Filémon 1 - NTSHOB NSI

Tsha'te

¹ Me Paulo, ngandàtsha Kristô Yésu, mba Timôtio mfèl àm. Yen ṅwa'ni li b'a ze Filémon ze nkôni, nshun fa' yag,

² bo Apia mfèt yag, Arkipô, nshun ntsho yag, mba benkristô tse bo tse'te ndà o là.

³ Kondèn mba fite z'a fe Nsi Tà be mba Tshùaben Yésu Kristô là be bin!

Bamntù mba nkôni Filémon

⁴ Me num ndabte Nsi àm njoṅ ngelaṅ fa, ngelaṅ me tsi lén su ntùm nde'te Nsi màm nà,

⁵ nummbe me num nju' tshô nkôni o mba bamntù z'o ghù num Tshùaben Yésu mba num njoṅ ben nelàn fa là.

⁶ Me num nde'te Nsi ndù ywimte bamntù o tù' matnu wù ntùm nelèn njoṅ mfa' mebwô fa mi a bwô ndù be fa' num Kristô là.

⁷ Me ghù tsiaṅte mba fitentù yàm num nu nkôni o, nummbe mfèl àm, o lo ghù ntù ben nelàn tswe'te.

Nebu' mbu num tu Ônésimô

⁸ A ndùlala, mba mba me ku'ni num Kristô netshob ju z'o ghù là wù là,

⁹ me kô netsiaṅ o njam nkôni, me Paulo, njwèn mèn, me ze me b'a ngandàtsha Kristô Yésu ndonni là,

¹⁰ me le't'o num nu mén àm Ônésimô, ze me bwe i ntùm nkù là,

¹¹ Ônésimô z'a na' mbe ju ke ywimte wù mo' ngelaṅ nà, là, ndonni, a b'a ju ywimte wù mba me,

¹² me tum i wù, yi z'a be kua' ko' ntù àm nà.

¹³ Me lo ke nkô netshùb i mbaṅ àm, ndù a fa' me num yu tu, ntùm nkù ze me be ntùm bwe num nkùn mebwô là.

¹⁴ Là, me lo ke kô neghù sàm ju o ke lèn, ndùlala ndù kà numebwô o tù' kekônkô, là ndù a b'a mb'o kô là.

¹⁵ Mo' ndù Ônésimô na' ndo mbaṅ o mo' mén ngelaṅ à ndù o bèn ngù i yoṅ ntshù',

¹⁶ Ke bèn mb'a mba nkuan nà, là ndù a tshùa nkuan, ntù' mfèt ze nkôni, njôg mbe, mbwe àm, mbèn mbe wù ntshùate, ntùm mbàb wut mba num Tshùaben.

¹⁷ Ndùlala, a be z'o be ndo' àm mba nshunku o là, o lo' i mba tu wul àm nà.

¹⁸ A be z'a na' mfàn nu wù, a be z'a na' ngù njo o bam i là, o siaṅte yen nà num yàm tu.

¹⁹ Me Paulo bèn nkite ko' bu àm, me nsi tô yen njo là wù, là, a ke' bwô me tshob wù ndù tu wul o ghù njo àm bam o.

²⁰ Mfèl àm, ṅ, bam ndù me jù bin o num Tshùaben; tswe'te ntù àm num Kristô.

²¹ Me yi't'a num yu neju' ntshu kà nkite wù, ndèn ndù o nsi ghù tshùa mba me tshob wù là.

²² Nabte mba dù'ntswe me, nummbe me tshwèt nywinte ndù a nsi tshùa njam le'te Nsi tsin bo bèn mfà àm bin.

Tsha'te

²³ Epafra, ze bag yi be ndàtsha num Kristô Yésu là tsha't'o!

²⁴ Marko, Aristarkô, Démas, Lukas, shun fa' tshàm tsha't'o.

²⁵ Kondèn Tshùaben Yésu Kristô be boa ywèt tsine!