Esaya 54 - NTSHOB NSI

Tshùaben bèn mfon nzwi i Yérusalém

¹ Tshag nz'o tù me kebwe, wù z'o ke' bwe mén nà; fà là so tù ṅwate, wù z'o ke' bwe là; nummbe bon mènnzwi ze bo ghua' i là nsi yàm gha' mbu, tshùa tse mènnzwi ndu. A b'a Tshùaben bèn ntshobe.

² Gha'te dù' ntàb o, nyitte nzwe ntàb, kà bwôg, soṅte nkù, gha'te nsaṅ ntàb,

³ nummb'a bwô ndù o kù'te, nèn bu zwim mba bu kwéb; nzwil o nsi sa ntùm ngôngô, tete ntùm ntusô mi a be fam nà.

⁴ Kà bwôg, nummbe tuswe ke nsi ko o, kà tuswe ghom o, nummbe bo ke nsi tam mbèt num yu nu. Là, o nsi lag tuswe nguanmèn z'a ke nko o là, be ke bèn nekwimte ntshabte z'a be ntùm bwe ngelaṅ fôg là.

⁵ Nummbe Mbom o bèn mbe yu ndu: Lén se b'a Tshùaben tàndà ntsho. Ngatshu' o b'a Mèn Nelàn Israél. Bo ke ntsiaṅ i à Nsi njoṅ nsitsha' fa.

⁶ Nummbe Tshùaben bèn ngù o bèn ndà mènnzwi ze bo ghua' i a nke nywin nà, mba mènnzwi nshum ze mèn so mbèn nsô i là. Nsi o bèn ntshob ndùlala.

⁷ A na' ngubte mba me ghua' o là, a tshùa num nkôni ze me ghù num o là, me nsi bèn lo' o.

⁸ Ngatshu' o, Tshùaben tshob ndù: Ntùm ta' ngelaṅ yantù, me lo tsho' se àm num o num mo' metsit ngelaṅ. Là, ntùm nkôni ze me ghù num o là, me nsi ko ndèn mu.

⁹ M'a' ghù ndonni a mb'a na' mbe num ze ngelaṅ Noa là: Ngù a mba me na' ntshob nsaṅlaṅ bwe ndù dibambaṅ Noa ke nelo' ntse nkabte njù nsitsha' yi là. Be ndaṅndaṅ me tshob nsaṅlaṅ bwe ndù me ke bèn neya ntù num o, ke bèn nekag fétwut num o.

¹⁰ A be ze ba mbat tsin mba tà ngùanesà, a be ze nkônga vètte mba nevètte là, mba nkôni àm ke nsi be ngùanesà num o, mba kàn sàm se fite ke nsi vètte. Tshùaben z'a ko ndèn mu là bèn ntshob ndùlala.

¹¹ Njennge' mba wù, ze fetmbaṅ sé't'o, mèn ke fite ntù o là, me nsi lo' a ndoṅ jaspé kà kul o yi, lo' a safir kà ma' tun o yi.

¹² Me nsi lo' loṅ rubis kà te ntô ndà mu yi. Me nsi lo' loṅ tanjoṅ kà te nzendà tsho yi, lo' ndoṅ mi a ta njoṅ nà ma' yu dù' nema' ntsho.

¹³ Njoṅ ba la' tsho fa nsi be ghazi'te ntshob Tshùaben. Nzwit ba la' tsho nsi yàm neshu.

¹⁴ Nunetsin nsi tswe'te ntù o. A bwô ndù o biagte bwôg, nummb'o ke tshwèt ntshàm mo' ju. Biagte yu bwôg nummb'a ke nsi ghebte mbaṅ o.

¹⁵ A be ze bo tsin tsham num o là, mba yen nà ke' fe à me. Ghama'ni o nsi vù nsi à be mbwe yu tu wut.

¹⁶ A kua' me bèn nabte tàlàm z'a be mfette nge'mbwôge, ntswe tshuntshùag bwe ntùm ve i là. A bèn mb'a be me bèn nabte ngasate z'a nsi se' bagte tshen tshuntshùag là là.

¹⁷ Mba zit juntshùag lo ze bo tswe num o là ke nsi ghù sàm ju; mba sit lém no s'a lo nsi nebot'o là nsi vù ntsha mbwe o.