Ezékia 21 - NTSHOB NSI

Bo nsi ton Yérusalém, mba Ammon

¹ Tshùaben tshob me ndù:

² Mén mèn, kaṅ wul o ndôte bag ntumnyam, tshob ntshob kebwô num ntèn, tshob ntshob kebwô num fèn Négéb.

³ Tshob fèn Négéb ndù: Ju' ntshob mi Tshùaben Nsi tshob li: Tshù, me nsi te mbwôg num o, ndù a kù ntù fi boa mi njum. A b'a lambwôg s'a ke nsi bi là; a nsi kù njoṅ tshu fa neto' Négéb nèn nkum tu.

⁴ Njoṅ benntùn fa nsi yen ndù a b'a me Tshùaben bèn nte mbwôge. Yen mbwôg là ke nsi bi.

⁵ Me tshob ndù, Tshùaben Nsi, bo num ntshob num àm ndù: Tshù ngatànkùt là.

⁶ Ndùlala Tshùaben tshob me ndù:

⁷ Mén mèn, kaṅ wul o ndôte Yérusalém, tshob ntshob kebwô num dù' nelàne, mba mum ngô Israél.

⁸ O nsi tshob ngô Israél ndù: Tshù mba Tshùaben tshob li: Me lo nsi num o, m'a' sô ṅwi mbàn, mbiagte mèn netsin bo mèn kebwô yi netèl o.

⁹ Ṅwi tum ntùm mbàn i à num nelo' mbiagte mèn netsin bo mèn kebwô yi, a tum à num njoṅ benntùn fa, neto' Négéb nèn nkum tu.

¹⁰ Njoṅ benntùn fa nsi lèn ndù a b'a me Tshùaben bèn nsô ṅwi mbàn, mbe ndù a ke nsi bèn tsho mbàn.

¹¹ Wù mén mèn, a bwô ndù o tsham zwe, mfèt nsô. O nsi tsham zwe mbwe bo, nummbe zwentù dun ntù o.

¹² A be ze bo bètt'o ndù: Numk'o nke ntsham zwe à? Mb'o nsi bùnte bo ndù: A b'a num tshô z'a se' là. Ntù njoṅ benntùn fa nsi tswe ntùm sobni, mbu mub nsi yube, zwiag sob nsi bole, ntunkekwi' mube yube. Tshù, ju Tshùaben Nsi tshob là se'e, ntshob mi bumte.

¹³ Tshùaben tshob me ndù:

¹⁴ Mén mèn, tshob ntshob Nsi. Tshob bo ndù Tshùaben ndù: Bo kùa ṅwi, bo kùa ṅwi njab mfèt bwe.

¹⁵ Bo kùa i à nelo' nzwite benntùn yi; bo yab mfèt bwe a ndù a ziage: (mba miagte yen kami li be là ke' fà bu neju'u.)

¹⁶ Bo fà i ndù bo kùa, kà mèn ntshùb i; a b'a ṅwi ndù bo kùa, ndù bo kùa njab mfèt bwe kà mfà bu ngazwite benntùn.

¹⁷ Mén mèn, kua'a, tshag nz'o tù, nummbe bo tsho' ṅwi mbàn a num yàm nzwit mèn. Bo tsho' ṅwi mbàn à num njoṅ fenfen Israél fa boa yàm nzwit mèn. Ndùlala lab tammbwe o. (Neto'te yen kami li ke' fà bu neju'.)

¹⁸ Ṅ, laṅte nsi be; a nsi yôg be ke, a be ze bo bagte (be'te) kôg fen z'a num ngua' njoṅ i fa l'à?

¹⁹ Wù mén mèn, tshob ntshob Nsi, bu' mbu! A bwô ndù ṅwi be bàa, mbe tat. A b'a ṅwi lem, ṅwi ndùb ze nezwite benntùn yi z'a tshwèt njab nge' njoṅ dù' fa là.

²⁰ Me yab ṅwi lem mbwe njoṅ nzendà fa, num nelo' nkag bwôg yi ntù benntùn bo nelo' nzwite benntùn yàm yi. Bo a nabt'é t'a nke nziage, bo kùa i num nezwite benntùn yi.

²¹ Kaṅ wul o ndôte njam, ndôte bu zwim, ndôte bu kwéb, ndôte mbwe o.

²² Mba me yàm nsi bu' mbu, nummbe me nsi yagte mba' tshùagntù àm. A b'a me Tshùaben bèn ntshobe.

²³ Tshùaben tshob me ndù:

²⁴ Wù mén mèn, a bwô o to manze bàa ndù mfen Babilon tshùa, ṅwi bàa ts'a tum à be ntùm ngô ntshù' là. Kite ta' keki, kit'é num tu nze z'a tshwèt ntsho ntùm ta' ngô là.

²⁵ O nsi to mo' nze ndù ṅwi nèn nkum Rabba, ngô bon Ammon, to mo' a nèn nkum Yuda, nkum Yérusalém, ngô ze bo kut kàbngô bwe là.

²⁶ Nummbe mfen Babilon tsin mfagte manze bàa, nke ntam tô num nu z'a tum nà; a tshwèt nshùmte nkét, nke mbètte Térafim nu, nke ndôte mbi mèn.

²⁷ Bùm tô s'a mum bu i ze zwim nà vù num Yérusalém, dù' ze bo nsi taṅte nkomnjù, ghù bo watte là; bo nsi bu' kem ntsho; bo nsi taṅte nkomnjù mbwe nzendà, bo nsi ma' tun ba', tswe' ba nsam.

²⁸ Bo tse bo na' sobve là ke njen men ntshob l'a mba ju banban nà. Là tu wul i be nkwimte nukebwô tshobe, tà mbe ndù bo nsi vù mum nkù.

²⁹ Tshù mba Tshùaben Nsi tshob li: Mba bin bèn nke nkwimte nukebwô tsine, nke mbù' fu num mfànnu mine, nke ngù nukebwô tsin nda'te wul i mum ngùninu min nà, me nsi so ntsha tu bin nummbe yen nekwimte nukebwô tsin nà lo nsi a be num tu wut tsine.

³⁰ Mbe se' mba wù mfen Israél là, wù z'o b'a bagkèt ngafètte lem nà, yu miagte lé'njù ghebte (ba nzendà) boa miagte nukebwô tsho.

³¹ Tshùaben Nsi tshob ndù: Bo nsi tsho' màkwa, tsho' ndot fen, bate njoṅ i fa. Ju z'a kôgte là, bo nsi bù't'é, ju z'a bù'te là, bo nsi kôgt'é.

³² A nsi tù' a fam, fam fam, tshù mba me nsi ghù yi là, ghù yi a ntùm mat ze lèn i ke' yoṅ nto' be, kà kum ndùse mèn z'a nsi tsho'te nsi se'e, me fà nu bu i là.

³³ Wù mén mèn, tshob ntshob Nsi, ntshob ndù: Tshù mba Tshùaben Nsi tshob num bon Ammon boa tute yub li: Ṅ, ṅwi, ṅwi tum mbàn, bo kùa i num nezwite benntùn, num newatte benntùn mba ndù a ke nké'é!

³⁴ Ṅwi nsi ghù o vù netèt fe ghatshùagntù ndùs'o nsi ke yen ba njem banban boa ntshob tatte, tse lé'njù se se' num ngelaṅ ze nukebwô dun ntsho' ntshèt là.

³⁵ So ṅwi o mbàn; me nsi tsho't'o num dù' ze bo nabt'o bwe là, mum ngô ze bo bwe o bwe là.

³⁶ Me nsi so yantù àm num o, fùag mbwôg tshùagntù àm num o. Me nsi fà o mum mbu benntùn tse bo b'a mintùn, sob fa' b'a nebagte dù' là.

³⁷ Mbwôg nsi kù o, lem tsho nsi swe' netèt ngô; bo ke nsi bèn kwimt'o. Nummbe me Tshùaben bèn ntshobe.