Ezékia 2 - NTSHOB NSI

Netum ngatshob ntshob Nsi. Njem ṅwa'ni nebote

¹ Nze là tshob me ndù: Mén mèn, lo ntsin tù num nku mu, me nsi tshob nu wù.

² Ndùs'a yoṅ ntshob men ntshob li me là, Ywèt tsho num àm, ngù me lo ntsin tù num nku màm; me ju' nze mèn z'a ke ntshob me là.

³ A tshob me ndù: Mén mèn, me tum o mbaṅ bon Israél, mbaṅ ghatatu tse bo ta tu me là. Bo boa tà tshob lo ghù nukebwô tà nse' nkum sènni.

⁴ Tshen bon nà ghù tùntu, ntù tshob sag; me ke ntum o mbaṅ bo à ndù o tshob bo ndù: Tshù mba Tshùaben Nsi tshob li:

⁵ Ke bo ju' wù ke bo ke ju' lo, mba mba bo nsi lèn ndù ta' ngatshob ntshob Nsi num netèt bo. Me lèn kua' ndù bo b'a nzwit ghatatu.

⁶ Wù mén mèn, kà bwôg yube, kà bwôg tshu bo tshob là, mba mb'o b'a netèt kwékwénàndô bo nka', nke ntswe à bin à nenya'tshum nà. Kà bwôg tshu bo tshob là, ke vètte mbwe bo, mba mba bo b'a tunndà ghatatu là.

⁷ O nsi tshob ntshob màm bo, ke bo ju' ke bo ke ju' lo; nummbe me lèn ndù bo b'a ghatatu.

⁸ Wù mén mèn, ju' ju ze me nsi tshob wù là! Kà be ngatatu mba yen tunndà là là! Gha' ntshu o, njù ju ze me nsi fà wù là.

⁹ Mba me ke ndôte là, me yen mo' bu, ndù a nyit nshù num àm, ndù a tshùb ta' ṅwa'ni nebote.

¹⁰ A ké'te yen ṅwa'ni là mbwe àm, ndù bo kite ntùm bwe mba njam bwe; bo lo kite vù, nsindà vù bo ndèn vù ntùm bwe.