Esaya 9 - NTSHOB NSI

Mén mfen fite

¹ Ngô z'a na' mbe ntùm njam nà yen mà làne ndùb; mo' làne ké' num ben tse bo na' nke ntswe ntùm ngô njam vùkob là.

² Wù Tshùaben, o ghù ngô yàm neshu, o bam yi ndù a be ntùm tsiaṅte. A tshwèt ntsiaṅte mbwe o mba bo num ntsiaṅte num ngelaṅ netsho' tshu là, nke ṅwate mba bo num ṅwate num ngelaṅ neghabte ntsha' ntsho là.

³ Nummbe lèt z'a ke mfél i, shua' s'a ke ndab mvèn i, bo zwit mèn z'a ke ngùtni i là, o be'te tshen tshu là, mb'a na' mbe num se lé'njù Madian vù ntsho là.

⁴ Nummbe bo nsi ma' mba sit keto' lo se soyé so tshwèt ntsho, ma' mba zit nzwe lo z'a nyu' ntùm lem nà ntùm lambwôg, mbwôg kù njoṅ i fa.

⁵ Tshù, bo bwe ta' mén mandum be. Nu netô njù b'a ntùm mbu mi. Bo nsi ghù tsiaṅ i Mèn neghamte, Ngafà ntage, Nsi neta, Tà z'a tswe matmat là, Mfen fite.

⁶ Nufen se nsi b'a ze ndùb, fite ke ndù i be num diaṅkwa tà njam i David bo nufen se. Tshùaben nsi te nufen se bèn tomt'é njam nu ndaṅndaṅ bo nunetsine, ndonni kà nèn miagte A b'a ju ze nkôni Tshùaben tàndà ntsho nsi ghù là.

Yantù Tshùaben num ben tse

⁷ Tshùaben tshob ta' ntshob num Yakob, mbe ndù men ntshob là nsi vù num Israél.

⁸ Ngô nsi lèn men ntshob là, Efraim mba ben tse bo num ntswe Samaria là. Me tshob a ben tse bo be ndo' ko'tewut bo ka'te nke ntshob yi ndù:

⁹ Tsha' nebom vùte nsi, bag nsi lo' ndoṅ netshua'te kà kut dù' yi là; nke ntshob ndù: Bo keb ba fènngab, bag nsi bwe sédra num dù' yube.

¹⁰ Ndùlala Tshùaben kamte ghakeban Retsin num bo, a nsi fà tshuntshùag ghakeban tshobe;

¹¹ me tshob à ba Siria tse bo ntumnyam nà; boa ba Filistia tse bo mbinyam nà; bo nsi mi Israél à nemi. Mba tà ndùlala, ntù i ke' yoṅ mfite, bu i ke' à be nenyile.

¹² Ngô ke' be bèn mbaṅ mèn z'a lab i là, ke be diag Tshùaben tàndà ntsho.

¹³ A ndùlala Tshùaben nsi tsho' tu Israél bo nkun i, tsho' tshaten bo nka'nesoṅ num ta' lé'njù ntshù'.

¹⁴ Nkwé mbwe bo ngakeb ntsha b'a tu, ngatshob ntshob Nsi z'a tshwèt ntswite tatte là be nkun.

¹⁵ Ben tse bo tshwèt ntshagte yen ngô li ke ntshag i à num manze nebi, ben bo bam ndù bo ntshagte yub là nke mbi à nebi.

¹⁶ A ndùlala ze Tshùaben ke' ghù netsiaṅte num tshob nshumnshum, ke ghù kondèn num tshob bontse boa tshob fôg bènnzwi là; njoṅ yub fa b'a ben kebwô, mbe ghatshùagntù; njoṅ ntshu fa ke ntshob a be tshu ts'a ke' bwô là. Mba tà ndùlala ntù i ke' yoṅ mfite, bu i ke' à be nenyile.

¹⁷ Nummbe tshùagntù b'a mba mbwôg z'a be nkù ta' kub fèn, dù' ze bwoṅ nzembwôg num ndo là.

¹⁸ Ngô lo' mbwôg njam yantù Tshùaben, tàndà ntsho. Ngô tù' ke ntsham à nka'. Mèn ke tshwèt nko ndèn mfèl i.

¹⁹ Mèn tshwèt ndag ntsha' bu zwim, nziku' nke nja i, nke mi ju bu kwéb, ke ke njwèle, mba we lo netèt bo tshwèt mfèt mbàb wut mfèl i.

²⁰ Manasé tshwèt mi Efraim, Efraim nke mi Manasé. Ntu tshob bàa fa tsho' ngwù mum Yuda. Mba tà ndùlala ntù i ke' yoṅ mfite, bu i ke' à be nenyile.