Ezékia 11 - NTSHOB NSI

Nsi naṅ ntsha tu ghafànnu, ba Yuda tù' bu' ntsho; Nsi a' ghù nko ndèn mube

¹ Ywèt lo' àm nèn yi mbwe nzendà Ndà Nsi z'a be bag ntumnyam nà. Tshù, me yen benntùn ntshob tàn ṅam mbàa mbwe nzendà. Me yen Yaazania nshum Azzur mba Pelatia nshum Benaya kamkam ngô netèt bo.

² Tshùaben tshob me ndù: Mén mèn, a b'a benntùn tse bo be nkwa nukebwô, nke mfà ntag kebwô ntùm yen ngô li là.

³ Bo be ntshob ndù: A ke ngelaṅ ni! Be kut mba'! Ngô b'a mba kab là, tu wut be be mba mbàb là ntùm bwe.

⁴ A ndùlala tshob nu Nsi num bo, mén mèn, tshob nu Nsi num bo.

⁵ Ywèt Tshùaben vù num àm, ntshob me ndù: Tshob ndù: Tshù mba Tshùaben tshob li: Tunndà Israél, a mba bin tshwèt ntshob là ké? Me lèn ju z'a tshwèt nse' ntùm nkwatenu min nà.

⁶ Bin ghù nezwite benntùn dun mum yen ngô li, ngù fe ben dun num manze.

⁷ A ndùlala, Tshùaben Nsi tshob ndù: Fe ben tsin tse bin sate netèt ngô là bèn mbe mbàb, ngô be kab. Là tu wul àm nsi sô zin ntùm bwe.

⁸ Tshùaben tshob ndù: Bin be mbwôg ṅwi, me nsi ghù ṅwi se' num bin.

⁹ Me nsi ghù bin tum ntùm ngô, me fà zin mum mbu ghùn (Ba tum), lo' njoṅ tshàm tsho'te ntsha fa se' yi num bin.

¹⁰ Bin nsi vù num ntshùag ṅwi. Me nsi tsho'te zin num ze ndùnsi Israél, bin lèn ndù me b'a Tshùaben.

¹¹ Ngô ke nsi bèn be kab, tu wut tsin ke bèn mbe mba mbàb là netèt ngô. Me nsi tsho'te zin a num ze ndùnsi Israél.

¹² Yen ngelaṅ nà bin nsi lèn ndù me b'a Tshùaben, ze bin na' mbe ke ze nkàn mi boa ntshù' mi là. Là bin lo ghù a ndaṅndaṅ mba ntshù' ngô tse bo diaṅ zin mbum be ntshob là.

Nsi bù ju ba ndà kuan

¹³ Ndùse me ke ntshob ntshob Nsi là, Pelatia nshum Benaya kwù. Me vù nsi kabkab, nkua' nze neta ntshob ndù: Ah! Tshùaben Nsi, o nsi biagte ju z'a tù' Israél là ké?

¹⁴ Ndùlala Tshùaben tshob me ndù:

¹⁵ Mén mèn, a b'a fèt tsho, ko' fèt tsho, benntùn mum yu tunndà bo njoṅ tunndà Israél fa. A bo là ze ba Yérusalém tshwèt ntshob ndù bo tswe ngùanesà mbaṅ Tshùaben nà; ngô li tù' kua' yage, a mba bo tshwèt ntshob là.

¹⁶ A ndùlala tshob ndù: Tshù ju ze Tshùaben Nsi tshob li: A be ze me na' ntshag yub ngùanesà mum ngôngô, a be ze me na' nsate yub ntùm ngô nzenze là, mba me nsi be ndàlem bo num mo' ngelaṅ ntùm ngô tse bo be bwe là.

¹⁷ A ndùlala tshob ndù: Tshù ju ze Tshùaben tshob li: Me nsi tse'te zin netèt ngôngô, me nsi lo' zin mum ngô nzenze tse bin sate bwe là, bèn fà tsha' Israél bin.

¹⁸ Bo nsi bèn njam mum ngô, sô njoṅ neto fa mba njoṅ bagkèt tshu ts'a mum bwe là.

¹⁹ Me nsi fà be ntù ntshù' bo. Me nsi so ywèt nswe num bo; me nsi sô ntù loṅ mum wut tshobe, fà ntù mbàb bo,

²⁰ ndùlala ndù bo tshùb nkàn màm, nju' ntshù' màm mbèn nke nze; bo nsi be yàm nzwit mèn, tu wul àm be Nsi yub.

²¹ Tshùaben tshob ndù: Me nsi ghù mfa' ben tse bo be nkô neto boa bagkèt tshu là tsho be kua' tu bo.

²² Ba kérubim sette mbàb mube, nku matua bwe yube; nkuni Nsi Israél be num bo mfe tù.

²³ Nkuni Tshùaben lo netèt ngô, nèn ntsin num mbat z'a be bag ngô z'a ntumnyam nà.

²⁴ Ywèt kel àm nèn yi Kaldéa mbaṅ kuan ntsho, me b'a ntùm njem, njam Ywèt Nsi. Njem ze me na' njen nà bi tu àm.

²⁵ Me soṅ kuan ntsho njoṅ tshu fa tse Tshùaben na' ngù me yen nà.