenùne, ngon tà ngebte mbaṅ vù. Là Nsi lo ko ndèn mi, ke b'a nda' yi, là mba me yàm, ndùlala ndù kà me kwi'te ngùtni num ngùtni.

²⁸ Ndùlala, me lo nànte netum i, ndù bin yen i, mbèn ntsiaṅte, mba ndù tu wul àm tswe ke ngùtni.

²⁹ Bin lo' i num Tshùaben ntùm njoṅ tsiaṅte fa, nku'ni lèn tshen ben nà.

³⁰ Nummbe a lo ghebte mbaṅ vù num fa' Kristô, njôg ghua' yôg se, ndùlala ndù a zwiagte ju z'a tsi num fa' se bin ke mfa' me là.