Esdra 7 - NTSHOB NSI

Esdra zin nkum Yérusalém

¹ Tshen nu là lo be tôge, Esdra ṅwag. A na' mb'a num ze ngelaṅ fen Artasastia mfen Persia. Esdra na' mb'a nshum Seraya, nshum Azaria, nshum Hilkija,

² nshum Shallum, nshum Tsadok, nshum Akitub,

³ nshum Amaria, nshum Azaria, nshum Mérajot,

⁴ nshum Zérakia, nshum Uzzi, nshum Buki,

⁵ nshum Abishua, nshum Finéas, nshum Eléazar, nshum Aron, ngale'te ze ndùb.

⁶ Esdra na' mb'a ngalèn ntshù' Nsi, ndù a fà wul i num ntshù' Tshùaben Nsi ba Israél na' mfà Mosé là. Mfen nke ngù mba ke lo ze Esdra bètte yi là, nummbe Nsi lo ke ntam ntse yi. Esdra lo Babilon nèn Yérusalém,

⁷ boa tsemo' bon Israél. A na' mb'a ba: Ghale'te, ben Lévi, Ghayobkwi, ghabéb nzendà boa ghafa'. A lo be be ndù Artasastia ghù ngu'njù sammbàa num fen.

⁸ Esdra kum Yérusalém num ṅwù tàn ntùm ngu'njù sammbàa mba mfen be num fen nà.

⁹ Esdra na' ndo Babilon à num mbwe lé'njù ntùm mbwe ṅwù, nkum Yérusalém num mbwe lé'njù ntùm ṅwù tàn, nummbe bu Nsi i ze ntùn lo ke nkabt'é.

¹⁰ Esdra lo yab kua' ntù i neke nzi'te ntshù' Tshùaben, neke nze i mba neke ntswite ntshù' boa nkàn ntùm ngô Israél.

Mfa' mi Artasastia na' mfà Esdra là

¹¹ Tshù ṅwa'ni ze mfen Artasastia fà Esdra, ngale'te mbèn mbe ngalèn ntshù' Nsi, ndù a so wul i ntùm nelèn ntshù' Tshùaben boa nkàn mi a lôte Israél li:

¹² Artasastia mfen fenfen bèn nkite Esdra, ngale'te mbèn mbe ngalèn ntshù' Nsi z'a ghù kamànyam.

¹³ Me bam ndù bo faṅ bon Israél, ghale'te boa ben Lévi tse bo tshwèt ntswe ntùm yàm nufen nà nèn bin a bo Yérusalém, a be ze bo kô là.

¹⁴ Nummbe mfen bèn ntum o bwe bin à ghafà ntag tse ntu sammbàa, nelôte mà Yuda bo Yérusalém njen mba bo tshwèt nze ntshù' Nsi o z'a be ntùm mbu mu là;

¹⁵ mba ndù o fà silba bo gol ze mfen boa ghafà ntag tse fà Nsi Israél ze dù'ntswe i be Yérusalém nà,

¹⁶ mba njoṅ gol fa bo silba fa z'o nsi fon ntùm ntaṅ ngô Babilon fa, boa njoṅ nda' fa ze ngô boa ghale'te nsi fà mb'a ko' ntù bo num ba' Nsi Yérusalém nà.

¹⁷ A ndùlala, o nsi lo' yen nkàb là jun mfot mfô yi, nkomnjù, njùmbwe, mba tshu bwôntù boa ndu', fà tshen tshu là num tômbwôg s'a ntùm Ndà Nsi zin Yérusalém nà.

¹⁸ Bin à fèt tsho nsi lo' tshé' silba bo gol, ghù ju ze bin kô là yi, ndaṅndaṅ mba Nsi zin kô là.

¹⁹ Tshundà tse bo nsi fà wù num fa' Ndà Nsi o là, o nsi yab njoṅ i fa mbwe Nsi o z'a be Yérusalém nà.

²⁰ Mbe se' mba tsemo' tshu ts'o nsi bagte num Ndà Nsi o là, tshen nà nsi tum à ntùm tshunkàb fen.

²¹ Mba me mfen Artasastia, me tshob njoṅ ghalé' tshunkàb tse bo be mo' yoṅ ta'ntse là ndù bo ke mfà mba kelo ze Esdra bètte là yi. Esdra b'a ngale'te, mbe ngalèn ntshù' Nsi, ndù a fà wul i num ntshù' Nsi z'a ghù kamànyam nà.

²² Bo ke mfà kilô silba yi 3 450, mfà ntsi ngefet yi 4 500, mfà lita ndu' yi 4 500, mfà lita mfèt yi 4 500, mfà ngwa yi mb'a kô là.

²³ A bwô ndù mba ke lo ze Nsi z'a ghù kamànyam bètte là be kua' ndùlala num ba' i, mbwôg ndù kà yantù i kam num nufen àm, num mfen mba num nshumnshum tse.

²⁴ Bag ke' bam bin ndù bin kwé ntshub, ke tagsi, ke nekwé nkàb bam ntshùa lo sàm ngale'te, sàm mèn Lévi, sàm ngayobkwi, sàm ngabéb nzendà, ke sàm mèn Nétinia, ke sàm ngafa' lo ntùm yen Ndà Nsi li.

²⁵ Wù Esdra, mb'o ghù zenu z'a fe Nsi num o là, a bwô ndù o tsho' ghasa'kame, ghakeb ntsha, ndù bo nabte nunenùn ntùm ngô z'a mo' yoṅ ta'ntse là netèt ben tse bo lèn ntshù' Nsi o là; la'te tshen ghasa'kam boa ghakeb ntsha là ben tse bo ke' lèn yub là.

²⁶ Mba we lo z'a ke' ze ntshù' Nsi o bo ntshù' mfen nà, mba bo nsi keb ntsha zwi i, ke neta' i ntùm ngô, ke nekwé nkondo yi, ke nema' i tsha lo.

²⁷ Esdra tshob ndù: Ghamte be Tshùaben Nsi tà tshage. A ghù ntù mfen bwô, a ghamte Ndà Tshùaben z'a be Yérusalém nà.

²⁸ A ghù me tum mènfen mbwe mfen, mbwe tse ghafà ntage, mba mbwe neta fenfen tse. Bu Tshùaben Nsi z'a be num àm nke ntshagt'àm nà lo fà fènntù me, me tse'te fenfen Israél, ndù bag à bo tamte nène.