Ezékia 8 - NTSHOB NSI

Neghamte nsi neto Yérusalém

¹ A lo be kum ngu'njù ntôge, mum lé'njù tàn ntùm ṅwù ntôge, (mba) me tswe nsi mum ndà àm, ghakwé mbwe netèt ba Yuda tswete nsi mbwe àm, bu Tshùaben vù num àm.

² Me lo ke ndôte, njen mo' se ntùm njem ndù a fute ntshù mènntùn; neto' num zwe' i nèn nkum nsi na' mb'a mbwôge; neto' zwe' i nkum tù be mba mo' nka' ze mèn tshwèt njene, mba tùn se bo kwite là.

³ A tshag ju num àm, ndù a fute bu mènntùn, ntshùb àm nyiaṅtu tshàm. Ywèt kel àm, nèn yi tù, netèt kamànyam bo tsha'a, ndo' àm mum njem z'a fe Nsi là nèn yi Yérusalém, num nzendà ntùm bwe z'a shù nze bag tu, dù' ze neto ghe'te (lànghe') z'a be nkamte ghe'te Tshùaben be là.

⁴ Tshù, nkuni Nsi Israél lo be bwe ndaṅndaṅ mba nkuni mi me yen mà tômbo' là.

⁵ A tshob me ndù: Mén mèn; bù' miag mu ndôte nze bag tu! Me bù' miag màm ndôte nze bag tu, njen ndù yen neto ghe'te là lo be nze bag tu, mbaṅ nze netsho yi tômbwôg le'te Nsi.

⁶ A tshob me ndù: Mén mèn, o yen tshu bo tshwèt ngù à? Tunndà Israél tshwèt mfà wul i num ngùninu mi a bag ntshùate là nsen ni, num nelo' ntèn àm yi nte ngùanesà mbaṅ ndà àm ze nelàne. O nsi bèn yen memo' ngùninu mi ndùb mi a bag ntshùate là.

⁷ A lo' àm nèn yi nzendà z'a be ntsho bam ntshundà là; me lo ke ndôte, njen ndù mo' tô num num kumba'.

⁸ A tshob me ndù: Mén mèn, to kumba', me to kumba', nzendà be bwe.

⁹ A tshob me ndù: Tsho njen lèn ngùninu mi a bag ntshùate tse bo be ngù nsen ni njene!

¹⁰ Tshù, me tsho bwe, ndôte, njen bon mfumi tshu nzenze bwe: Bon nyàm nesoṅ bam sob nsi bo nyàm nefét wut, boa njoṅ neto nesagte fa, tse tunndà Israél, ndù bo lo' yub num kum ba' ndiaṅ mbume.

¹¹ Benntùn ṅam sammbàa, ghakwé mbwe netèt tunndà Israél lo tsinte mbwe ba neto. Yaazania nshum Shafan lo be netèt bo, mba we lo ghù kab labinda bu i, nzembwôg ju nelamte nke ntum bwe.

¹² A tshob me ndù: Mén mèn, o yen ju ze ghakwé mbwe netèt tunndà Israél be ngù ntùm njame, mba we lo ntùm ze to'ndà z'a dun netshaṅ neto nzenz'à? Tshù bo be ntshob ndù: Tshùaben ke tshwèt njen be, Tshùaben tum ntùm ngô.

¹³ A tshob me ndù: O nsi bèn yen tsemo' nukebwô ndùbndùb ts'a bag ntshùate, tse bo be ngù là.

¹⁴ A lo' àm nèn yi ntshundà nzendà ndà Tshùaben, nze bag tu, me yen bènnzwi bwe ndù bo tswete nsi, nke ndàn Thammuz*f**

¹⁵ Ndùlala, a tshob me ndù: Mén mèn, o yen à? O nsi bèn yen nukebwô ndùbndùb ts'a bag ntshùate, ntshùa tshen ni là.

¹⁶ A lo' àm nèn yi bam ntshundà ndà Tshùaben z'a ntùm bwe là; benntùn ntshob tàn ṅam mbàa lo be ntshundà Tshùaben, netèt mbwe to'ndà bo tômbwôg le'te Nsi, ndù bo lo' mvèn yub ntam Ndà Nsi yi, nke ndôte nze bag ntumnyam; bo kwim ntunkekwi' mub nsi nze bag ntumnyam, mbwe lagnyam.

¹⁷ A tshob me ndù: Mén mèn, o yen à? A b'a fùag nu tunndà Yuda neke ngù lèn tshen nukebwô ts'a bag ntshùate là nsen ni ké? Ndù bo nsi ghù nefètte lem lo' ngô, bo ke tsin neke nkamte yantù àm ké? Tshù bo là tse bo tshwèt nkabte ntselag yub tshaten nà.

¹⁸ Mba me yàm nsi lo' à tshùagntù ghù nu yi, lag sàm ke nsi tsho' num bo, me ke nsi tshàm ndèn, kondèn ke nsi be bwe. Me ke nsi ju' yub ndùse bo nsi kua' num ntoṅ màm neta là.