Esaya 7 - NTSHOB NSI

Nkùn Tshùaben num mfen Akaz

¹ A lo be num ze ngelaṅ Akaz nshum Yotam, nshum Ozias, mfen Yuda, Retsin mfen Siria ko' bo Pékash nshum Remalia mfen Israél, nèn nema' Yérusalém ntsho lo' i; nda' ndù bo ke ku'ni nema' i ntsho kà ndo' i.

² Bo nèn nsoṅ tunndà David yen nu là, ndù ba Siria te mbàn Efraim. Ntù Akaz bo ntù ngô i nyi'te ndaṅndaṅ mba fetmbaṅ be nyi'te ntù fèn nà.

³ Ndùlala Tshùaben tshob Esaya ndù: Bin nshum o Shear-Jashub nèn mbumte bin à Akaz tu kuntse z'a be num diaṅnkat ntse mi a mfe tu, num manze tôtsha' là,

⁴ ntshob yi ndù: Tswe ndù kam, ke bwôg sàm ju. Kà ntù o tam mbwe tshen nesèn mbwôg bàa ts'a tshwèt ndam nze là. Kà bwôg yantù Retsin bo ze nshum Remalia.

⁵ Kà bwôg mba Siria tshwèt nkwa kebwô num o là, ke bwôg ju ze Efraim bo nshum Remalia tshwèt ntshob là.

⁶ “Bo tshwèt ntshob ndù: Be ko' nèn num Yuda, ndo' tusô, ndab tshu fa nsate, ndo' nshum Tabéel ngom fen yi bwe”.

⁷ Tshù mba Tshùaben Nsi tshob li: Yen nu là ke nsi bumte.

⁸ Nummbe Damas bèn mbe tètla' Siria, mfen Retsin be tu Damas. Tshù, a tù' ngu'njù ntshob tàn ṅam ntôge, bo be ke bèn nsiaṅ Efraim mba ta' nzwit mèn nà.

⁹ Samaria bèn mbe tu Efraim, nshum Remalia be tu Samaria. A be ze bin ke' bam yen nu là là, mba bin ke nsi be ntùn.

Bo nsi bwe ta' mén tswi lén se ndù Emmanuél

¹⁰ Tshùaben bèn ntshob Akaz ndù:

¹¹ Bètte Tshùaben Nsi o ndù a ghù ta' nsa tum mà nsi ntùm gheme, ke tà mfe kamànyam no. Là Akaz bùnte ndù:

¹² Me ke nsi bètte sàm ju, me ke nsi laṅte Tshùaben.

¹³ Esaya tshob ndù: Tunndà David, yen njoṅ nema'ni benntùn nà ke' ku' ndùlala ké? Bin nsi ma'ni mba Nsi ké?

¹⁴ A ndùlala ze tu wut Tshùaben nsi fà ta' nsa bin nà. Tshù nsa mbit li: Ménngon nsi be jùm, bwe mén mandum, tswi lén se ndù Emmanuél, yen nà bagt'a ndù: Bag à bin Nsi bèn mbe.

¹⁵ Jujù i nsi b'a mbùn mi a kut là bo ṅwa'a, tà nkum ndùs'a nsi lèn neghua' nukebwô lo' numebwô là.

¹⁶ Nummb'a nsi be kum ndùse mén lèn neghua' nukebwô lo' numebwô là, ndù bo a sate ngô z'o tshwèt mbwôg fenfen bàa num bwe là.

¹⁷ Tshùaben nsi tshùa njam mfen Asiria ghù nge' tsho num o, num ngô o bo tunndà tàan. Lé'njù tse kebwô, ts'a ke' to' bèn mbe fe ndùse Efraim sô wul i num Yuda là nsi be.

¹⁸ Num yen ngelaṅ nà, Tshùaben nsi tô nta lo' tsiaṅ nzenze tse bo be yoṅ nta'ntse mi a be Egipto là yi boa ṅwa' tse bo be ntùm ngô Asiria là.

¹⁹ Bo nsi se' naṅ num dù' ts'a bùnte là, naṅ ntùm ntô ngabndoṅ, naṅ num njoṅ ntswe'ntù fa mba num njoṅ ntswe' nenà fa.

²⁰ Tshùaben nsi lo' shua' s'a lon yoṅ ta'ntse sen shua' là b'a mfen Asiria. Là kom tu zine, nyiaṅ nku min mba nyiaṅ ntshu tsin yi.

²¹ Mba zit mèn no nsi kag ta' mfô boa mbwe bàa num yen ngelaṅ nà.

²² Bo nsi fà mbùn, benntùn ke mfèt mbùn mi a kut là bo ṅwa'a, nummbe benntùn tse bo nsi yôg là nsi ke jù à yi ntùm ngô.

²³ Num yen ngelaṅ nà, njoṅ dù' tsha' fa z'a ghù ntù ndu' ntsha' mbùm, nke ntsho ndô nkàb ntsha' mbùm nà, nsi ghô ntùm njô boa kwékwénàndô.

²⁴ Bo nsi lo' nkét bo ngonkét nèn yi bwe; tshù, njô boa kwékwénàndô nsi lo' ngô.

²⁵ Mèn ke nsi bèn nèn num mbat ze bo ke ndo' sofa' ndù' yi là, nummb'a nsi bwôg njô boa kwékwénàndô; nda' ndù bo nsi nèn nyàmna' bwe bo fèt nenà; mbwe nsi nyiaṅte yub nku.