Esta 9 - NTSHOB NSI

Ba Yuda yagte mba'a. Jùa Purim

¹ A lo be num maṅwù ntshob bàa gham z'a b'a ṅwù Adar là, mum lé'njù ntshob tat gham ntùm ṅwù, lé'njù ze ntshù' mfen ke ntù' nelo nsi num ba Yuda, ghakeban tshob nke mbéb tô yub là, nu kaṅ taṅ i, ba Yuda tù' bèn ntô ghakeban tshobe.

² Ba Yuda kùmte ntùm njoṅ mub ntusô fa, ntùm njoṅ ntaṅ ngô mfen Asuérus fa, num neyab mbu num ben ts'a be bo bù' tu yub nsi num bo, nke ndiag nebiagte yub là. Sàm mèn ke bù' tu i nsi num bo, num bwôg ze ngôngô ghù num ba Yuda là. Bwôg là lo gha' mbu.

³ Fenfen njoṅ ntaṅ ngô fa, fenfen, ngomna boa ghafa' mfen tomt'a ba Yuda, nummbe bo lo ke mbwôg Mardokai.

⁴ Nummbe Mardokai lo ghù mba' ntùm ndà mfen, lén se ju'ni ntùm njoṅ ntaṅ ngô fa, nummbe ze mba' na' nke nèn à be mbwe njoṅ ndù fa.

⁵ Ba Yuda watte ghakeban tshobe, nzwite yube, mbiagte yub fa. Bo ma'ni ben tse bo ke nta tu bo là mb'a bwô yub là.

⁶ A lo be Suse tètla' diba, ba Yuda zwite, mbèn mbiagte benntùn ntu nkù tàn.

⁷ Bo watte Parshandata, Dalfon, Aspata,

⁸ Porata, Adalia, Aridata,

⁹ Parnashata, Aridai bo Vajezata,

¹⁰ tshen ben gham ni b'a bon Haman, nshum Hammedata, ngakeban ba Yuda. Nda' ndù bo ke lag tshob ntsha'.

¹¹ Bo soṅ mfen njoṅ benntùn tse bo zwite yub Suse tètla' diba là.

¹² Mfen tshob màbwengub Esta ndù: Ba Yuda biagte benntùn Suse, tètla' diba ntu nkù tàn boa bon Haman gham. Bo ghù a ndùke ntùm tsemo' ntaṅ ngô mfen à? Ke z'o bètt'à? M'a' fà wù. Ke z'o bèn nkô à? Mb'o nsi kwé me.

¹³ Esta bùnte ndù: A be z'a bwô mfen nà, mfen bam ndù ba Yuda bèn ngù ndamnjù Suse mba bo ghù sènni là, mbèn ntaṅ bon Haman tù.

¹⁴ Mfen bam ndù bo ghù ndùlala. Bo sa yen ntshù' là Suse. Bo taṅ bon Haman tù.

¹⁵ Ba Yuda tse bo be Suse là bèn nkùmte mum lé'njù ntshob kuà gham ntùm ṅwù Adar, nzwite benntùn Suse ntu nkù tat. Nda' ndù bo ke lag tshob ntsha'.

¹⁶ Tsemo' ba Yuda tse bo be ntùm memo' ntaṅ ngô mfen nà kùmte, ntshètte yôg sube. Bo tshu' wut yub bu ghakeban tshobe, ngù fite; bo zwite benntùn ntu (ntsha' ntshob tàn ṅam sammbàa netèt ben bo ta tu bo là) 75 000. Nda' ndù bo ke lag tshob ntsha'.

¹⁷ Tshen tshu li tum à mum lé'njù ntshob tat gham ntùm ṅwù Adar. Ba Yuda fite yub ntùm mbatte lé'njù ntshob kuà gham, ngù ta' lé' mànjù, ntsiaṅte.

¹⁸ Tse bo be Suse là kùmte mum lé'njù ntshob tat bo ntshob kuà gham, mfite wut yub a num mbatte lé'njù ntshob tàn gham. Bo ghù ta' lé' mànjù, ntsiaṅte.

¹⁹ A ndùlala ze ba Yuda tse bo be ntùm ngô, nke ntswe ntùm ntusô mi kàbngô ke bwe, num mbe lé'njù ntshob kuà gham ntùm ṅwù Adar nke ntsiaṅte, mbe ntùm jùa bo lé' mànjù là. Bo be nke ntshag nda' bo bo netèt bo.

²⁰ Mardokai kite tshen tshu là, ntum ṅwa'ni njoṅ ba Yuda tse bo be ntùm njoṅ ntaṅ ngô mfen Asuérus fa, tse bo ghebte mba tse bo nesà là.

²¹ A kite bo ndù bo ke nkwimte lé'njù ntshob kuà gham bo lé'njù ntshob tàn gham mba zit ngu'njù lo ntùm ṅwù Adar.

²² Men ndé'njù là b'a mi bo na' ntshu' wut tshob mbu ghakeban, mfite ntùm bwe là. A tshob mbe bo ke nkwimte ṅwù ze nenywin na' nkaṅ ntù' tsiaṅte, nge' kaṅ ntù' jùa là, ndo' tshen lé'njù jùa, lé' mànjù là ntùm tsiaṅte, nke ntum nda' bin bin, mbèn nke ngabte tshu ghayennge'.

²³ Ba Yuda bam neghù ju ze bo to'te, Mardokai bèn nkite bo là.

²⁴ Nummbe Haman, nshum Hammedata mèn Agag ngakeban njoṅ ba Yuda fa, lo tàmte ndù a' biagte yube, ma' Pur, yen nà bagt'a ndù ntam tô, ndù a zwite, mbiagte ba Yuda.

²⁵ Nda' ndù Esta lo nèn mbaṅ mfen, mfen tshob ndù bo kite, nkaṅ ma' tu Haman, nu z'a na' ntàmte num ba Yuda là tsho i, bo taṅ i tù boa bon tse.

²⁶ A ndùlala, lén sen lé'njù là b'a Purim ndù a tum à num Pur. A tshùa num ju ze bo na' nju' ntùm ṅwa'ni, ntshùa num ju ze tu wut yub yene, bo nu z'a tum mbwe bo là,

²⁷ ba Yuda jù' yen nu là, ntshob ndù bo a' ghù nze men ndé'njù mbàa là mba zit ngu'njù lo be ndùlala mba num kua' ngelaṅ i. Bo jù' yen nu là num yub tu wut, nzwit yub boa ben tse bo nsi so wut num bo là, njù' ndù a nsi ke b'a ndùlala kà sàm ju ke tsi bwe.

²⁸ Bo nke nkwimte tshen lé'njù là, nke nze num zwiaṅ zwiaṅ, mba ntùm zit tunndà lo, zit taṅ ngô lo, sit tusô lo. Bo ke bam ndù bo zi mbiag tshen lé'njù Purim nà netèt ba Yuda, ke bam ndù yen tshô là zi mi netèt nzwit yub matmat.

²⁹ Màbwengub Esta ngon Abishail bo Mardokai ze Yuda bèn nànte nkite mbatte ṅwa'ni nelo' nsaṅlaṅ yi num nu Purim.

³⁰ Bo tum ṅwa'ni njoṅ ba Yuda fa ntùm ntaṅ ngô mfen Asuérus mi ntshob sammbàa bon bàa nkù. Tshen ṅwa'ni là nke ntshob nu mfà à num fite,

³¹ neju' ntshu num tshen lé'njù Purim nà num njoṅ ngelaṅ i ze Mardokai ze Yuda bo màbwengub Esta na' njab là; bo yab tshen lé'njù l'a num yub tu wut bo nzwit yub, mbe ndùlal'a num nu netswe nziku'u, bo mba bo kua' là.

³² Ju ze Esta tshob là saṅlaṅ num nete Purim, bo kite yen nu là ntùm ṅwa'ni.