Ezékia 10 - NTSHOB NSI

Nsi tshob ndù bo ton ngô, Nsi bèn ndà i

¹ Tshù, me nke ndôte, njen mo' ju mba loṅ fôgtab (safir) là num kamànyam z'a be num tu ba kérubim nà. Mo' ju lo be num bo ndù a fute diaṅkwa.

² Tshùaben tshob mèn z'a ket nzwe fôgtab là ndù: Nèn num nku matua mi a be bam ba kérubim nà, ndo' nge'mbwôg mi o lo' netèt ba kérubim nà kà mbu mu dune. Sate njoṅ i fa mum ngô. A ghù ndùlala num miag màm.

³ Ba kérubim lo b'a num bag Ndà Nsi ze zwim, ndot dun bam ntshundà z'a be ntùm bwe là ndùse mèn nà ke nèn nà.

⁴ Nkuni Tshùaben lo num ba kérubim nèn nze nzendà Ndà Nsi, nelàn nkuni Tshùaben dun bam ntshundà Nsi. Yen ngelaṅ nà ndot dun ntùm Ndà Nsi.

⁵ Tshu'te mbàb ba kérubim nèn nkum bam ntshundà njù, ntswe mba nze Nsi Nganeta Ntshùate ndùs'a be ntshob nu là.

⁶ Ndùlala Tshùaben tshob mèn z'a ket nzwe fôgtab là ndù: Lo' mbwôg netèt nku matua mba netèt ba kérubim! Yen mèn nà nèn ntsin mbaṅ nku matua.

⁷ Mo' kérubim nyit bu i ntshag nze dù' mbwôg be netèt ba kérubim nà; a lo' mbwôg ntum yi.

⁸ Bo lo ke njen mo' ju bam mbàb ba kérubim ndù a fute mènntùn.

⁹ Me lo ke ndôte, njen nku matua nkuà mbaṅ ba kérubim; ta' ku matua be mbaṅ mba zit kérubim no; men nku matua là lo ghù ntshù loṅ tanjoṅ (krisôlitô).

¹⁰ O lo ke mbe lôte yub bo b'a be mat ntshù', mba zit ku lo tswe mb'a b'a num mo' là.

¹¹ Men nku matua là lo ke mbe kù' bag tse kuà, nke nène, là nke nèn ke kaṅte, nummbe bo ke nèn a bag dù' ze tu ke nèn nà, nke nèn ke kaṅte.

¹² Njoṅ wut yub fa, njoṅ mvèn yub fa, njoṅ mbu mub fa, njoṅ mbàb mub fa, mba nku matua lo ghù miag num bwe ndiaṅ mbume, boa nku matua njoṅ yub fa.

¹³ Me ju' bo tsiaṅ nku matua ndù zim.

¹⁴ Mba zit ku matua lo ghù se tse kuà; se mbwe i na' mb'a se kérubim, se mbatte bàa be se mènntùn, se mbatte tat be se ngwayit, ze mbatte kuà be se ghammàtat.

¹⁵ Ba kérubim lote. A na' mb'a nyàm tse me yen yub mbaṅ ta'ntse Kebar là.

¹⁶ A lo ke mbe ndùse ba kérubim tshwèt nzinte là, nku matua nke nzin mbaṅ bo; ndùse bo sette mbàb mub nefùt là, mba nku matua ke kamte num bo.

¹⁷ Ba kérubim lo ke ntsin nku matua tsin yub, mfùt boa bo fùt, nummbe zwiag ba nyàm na' mb'a num nku matua.

¹⁸ Nkuni Tshùaben lo bam ntshundà Ndà Nsi, ntswe num ba kérubim.

¹⁹ Ba kérubim sette mbàb mube, mfùt be kua' num miag màm nène, boa nku matua. Bo tsin mbwe ndà Tshùaben z'a be bag ntumnyam nà, nkuni Nsi Israél be mfe num bo.

²⁰ A na' mb'a nyàm tse me yen bam Nsi Israél mbaṅ ta'ntse Kebar là. Me lèn ndù a na' mb'a ba kérubim.

²¹ Mba zit lo lo ghù se tse kuà, mba zit lo lo ghù mbàb mi nkuà, ngù mo' ju bam mbàb mub ndù a fute bu mènntùn.

²² Se tshob lo fute se tse me na' njen mbaṅ ta'ntse Kebar là; a na' mb'a be mat ntshù', a na' mb'a be bo mbile. Mba zit lo nke nzin nèn mbwe.