Esta 1 - NTSHOB NSI

Jùa Asuérus. Màbwengub Vasti ta tu mbi ntàne

¹ Yen nà na' mb'a num ze ngelaṅ Asuérus, yen Asuérus là z'a na' nke ntô nelo India nèn nkum Etiopia là. A na' ke ntô ntaṅ ngô ntshob sammbàa bon bàa nkù.

² Ndùlala mfen Asuérus tswe nsi num diaṅkwa mà Suse, tètla' ngô.

³ A be kum ngu' tat num fen, ngù ta' jùa num lén kamkam tse fa boa ghafa' tse. Tàndà ntsho tse Persia boa tse Media, ben ndùbndùb boa ngomna tse bo ke ntô ba ntaṅ ngô là tamte fa nkùmte mbwe Asuérus.

⁴ A la'te fu' ze nufen bo nkuni ndùb mi a be ntùm bwe là num lé'njù yàme, num lé'njù bon fom nkù.

⁵ Ndùse tshen lé'njù li tôg là, mfen ghù se jùa ngô. A ghù jùa ben tse bo be Suse, tètla' ngô là. Sen jùa li b'a se dùbdùb tà nèn nkum num bônke', ntswe lé'njù sammbàa. Jùa li na' ntôg à ntshundà ba' mfen, ntshundà z'a be ntùm nka' là.

⁶ Nkam nzwe fôgtab, mi nenàfi boa mi nzwe'nzwe' lo be tù ndù bo lo' ndeb mebwô bo nkù meba tse bo sote ntùm nkwa silba là ntaṅte yub yi num ntom tse bo kànte ndoṅ bwe là. Nkunndà gol boa mi silba lo be bwe ndù bo yé'te yub num ta' dù' bo yabte mintsin, ndoṅ fôgtab, mfé ngota' boa ndoṅ nesèn bwe là.

⁷ Bo na' nke ma'te ndu' benntùn à ntùm ntu' gol, ndù tshaṅ tse b'a nzenze. Mfen lo ghù ndu' nsi yàme, nummbe mfen lo kém benntùn ntùm bwôntù i neshu.

⁸ Là bo ke nànte mènntùn k'a nu ndu', nummbe mfen lo tshob ben tse ndù bo ghù num mba zit mèn no à mb'a kô là.

⁹ Mba màbwengub Vasti lo ghù ze se jùa bènnzwi tse bo be ntùm ndà mfen Asuérus là.

¹⁰ A lo kum mbatte lé'njù sammbàa, ndu' ghù ntù mfen tsiaṅte, a tshob Mehuman, Bizta, Harbona, Bigta, Abagta, Zétar bo Karkas, ba mbantshù' ntu sammbàa tse bo na' nke mfa' mbwe mfen Asuérus là,

¹¹ ndù bo lo' màbwengub Vasti nse' yi mbwe i. A bètte ndù bo ma' kétmbùm tu i, a la'te bwô i ngô boa ben ndùbndùb. Màbwengub lo bwô neshu.

¹² Là màbwengub Vasti be ju' mba mfen tum ba mbantshù' ndù bo tsiaṅ i là nga, ke nèn. Ndùlala mfen ya ntù neshu, nu tse bag i.

¹³ Ndùlala mfen bètte ghazenu tse bo na' ndèn nu num ba ngelaṅ nà. Nummb'a mba tse nu mfen na' nke ntôg yi mbwe ben tse bo na' ndèn ba ntshù' bo nu ndaṅndaṅ nà.

¹⁴ Karshena, Shetar, Admata, Tarsis, Méres, Marsena, Menukam, kamkam sammbàa tse Persia bo Media lo be mbaṅ mfen. Tshen ben ni lo ke njen se mfen, mbèn mbèn mbe mbwe benntùn ntùm nufen.

¹⁵ Mfen Asuérus bètte ndù: A kua' zit ntshù' z'a b'a ghom màbwengub Vasti mb'a be ke ghù ju ze me na' ntshob ba mbantshù' ndù bo tshob yi à?

¹⁶ Menukam bùnte mbwe mfen boa kamkam ndù: màbwengub ke' ghù a ke bwô à nda' num miag mfen; a b'a mba num miag njoṅ kamkam fa boa benntùn tse bo be ntùm njoṅ ntaṅ ngô mfen Asuérus fa là.

¹⁷ Nummbe ju ze màbwengub Vasti ghù là nsi tam ntoṅ bènnzwi fa, ghù bo ke ngwag du tshobe, ke tshob ndù: Mfen Asuérus lo tshob ndù bo lo' màbwengub Vasti nse' yi mbwe i, a gha nenèn mbwe mfen.

¹⁸ Fe num sen lé'njù li ngonngon mfen Persia bo Media tse bo nsi ju' ju ze màbwengub ghù là, ke ghù yub be ndaṅndaṅ num kamkam mfen, a tshùa ndùlala, wag bo yantù gha' mbu ntùm ngô.

¹⁹ Ndùlala, a be ze mfen kô là, mb'a bwô nekite ta' ntshù' num lén se, yen ntshù' là tsho ntùm Persia bo Media ngô bwe, mèn ke tsho' ju bwe. Yen ntshù' là b'a ndù màbwengub Vasti ke bèn nzi nse' mbwe mfen Asuérus, mba ndù mfen a' so diaṅ màbwengub tun mo' mènnzwi ghua, z'a ku'ni num bwe là.

²⁰ Ndùse ntshù' mfen nsi zin ntùm mà zi nufen se là, njoṅ bènnzwi fa nsi ku'ni du tshobe, neto' num tse ndùb nèn nkum num tse nke'e.

²¹ Yen nkwate li bwô mfen mba njoṅ kamkam tse fa, mfen bam ntag mi Menukam tshob là.

²² A tum ṅwa'ni ntùm njoṅ ntaṅ ngô se fen fa, nkite ṅwa'ni ntùm mat nekite mba zit taṅ ngô lo, mba kua' ntùm ko' ntshob ngô. Ntshob mi a be ntùm ṅwa'ni là b'a men ni ndù: Mba zit mandum no b'a ngala' ntùm ze ndà, a bèn ngù netshob mba ze ke lo bwe, ntùm ntshob ze ngô.