Ezékia 12 - NTSHOB NSI

Nu nze bàa ze Nsi nsi ghù num benntùn nà

¹ Tshùaben tshob me ndù:

² Mén mèn, o ke ntswe a netèt nzwit ghatatu. Bo ghù miag ne yen yi, là ke be yen, ngù ntoṅ neju' yi, là ke be ju', nummbe bo b'a nzwit ghatatu.

³ Wù mén mèn, nabte yu bàm nkùla', nkù la' mbwôgtshù, num miag mube. Kù la' mbwe bo nène, kù la' nèn mo' dù' ghua. Be mo' ndù bo yen ndù bo b'a nzwit ghatatu.

⁴ Lo' tshu tsho mba bàm nkùla' là mbwôgtshù num miag mube; a bwô tu wul o kù la' mbwe bo mfetnjù nèn mba ghakùla' be nèn nà.

⁵ A bwô ndù o to kàbngô num miag mube, sô tshu tsho ntum yi num miag mube.

⁶ Yab tshen tshu là nkembe' o, ndo' ntum yi ndùse dù' sènte là; kabte se o, ndù k'o yen ngô, nummbe me kô ndù o be keki num tunndà Israél.

⁷ Me lo ghù ju z'a tshob me là: Me sô tshu tshàm mbwôgtshù mba bàm nkùla' là. A be mfetnjù me lo' bu àm nto kàbngô yi, ndo' tshu tshàm ntum yi ndùse dù' sènte là, njab num nkembe' àm num miag mube.

⁸ A be nkebnjù Tshùaben tshob me ndù:

⁹ Mén mèn, tunndà Israél, yen tunndà ghatatu là, lo ke bètt'o ntshob ndù: O ghù a ke ké?

¹⁰ Tshob bo ndù: Tshù mba Tshùaben tshob li: Yen nu li ke ndôt'a mfen z'a be Yérusalém nà bo njoṅ tunndà Israél fa z'a be bwe là.

¹¹ Tshob ndù: Me b'a keki bin. Ju ze me ghù là b'a ju ze bin nsi ghù bo là. Bo nsi nèn kùla', ntswe ndà kuan.

¹² Mfen z'a netèt bo là nsi yab tshu tse num nkembe' i tum ndùse dù' sènte là nène. Bo nsi to kàbngô ghù a tume. A nsi kabte se i, ndù kà miag mi lôte ngô.

¹³ Me nsi bùn nkù àm num i. A nsi vù mum sàm fole. Me nsi lo' i nèn yi Babilon, ntùm ngô Kaldéa. Là, a ke nsi yen i, mba mb'a nsi kwù à bwe là.

¹⁴ Me nsi sate njoṅ ben fa tse bo diaṅ i mbume, nke njwimt'é là, sate njoṅ tse ntshu ntsho fa bag bag, tsho' ṅwi njam bo.

¹⁵ Bo nsi lèn ndù me b'a Tshùaben ndùse me nsi sate yub mum ngôngô, ndùse me nsi sate yub ntùm ngô nzenze là.

¹⁶ Là me nsi faṅ bon ndô benntùn, tse bo nsi tum ntshu ṅwi, tum ntshu kua mba ntshu keya' là. Ndùlala ndù bo soṅ njoṅ bagkèt mfa' mub fa netèt ngô tse bo nsi nèn bwe là. Yen ngelaṅ nà bo nsi lèn ndù me b'a Tshùaben.

¹⁷ Tshùaben tshob me ndù:

¹⁸ Mén mèn, o nsi jù yu bàn a ntùm vètte, nu mu ntse a ntùm nenywin bo nge'.

¹⁹ Tshob nzwit mèn ntùm ngô ndù: A tshùa num nefètte lem ze njoṅ ba ntùm ngô ghù là, Tshùaben tshob num ba Yérusalém tse bo be mum tsha' Israél là ndù: Bo nsi jù yub bàn a mum nge', nu mub ntse a mum vètte; nummbe bo nsi lagte njoṅ tshu fa ts'a mum ngô yub là.

²⁰ Bo nsi sate ngô tse benntùn yàm ntùm bwe là, bagte ngô. Yen ngelaṅ nà bin nsi lèn ndù me b'a Tshùaben.

²¹ Tshùaben tshob me ndù:

²² Mén mèn, men ntshob tshabte li mi bin tshwèt ntshob ntùm ngô Israél, nke ntshob ndù: Lé'njù ke nsag nèn à be mbwe, njoṅ njem fa ke nke' a ke bumte là, bagt'a ndùke?

²³ A ndùlala, tshob bo ndù: Tshù mba Tshùaben Nsi tshob li: Me nsi ghù ntshob tshabte tsine; bo ke nsi bèn tshob men ntshob là mum ngô Israél. A bwô o tshob bo ndù lé'njù ke ngebt'a neghebte, mbe ndù njoṅ njem fa nsi bumte.

²⁴ Nummbe njem banban ke nsi bèn be, ke ntshob tatte lo netèt tunndà Israél.

²⁵ Nummbe me Tshùaben nsi tshobe, ju ze me tshob là nsi bumte kà ke ghubte. Tshùaben tshob ndù: Tunndà ghatatu, ṅ, me nsi tshob ta' ntshob bèn ghù a bumte mum tsin lé'njù.

²⁶ Tshùaben tshob me ndù:

²⁷ Mén mèn, tshù, tunndà Israél be ntshob ndù: Njem tse ngatshob ntshob Nsi yen nà, ngelaṅ nebumte ke' yoṅ ngebte. A ke ntshob ntshob Nsi mfà a num ngelaṅ z'a sag là.

²⁸ A ndùlala tshob bo ndù: Tshùaben Nsi tshob ndù ngelaṅ ke' bèn nsag mba ntshob mi nsi bumte là. Ntshob mi me nsi tshob là nsi bumte, Tshùaben Nsi bèn ntshobe.