Esdra 6 - NTSHOB NSI

Mbùnte ze mfen Darius na' mfà là

¹ Ndùlala mfen Darius tshob bo diag ntùm ṅwa'ni ngô ndà, dù' bo ke njab tshunkàb bwe Babilon nà.

² Bo tèt mo' ṅwa'ni nebote Akmeta, tètla' diba taṅ ngô Medi, ndù bo kite bwe ndù:

³ Num mbwe ngu'njù fen mfen Kirus, a tshob mfà num ba' Nsi z'a be Yérusalém nà ndù: A bwô ndù bo bèn nkul i à be dù' ze bo ghù mfà tshule'te bwe là. A bwô ndù bo ma' tun i kua' mebwô. A bwô yen ba' là nèn tù mbu ṅam ntat, bam se ghù mbu ṅam ntat,

⁴ nka ndoṅ netshua'te ntat bo ta' nka ntù nswe. Nkàb sen fa' là nsi tum à ndà mfen.

⁵ Ntôg ndùlala, bo bèn mfà tshundà gol bo silba tse Nébukanetsar na' nket ndà Nsi Yérusalém nèn yi Babilon nà. Bo nsi bèn yab tshen tshundà là ntùm ndà Nsi Yérusalém dù' z'a na' nto' ke mbe là, ntùm ndà Nsi.

Netsho' ndà Nsi bo bèn nkut là

⁶ A bwô ndonni ndù Talnai, ngomna mo' yoṅ ta'ntse, Shetar-Boznai boa shun tshob Afarsak tse bo ke ntswe mo' yoṅ ta'ntse là, tsin à tà ngùanesà num yen dù' là.

⁷ Bin faṅ bo lo' mfa' yen ba' ndà Nsi là nèn yi mbwe. A bwô ndù ze ngomna ba Yuda boa tshob ghakwé mbwe bèn nkut yen ba' là be kua' num ko' tse i.

⁸ Tshù mba bin nsi ke ghù num ghakwé mbwe ba Yuda, num yen ba' ndà Nsi là ze bo tshwèt nkut li: Nkàbfa' nsi ke tum à num tshu mfen, num ntshub ts'a fe mo' yoṅ ta'ntse là. Bin nsi ke fà yen nkàbfa' là tshen ben nà ndaṅndaṅ, ndùlala ndù kà mfa' tsin.

⁹ Bin ke mfà tshu tse bo ton Nsi z'a ghù kamànyam nà, bon ntshàb mfot mfô, nkomnjù boa njùmbwe, mbab bàn, ngwa, ndu' bo mfèt. Bin nsi ke fà be njoṅ mba bo bètte là, nke mfà tshen tshu là ghale'te tse bo Yérusalém nà, nke mfà bo mba num sit lé'njù lo ke tag.

¹⁰ A nsi tshùa ndùlala bo fà tshule'te tse nelamte Nsi z'a ghù kamànyam nà, mbèn nke nde't'é num yôg mfen mba se nshumnshum tse.

¹¹ Tshù nu z'a nsi tsho mèn z'a fànte men ntshù' là li: Bo nsi tsho' saṅ num ba' ng'é, te tù taṅ i num bwe, bèn lo' ba' i ghù fèt nenà yi.

¹² A bwô ndù Nsi z'a te lén se num yen dù' li là, ma' mba zit mfen no, ke zit ngô lo z'a bù' bu i nsi nefàn ntshob màm men ni, num nesate yen ba' Nsi li Yérusalém nà! Me Darius bèn ntshob ndùlala, nke mbètte ndù a be ndùlala, kà ju tsi bwe.

¹³ Tatnai, ngomna yen yoṅ ta'ntse li, Shetar-Boznai boa shun tshob zin à kua' mba mfen Darius kite ntum bo là, kà ju ke tsi bwe.

¹⁴ Ghakwé mbwe ba Yuda kut ba' kua' mba ghatshob ntshob Nsi Hagai bo Sakaria nshum Iddo na' ntshob là, sàm ju ke sag yube; bo kut ba' kà miagte ndaṅndaṅ mba Nsi Israél na' ntshobe, Kirus, Darius, Artasastia, fenfen Persia bèn ntshob là.

¹⁵ Ba' mi num lé'njù tat ntùm ṅwù Adar, num mbatte ngu'njù ntôg mba Darius be num fen nà.

¹⁶ Bon Israél, ghale'te boa ben Lévi mba tshé' benntùn tse bo tum kuan nà tsho' yen ba' Nsi là ntùm tsiaṅte.

¹⁷ Bo fà tshu num netsho' yen ba' Nsi là njoṅ ndù: Mfot mfô nkù, nkomnjù nkù bàa, njùmbwe nkù kuà, mbèn mfà mfot mbwe ntshob bàa gham num nelagte nukebwô njoṅ ze tunndà Israél tse ntshob bàa gham be là.

¹⁸ Bo yabte ghale'te nkanka, mba tsit lo num sub laṅ se, njabte ben Lévi ndaṅndaṅ mba bo lo' ngabte yub yi là, ndù bo ke mfa' Nsi Yérusalém, mba bo kite ntùm ṅwa'ni Mosé là.

Bon Israél jù jùa Pasa

¹⁹ Ben tse bo fe ndà kuan nà jù Pasa num mbatte lé'njù ntshob kuà gham ntùm mbwe maṅwù.

²⁰ Ghale'te boa ben Lévi lànte wut yub ke faṅ sàm mèn; njoṅ yub fa tù' ben nelàne. Bo se tô nyàm Pasa num tu njoṅ benntùn fa tse bo fe ndà kuan nà, num tu tshob ghale'te mba kua' num yub tu.

²¹ Bon Israél tse bo fe ndà kuan nà jù tshu Pasa boa njoṅ benntùn tse bo tum num tshu ṅu' ntumntum tse bo ntùm ngô, ntsho num bo ndù boa bo tamte nke ndiag Tshùaben, Nsi Israél là.

²² Bo jù bàn ke te ywibte se ntùm tsiaṅte, num lé'njù sammbàa. Nummbe Tshùaben lo fà tsiaṅte bo, njab mfen Asiria a tomte yub num fa' nekut Ndà Nsi, Nsi Israél.