Ezékia 4 - NTSHOB NSI

Tshùaben la'te nu ntsha z'a ghù Yérusalém nà

¹ Wù mén mèn, lo' ke' tsha' nebome, njab i mbwe o, ntshebte ta' ngô bwe, Yérusalém.

² Tshebt'é a tswe mba ngô ze ntsho ton i là, tshebte ba nsam bwe, kut ba kàb mbwe i, kut mbàn bwe ndo' ndiaṅ i yi mbume, ntete ba masin ntsho bwe ndiaṅ mbume.

³ Lo' tômbwôg tùn nte i mba kàbngô z'a b'a ze ntùn nà netèt tu wul o bin ngô; tshag lag so ndôte ngô, bo nsi ton i, tu wul o nsi ton i. A bwô ndù yen nu là b'a keki num tunndà Israél.

⁴ Nô nsi num bag wul o ze kwéb, ndo' mfànnu tunndà Israél num bwe. O nsi ket mfànnu mub num njoṅ lé'njù fa ts'o nsi nô num bwe là.

⁵ Me nsi siaṅte lé'njù ts'a be njoṅ ngu'njù mfànnu mub là, lé'njù bon bwe'e nkù tat; o nsi ket mfànnu tunndà Israél ndùlala.

⁶ Ndùs'o nsi miagte tshen lé'njù là là, o nsi nô num bag wul o ze zwim, ket mfànnu tunndà Yuda lé'njù ṅam nkuà. Me yab njoṅ i wù num ta' lé'njù mum ta' ngu'njù.

⁷ O nsi kaṅ se o bo bu o ze ju ke bwe là tshag nze Yérusalém ze ntsho ton i là, tshob ntshob ngatshob ntshob Nsi num i.

⁸ Tshù, me ma' mvèt num o, ndù k'o bèn nku'ni nekaṅ mo' bag wul o num mo'o, tà nkum ndùs'o nsi zwiagte lé'njù tse ntsho ton o là.

⁹ Lo' ngefele, nsa, ba nkun, nkun kekùa, nju bo ba ngefele; o nsi tamte njoṅ i fa mum ta' kab, nabte jujù yi, num njoṅ lé'njù fa ts'o nsi nô num bag wul o là. O nsi jù yen jujù là mum lé'njù bon bwe'e nkù tat.

¹⁰ Jujù o z'o nsi jù ta' lé'njù nèn kum mo' là nsi b'a ta' ndô nkàb ṅam mbàa.*f**

¹¹ O nsi ke fi' ntse kà nu. O nsi ke nu ta' kob ntse ta' lé'njù nèn nkum num mo'o.

¹² O nsi fèt tag nsa z'o lo' mbèt benntùn na yi mbwe bo là.

¹³ Tshùaben tshob me ndù: A ndùlala ze bon Israél nsi jù jujù nesagte netèt ngôngô tse me nsi sate yub tshag bwe là.

¹⁴ Me tshob ndù: Ah Tshùaben Nsi, yen ndù me lo ke to' sagte ntù àm. Fe num tshàm lé'njù nshum tà nse' nkum ndonni, me ke' fèt nyàm z'a kwù, ke ze bo fagt'é lo. Sàm mbàb nesagte ke' to' tsho ntshu àm.

¹⁵ A tshob me ndù: A be ndùlala mba me bam mbèt nyàmna' wù, ke bèn mb'a mi benntùn. Lo' i na jujù yi.

¹⁶ A bèn ntshob me ndù: Mén mèn, me nsi be' nkô bàn mà Yérusalém; bo nsi be jù bàn fi'i, lo' à zwe jù yi, nu ntse bo mfi', mum fétwut (bwôg).

¹⁷ Bo nsi bwoṅ jujù bo ntse, nu nsi tshùa yub bo bo, bo fame, mbi ntùm mfànnu mube.