Ezékia 5 - NTSHOB NSI

Netsho'te ntsha Yérusalém, nziku'u, ngokèt, ṅwi

¹ Wù mén mèn, lo' ta' juntshùag z'a tshùag mba shua' nekom ntshu yi là; lo' i ntshùa yi num tu o bo nyiaṅ ntshu tsho. Bèn ndo' mba kilô nefi' ju yi, ngabte nyiaṅ yi.

² Ghabte nze tat, nton bag i ntshù' mbwôge, netèt ngô, ndùse lé'njù ze ntsho ton ngô nsi bumte là; lo' mbatte bag i bàa, ndo' ṅwi ntshu'te yi, nsate ndiaṅ ngô yi mbume; sate mbatte bag i tat num ntshùa fetmbaṅ, tu wul àm nsi tsho' ṅwi njam bo.

³ Lo' metsili z'o nsi fétte num ntôg nzwe o là.

⁴ O nsi bèn lo' mo' mba num tshen nà ma' mbwôg tone. Mbwôg nsi tum bwe lo nsi num tunndà Israél.

⁵ Tshù mba Tshùaben Nsi tshob li: Yen nu là lôt'a Yérusalém ze me na' nte i netèt ngôngô bo ntumntum ts'a diaṅ i mbum nà.

⁶ Là Yérusalém ghù tatu num ntag màm ntshùa ngôngô, ngù tatu num ntshù' màm ntshùa ntumntum tse bo diaṅ i mbum nà. Bo wag ntshù' màm, ke ke nzin à mb'a ntùm nkàn màm nà.

⁷ A ndùlala Tshùaben tshob ndù: Mba bin na' ngù tatu ntshùa ngôngô ts'a diaṅ zin mbum nà, mba bin na' mbe ke ze nkàn màm, ke ze ntshù' màm, là nke ngù à mb'a be ntùm ntshù' ngôngô ts'a diaṅ zin mbum nà,

⁸ a tshùa ndùlala Tshùaben tshob ndù: Tshù, me tam bu àm num o, me nsi tsho't'o netèl o, num miag ngôngô.

⁹ Tu wul àm, me nsi ghù ju ze me ke' to' ghù là num o, ju ze me ke nsi zi bèn ghù là, num tshunu tsho ts'a bag ntshùate là.

¹⁰ A ndùlala ba tà nsi fèt bon tshob netèl o, bon fèt tà tshob netèl o; me nsi tsho't'o, sate njoṅ ju fa z'a tù' wù là num njoṅ bag njù fa.

¹¹ A ndùlala, Tshùaben tshob nsaṅlaṅ num tu wul i ntshob ndù: Mb'o lo' ba neto bo tshunu ts'a bag ntshùate sagte ndà àm ze nelàn yi là, mba tu wul àm ke nsi tsho' lag sàm num o, me ke nsi tshàm ndèn, kondèn ke nsi be bwe.

¹² Me nsi ghabte ba la' tsho nze tat, ta' bag i kwùte keya' ke nziku' lo netèl o; mo' ta' bag i kwù ṅwi mbaṅ o, mo' bag i, me sate yub num bag njù kuà, ntsho' ṅwi njam bo.

¹³ Nu nsi ghù mba yantù àm ṅwate là, me nsi ghù tshùagntù àm fite tse num bo; me nsi ṅwate tse wul àm; bo nsi lèn ndù me Tshùaben tshob nu mum yantù àm ndùse me nsi sa tshùagntù àm num bo là.

¹⁴ Yérusalém, me nsi lo' o ghù kônkwa yi, lo' o ghù ju tshabte yi netèt ngôngô tse bo diaṅ o mbum nà, mba num miag ghatshùanze.

¹⁵ Tu wut Tshùaben tshob ndù: Yérusalém, o nsi be ju tshabte bo ze tuswe, be ju z'a kag fétwut mum ngôngô tse bo diaṅ o mbum nà ndùse me nsi tsho't'o ntùm yantù bo tshùagntù mba nenaṅ ntsha ze nebag là. A b'a me Tshùaben bèn ntshobe.

¹⁶ Me nsi ma' nkét kebwô, nkét nziku', nkét mi a be mfà vù là, nkét mi me nsi tum a se' nsate zin nà; me nsi kwi'te nziku' num nge' tsine, be' nkô bàn o.

¹⁷ Me nsi tum nziku' bo tshùagkèt nyàm num o, bo biagte bon tsho; keya' bo lem nsi tôg netèl o, me nsi ghù ṅwi se' num o. A b'a me Tshùaben bèn ntshobe.