Esaya 57 - NTSHOB NSI

¹ Mèn netsin tshwèt mbi, bo ke yen mba nu là, ben kebwô tshwèt nène, sàm mèn ke te lag num yen nu là. Ndù bo lo' a tshùagntù kà nta' mèn netsin yi.

² A tshùa num nukebwô, mèn netsin nèn, ntsho tse ntùm fite. Ben tse bo na' ntshùb manze ndaṅndaṅ nà tshwèt mfite num kunndà sobe.

Tshùaben te bu num ba ghamte neto

³ Mba bin nà, bin ghebte nsen ni me bon mènnzwi z'a be ngaka, bin tse bin be nzwit màndà bo kattù mènnzwi là.

⁴ Bin ke ntshabt'a we? Bin ke nyamte se, nke nsô lém sin à num we? Bin ke' b'a bon nukebwô, nzwit tatte ké?

⁵ Bin be njab nu ntùm ba nke' mfèn térébintô bo bam ntù fi. Bin be nke nse ntô bon ntùm mfube, ntùm ngabloṅ.

⁶ Yu dù' b'a mfé' ndoṅ netshua'te mi a ntùm mfub là. Ṅ, tshù yu dù' là. A bwe là z'o be mfà tshu bwôntù là. O kwate mbe yen nu là ke toṅ àm ké?

⁷ O ke ma' kunndà so à num ta' nesà mbat z'a nèn tù là. A bèn mb'a bwe là z'o ke nko' mfà tshule'te là.

⁸ O be njab neto o njam nzendà boa mbatndà; nummb'o be ntsin ngùanesà mbaṅ àm, mbùn nzwe ngua'a, nko'o. O be nsate wul o num kunndà so, ngwat kàn bin à bo. O be nkô mub ntàne, nke ntsho' yu dù' bwe.

⁹ O be nèn mbaṅ mfen bin mfèt, nke ngù mfèt nelamte nke njàme. O be ntum ba ntum ngùanesà. O be nswe' tà nkum ngô fe ben.

¹⁰ O be mbe zin neshu mbole, ke ne ntshob ndù: Me gha yen nu là. Neta neke' ntùm bu o, a ndùlala o ke tshwèt mvètte.

¹¹ O na' nke mbwôg à we? O na' nke mbwôg à we kà ntù' ngatatu, kà mbe ke nekwimte, kà mbe ke nelo' àm tsho mba ju à? Mo' ndù a b'a mba me na' mbe ke tshob nu, mem miag màm nà, bèn ngù k'o ke bwôg àm tsho.

¹² Ndonni m'a' la'te yu nunetsine, mfa' mu ke nsi ywimt'o sàm ju.

¹³ O nsi kua'a, là bwoṅ neto tsho ke nsi ywimt'o. Fetmbaṅ nsi ket yub nèn yi, ywèt ntshu nsi tèn yub nèn yi. Là, mèn z'a yab ntù i num àm nà nsi ghù ngô, a be ju ntsi' i. Mbal àm ze nelàn nsi b'a ju i.

Tshùaben ka' mb'a nsi fite ntù ben tse bo kaṅ ntù yub là

¹⁴ Bo nsi tshob ndù: bin nabte manze, bin zwiagt'é. Bin lo' tshu ts'a tshètte manze yàm nzwit mèn nà.

¹⁵ Nummbe Mèn z'a tà mfe tù là tshob nu. Yi ze dù'ntswe i be matmat, lén se be se nelàn nà tshob ndù: Me ke ntswe à ntùm Nelàn àm, ntùm dù'ntswe z'a tà mfe tù là. Là, me num ntomte ngayennge' z'a be ntùm ntobni là. Me num nse' mfùag ywèt tshàm num ben nebétni, mbù'te fènntù ben nebole.

¹⁶ Ndonni me ke bèn nke nga be negha, ke bèn nke nja ntù nèn be mbwe. Nummbe mba nzwiag bo benntùn tse me na' nabte là nsi miagte bite mbwe àm.

¹⁷ Me lo tshùa njam nukebwô yàm nzwit mèn nja ntù mo' mén ngelaṅ. Me lo lab i, mféme, ntsho' lag num i. Me lo ya ntù: Ndùlala ngatatu nke nta tu nèn be mbwe num ze manze.

¹⁸ Me yen nzin mi, mbe ndù m'a' yat'é. Me nsi tshagt'é, fite ntù i boa ben tse bo à bo be nsi là.

¹⁹ Me nsi yab nenyàmte num nkub ntshu mube, bo ke ntshob ndù: Fite, fite be mèn z'a ngùanesà bo mèn z'a ghebte là.

²⁰ Là, ghatshùagntù b'a mba dibantse z'a kamte là, z'a ke' ghù netswe ndù kam nà, ze ntu' koṅntse be nkamte lab bo netob là.

²¹ Fite ke zi mbe ghatshùagntù. Nsi àm bèn ntshob ndùlala.