Esta 5 - NTSHOB NSI

Esta zin kam mbwe mfen. Haman diag nezwi Mardokai

¹ A lo be kum lé'njù tat, Esta ma' nzwe fen num i, nèn tsin ntshundà ndà mfen z'a be ze ntùm bwe là, ntsin mbwe ndà mfen. Mfen lo tswe num diaṅkwa fen se, ntùm ndà fen z'a be mbwe nzendà netsho yi ndà là.

² Ndùse mfen yen màbwengub Esta z'a tsin ntshundà là, Esta tum mènfen num miag mi. Ndùlala mfen shù kôg gol s'a tshùb bu i là Esta. Esta kù' nse' nkwag tu kôg là.

³ Mfen bètt'é ndù: A nu ke màbwengub Esta, ke z'o tshwèt nkô à? A be z'o bètte mba mo' bag nufen nà, mba me nsi fà wù.

⁴ Esta bùnte ndù: A be ze mfen bam me là, a se' num jùa se me nabte yi là bo Haman sènni.

⁵ Mfen tshob ndù: Bin nèn ntsiaṅ Haman ndende mba Esta tshwèt nkô là. Mfen bo Haman nèn num jùa se Esta nabte là.

⁶ Ndùse bo ke nu ndu' là mfen tshob Esta ndù: Ke z'o tshwèt mbètt'à? Bo nsi fà ju z'o kô là wù. A b'a ke? A be z'a b'a mba mo' bag nufen nà, mba me nsi fà wù.

⁷ Esta bùnte ndù: Tshù ju ze me tshwèt mbètte, ndù nu tse toṅ àm ni:

⁸ A be ze me tum mènfen num miag mfen, a bwô mfen nebam ju me tshwèt mbètte, nkô nebam yen nu là me là, mb'a bwô ndù mfen bo Haman se' num jùa se me nsi nabte bo là. Me nsi fà mbùn ntshob mfen ndamnjù mb'a tshob là.

⁹ Haman be tum sen lé'njù là nke ṅwate, ntù i nke ntsiaṅte. Là, ndùs'a yen Mardokai nzendà mfen, a ke bèn nelo nsi ke bèn nkumte mbwe i là, yantù dun ntù i num Mardokai.

¹⁰ Nda' ndù a ghom wul i, ndo nèn la' i. A tum bo bèn ndiag shun tse bo nzwi i Zéresh.

¹¹ Haman soṅ yub ghamte tshunkàb tse, njoṅ nshumnshum ts'a ghù là, nsoṅ yub mba mfen so diaṅ tun i, mbù't'é tù ntùm ghamte bo mba diaṅ se mfen so tun i ghù a tshùa fenfen boa tshe' mfen fa là.

¹² A bèn ntshob ndù: ke b'a ndùlala; a bèn mb'a nda' me là ze màbwengub Esta bam ndù bag mfen se' num jùa s'a nabte là. A bèn ntsiaṅ yag bag mfen ndamnjù la' i.

¹³ Nda' ndù yen nà ke b'a mo' ju num miag màm a be ze me ke' njen Mardokai ze Yuda ndù a tswe nsi nzendà mfen nà.

¹⁴ Nzwi i Zéresh boa shun tse tshob yi ndù: A bwô ndù bo te ta' saṅ s'a sag nguan mbu ntshob tàn ṅam mbàa là tù, o tshag ndamnjù nkebnjù mbètte mfen bo taṅ Mardokai bwe, o nèn jùa bin mfen nke ṅwate. Men ntag li bwô Haman, a te sen saṅ nà tù.