Filipi 1 - NTSHOB NSI

Tsha'te

¹ Paulo mba Timôtio, ghafa' Kristô Yésu, num njoṅ ben nelàn fa num Kristô Yésu tse bo be Filipi boa ghalôte mba ghafa' là.

² Kondèn mba fite z'a fe Nsi Tà be mba Tshùaben Yésu Kristô là be bin.

³ Me num ndabte Nsi àm njoṅ ngelaṅ fa ze me kwate zin nà;

⁴ njoṅ ngelaṅ fa, ntùm njoṅ le'te Nsi tshàm fa, num njoṅ zin fa, me num nde'te Nsi ntùm tsiaṅte;

⁵ me num ndabte Nsi mba bin tamte num neywimte fa' nkùn mebwô fe mbwe lé'njù tà nse' nkum sènni là;

⁶ me yab ntù àm num yen nà: Mèn z'a to' sen fa' mebwô là num bin nà, a nsi miagt'é tà kum mum lé'njù Kristô Yésu.

⁷ Ndùlala, a b'a kua' nunetsin me ndù me kwate yen nu là num njoṅ zin fa, nummbe me num nket zin ntùm ntù àm, bin tse bag à bin zin fa tamte num kondèn, ntùm nkù tshàm, ntùm nekwénta mba ntùm netomte nkùn mebwô là.

⁸ Nummbe Nsi b'a yàm nkwénta mba me num nkù ntù num njoṅ zin fa ntùm nkù Kristô Yésu là.

⁹ A ndùlala me le'te Nsi ndù nkôni zin ke nkwi'te, nke nkwi'te nèn mbwe ntùm nelène mba ntùm njoṅ zenu fa,

¹⁰ ndù bin laṅte, ndèn tshu ts'a ywimte là, ndùlala ndù bin be ben nelàne, ke be ju fa'te mum lé'njù Kristô;

¹¹ bin dun ntàm nunetsin mi a be njam Yésu Kristô là num nkuni mba nenyàmte Nsi.

Ntàm tsha Paulo

¹² Fèt tshàm, me kô bin lèn ndù nu z'a na' ngù àm nà, ywimte ndù nkùn mebwô nèn à mbwe.

¹³ Nummbe ntùm ntshundà ngomna mba ntùm tsemo' dù' njoṅ benntùn fa lo be miagte ndèn ndù me be ntùm nkù à num nu Kristô,

¹⁴ fètfèt tse yàm tshùa njam nkù tshàm, mbam Tshùaben ntshùate, mfèn ntù netshob ntshob Nsi ke bwôg.

¹⁵ Me lèn ndù tsemo' ben ke ntshob Kristô à ntùm ghe'te mba ntùm ntsha, là tsemo' bèn nke ntshob i à ntùm nkwate mebwô.

¹⁶ Là tshen ben ni ke mfa' à ntùm nkôni, bo lèn ndù Nsi lo yab àm ndù me kwé nta nkùn mebwô.

¹⁷ Là tshen ben nà b'a ghadiag ntsha, bo ke ntshob Kristô à ndù bo kamte nge' yi num àm ntùm nkù, nkwatenu mub ke' làn,

¹⁸ mb'a be ndùlal'o? Num njoṅ i fa, ke ntùm latnta lo, ke ntùm nenùn no, bo tshob Kristô, me tshwèt ntsiaṅte num bwe, me nsi bèn tsiaṅte.

¹⁹ Nummbe a nsi tshùa num nde'te Nsi min mba ywimte Ywèt Yésu Kristô, yen nà tù' yôg me,

²⁰ ndaṅndaṅ mba me num mbébe, nke nywinte ndù me ke nsi ko tuswe num sàm ju là; fe ndùke lo mba ndonni, me num ndun fènntù ndù Kristô ghù ghamte num wul àm, ke ntùm yôg sàm, ke ntùm vù sàm no.

²¹ Nummbe, num yàm tu, neyôg b'a Kristô, nekwù be ntsho'fa'.

²² Là, a be ze neyôg ntùm mbàb wut, a be ze yen ni b'a ntàm fa' me là mba me ke' lèn ju ze me nsi tsho' là.

²³ Me b'a bu nkum mbàa, me tshwèt nkù ntù netum nèn ntèt Kristô, mbe bag yi, yen nà bwô ntshùate,

²⁴ là, a bèn njwimte ntshùate ndù me ghô ntùm mbàb wut num tu bin,

²⁵ mba me bam yen nà là, me lèn ndù me nsi tswe, mba ndù me nsi ghô mbaṅ njoṅ zin fa, ndù bin ku' nèn mbwe, mbèn ntsiaṅte ntùm bamntù,

²⁶ ndùlala ndù nta'nsoṅ min num àm dun ntshùate num Kristô Yésu, ngelaṅ me nsi bèn se' la' bin nà.

Ntag num nekagtùn

²⁷ Nda' ndù bin zin mba bonla' là, mb'a ku'ni num nkùn mebwô Kristô là. Ndùlala ndù me yene, a be ze me se' la' bin nà; nju'u, a be ze me ke' se' la' bin nà. Ndù bin tsin tù ntùm ta' Ywèt ntshù', njam bamntù nkùn mebwô, ntamte, nke nde' ntsho ntùm ntù ntshù',

²⁸ kà bin bwôg ghakeban tsin num sàm ju, mba a' tswe à mba bo ke nta à ntàn bi là num yub tu, mbèn ntswe bin à mba bin b'a num manze yôg là; nummbe yen nà ke mfe à Nsi.

²⁹ Yen nà b'a ndù Nsi lo fà kondèn bin num Kristô, ke b'a nda' ndù bin bam i, là ndù bin yen nge' num i,

³⁰ nke nde' be ntsho ntshù' ze bin na' njen me nke nde'e, ze bin ju' ndù me tshwèt nde' ndonni là.