Esta 4 - NTSHOB NSI

Netswe zwe bo netswe nziku' netèt ba Yuda

¹ Mardokai be ju' ju z'a tshùa là, mfagte nzwe tse, ma' nke' bàm num i, ndo' bwembwôg nse' wul i yi. A nke nkatte netèt tusô nke nkua' nkua' zwe.

² A nèn tà nkum nzendà mfen, dù' ze bo na' ntshèt nze bwe njoṅ benntùn fa tse bo ket nke'bàm nà.

³ Nge' yàm lo be netèt njoṅ ba Yuda fa mba ntùm zit taṅ ngô lo ze ṅwa'ni bo ntshù' mfen kum bwe là. Bo tswe nziku'u, nke nkua'a, nke ndàn wut tshobe, tse yàm netèt bo nke nô num nke' bàm bo num bwembwôge.

⁴ Ghafa' Esta tse bènnzwi boa tse mbantshù' nèn nsoṅ i yen nu là; ndùlala wut màbwengub fét neshu. A tum nzwe Mardokai mb'a lo' mbate nke'bàm yi num i, là Mardokai ke bam.

⁵ Ndùlala Esta tsiaṅ Hatak, mo' mèn netèt tse mbantshù' tse mfen yab mbaṅ i là ntum i ndù a nèn mbètte Mardokai nu z'a nsi là boa dù' ze nu fe bwe là.

⁶ Hatak nèn mbaṅ Mardokai netèt ngô, mbwe nzendà mfen.

⁷ Mardokai soṅ i njoṅ nu fa ts'a tsho num i là, mbèn nsoṅ i njoṅ silba ze Haman bam mb'a nsi so ntùm tshunkàb mfen, a be z'a bam nebiagte ba Yuda fa là.

⁸ A fà mo' fe ntshù' mfen ze bo sa ntùm Suse ndù bo biagte ba Yuda là ndù a la'te Esta, a lèn yen nu là. A bètte Esta mb'a nèn mbwe mfen mbètt'é kondèn i, mbèn nde't'é num ze nzwit mèn.

⁹ Hatak se' nsoṅ Esta ntshob Mardokai.

¹⁰ Esta tum Hatak, a nèn ntshob Mardokai ndù:

¹¹ Njoṅ ghafa' mfen fa, benntùn tse bo be ntùm ntaṅ ngô mfen nà lèn ndù mo' ntshù' num bwe nke ntshob ndù mèn tsho ntùm ntshundà mfen ze ntùm bwe mba bo a' zwi i, ke ng'é be mandum ke mènnzwi lo, a be ze mfen ke' tsiaṅ i là. Nda' mèn z'a ghù neyôg là b'a mèn ze mfen shù kôg gol se yi là. Tu wul àm, a b'a lé'njù ṅam ntat li mba mfen ke' tsiaṅ àm mbaṅ i là.

¹² Ndùse bo tshob ju ze Esta tshob Mardokai là, a bùnte Esta ndù:

¹³ Kà kwate mb'o nsi tum ntshu vùkob tù' wù netèt njoṅ ba Yuda fa, mb'o b'a ntùm ndà mfen nà.

¹⁴ Nummb'a be z'o ke' tshob nu ndonni là, mba ywimte bo netshu' ba Yuda nsi tum mo' bag, a be miagte wù bin tunndà tàan be ke bèn mbe. We lèn mbe z'o na' mbe ke tum mènfen à num lèn yen ngelaṅ njù li ndonni à?

¹⁵ Esta tum bo nèn ntshob Mardokai ndù:

¹⁶ Nèn nkùmte ba Yuda tse bo be Suse là, bin à bo tswe nziku' num tu àm, ke jù ke nu num lé'njù tat, ke tèttswe' ke mbwôgtshù lo. Mba kua' tu wul àm nsi tswe nziku' bag à ghafa' tshàm tse bènnzwi. Yen nà nsi be tôg me tsho ndà mfen, mba mba ntshù' be nsi là. A be be vù mba m'a' kwù.

¹⁷ Mardokai nèn ngù njoṅ tshu fa mba Esta tshob yi là.