Esaya 60 - NTSHOB NSI

Ghamte Tshùaben num Yérusalém

¹ Lo nsi, be ntùm nelàne, nummbe Tshùaben nà z'a tum netèl o là.

² Tshù njam nà z'a kabte tsha' là; nesènte kabte ntumntum. Là, Tshùaben lo nsi num o, nkuni mi tswite wul i num o.

³ Ngôngô ke nzin à mum nelàn o, fenfen nke nzin ntùm nelàn mu nkô nyam.

⁴ Ma' miag mu mbaṅ o ndôte njene: Njoṅ yub fa tamte nke nse' mbaṅ o. Tshù nshumnshum tsho là ngùanesà nke nse'e. Bo ket ngonngon tsho nkembe', nke nse' yi.

⁵ Ndùlal'o nsi ṅwate, tsiaṅte, ndùse ghankàb tse bo num dibantse nsi kaṅ se tèl o là, ndùse tshunkàb ngôngô nsi se' wù là.

⁶ Ta' bwoṅ kamél nsi kab num o, ba nyàm neket tshu yi, tse Madian bo Efa; njoṅ yub fa nsi fe à Séba; bo nsi ket gol bo la nelamte. Bo nsi sa ghamte Tshùaben njoṅ dù' fa.

⁷ Njoṅ bwoṅ nyàm Kedar fa nsi tse'te la' o. Nkomnjù Nebajot nsi ke fa' wù. Bo nsi ko' num tômbwôg sàm, me yen yub lag mebwô. Me nsi ke ngamte ndà nkuni màm.

⁸ A ba we là tse bo tshwèt nèn mba ndot, mba ba bwoṅtambia' tse bo tshwèt nèn nkàn à?

⁹ Nummbe ngô ts'a tètntse là tshwèt nywinte num àm. Nsitima Tarsis bèn nkwé mbwe, num nelo' bon tsho ngùanesà mbèn yi njam, boa silba yub, gol yub. Yen nà fa b'a num lén Tshùaben, Nsi o, num lén Mèn Nelàn Israél, z'a be ngamt'o là.

¹⁰ Bon mfàm nsi kut nkummba' mu; fenfen tshob nsi be ghafa' tsho; nummbe me lo lab o ntùm yantù àm. Là, me tshùa njam kondèn àm, ntshàm ndèn mu.

¹¹ Tsho nzendà nsi ke te à be nge. Bo ke nsi tam yub tu, ke mbwôgtshù ke njam no, ndùlala ndù bo faṅ tshunkàb ngôngô tsho, fenfen tshob boa ben bo njam bo là.

¹² Nummbe ngô ke nufen no tse bo ke nsi fa' wù là nèn yub là. Bo nsi biagte tshen ngô là.

¹³ Ghamte Liban nsi se' la' o. Tshalone, nga'lon bo tshame, bo nsi tamte njoṅ i fa lo' so ngùa yi num dù' àm ze nelàne. Me nsi nyàmte dù' nelàne. Me nsi nyàmte dù' ze nku màm be nte là.

¹⁴ Nshumnshum ghafétt'o nsi se' vù nsi mbwe o, njoṅ benntùn fa tse bo ke ngwag o là vù num nku mu. Bo nsi tsiaṅ o tusô Tshùaben, Sion Mèn Nelàn Israél.

¹⁵ Dù' ze bo na' ngua' o bwe, nkembàn be nsi, mèn ke netshùa bwe là, me nsi lo' o bwe ghù ju kwi wut yi z'a tswe matmat là. Ju z'a ke fà tsiaṅte ngu'ngu' là.

¹⁶ O nsi fin mbùn ngôngô, o nsi fin mbùn fenfen; o nsi lèn ndù me b'a Tshùaben, ngayôg o, ngatshu' o, ze mèn neta Yakob.

¹⁷ Me nsi lo' silba se' yi num ze dù' tùn meba; me nsi lo' silba se' yi num ze dù' tùne; me nsi lo' tùn meba se' yi num ze dù' ntshwèn; me nsi lo' tùn se' yi num ze dù' ndoṅ; me nsi ghù fite se ka netèl o; nunetsin ke mbèn ntô.

¹⁸ Bo ke nsi bèn tshob nu nefètte lem ntùm so la', ke nesate dù' ke fam no ntùm tsho tsha'a. O nsi tswi lén mu nkummba' ndù yôg, ntswi lén ba nzendà ghamte.

¹⁹ Lagnyam ke nsi bèn mfà nelàn wù mbwôgtshù, maṅwù ke bèn nké' nelàn i num o: Là Tshùaben nsi bèn be yu nelàn z'a tswe matmat là, Nsi o nsi be yu ghamte.

²⁰ So lagnyam ke nsi bèn bi tse, yu maṅwù be ke bèn ntam njame. Nummbe Tshùaben nsi be yu nelàn z'a tswe matmat là; lé'njù vù so nsi mi.

²¹ Nda' ben netsin nsi bèn be netèt yu nzwit mèn; ngô nsi tù' à yub matmat. A b'a metob tù se me bèn mbwe là, a b'a fa' mbu màm, a b'a num ghamt'àm.

²² Metsil i nsi bwe tse ntsha'ntsha', fùag i fà ta' ngô z'a ta neshu là. A me Tshùaben bèn ghù tshen tshu là kua' num ngelaṅ i.