Esaya 52 - NTSHOB NSI

Tshùaben a' bèn nse' Sion

¹ Sion, bame, bam num miaglo. Ma' tsho kwi wut num o. Yérusalém ngô nelàne, ma' tsho nzwe jùa! Nummbe kesiket ke mèn nesagte lo ke nsi bèn ndà o.

² Tshwètte mbab mi a bom o là, lo nsi me Yérusalém, bèn ntswe so diaṅ; ké' nkù ts'a be tô o là me Sion, wù z'o be nkuan nà.

³ Nummbe Tshùaben tshob ndù: Bo na' nswèn zin à ke kwé ju. Bo ke nsi bèn lo' à nkàb kà jun zin yi.

⁴ Tshù, Tshùaben Nsi tshob ndù: Nzwit mèn àm lo swe' nèn Egipto mbwembwe, num netswe bwe. A be ngelaṅ mànjam ze Asiria fétt'é banban.

⁵ Tshùaben tshob ndù: Ndonni ze me ghù b'a ke, mba bo na' ndo' nzwit mèn àm nèn yi banban à? Tshù, ghatô yub tshwèt njob ngu'u, nke ntute lén sàm njoṅ lé'njù fa ke tsin. Tshùaben bèn ntshobe.

⁶ A ndùlala, yàm nzwit mèn nsi lèn lén sàm; a ndùlala, a nsi lèn sen lé'njù là ndù a b'a me bèn ntshobe, mbe ndù me tshob yi ndù tshù me li.

⁷ Nku mèn z'a tshwèt ntshob nu num fu' là nebwô mfe num tu ba mbal à! A lo' nkùn mebwô nse' yi bo tshô netshu'u. A tshob Sion ndù: Nsi o tshwèt ntô.

⁸ Ju' mbe tsho ntom tshag nze yub tù, ntamte mfà là sob tù ntùm tsiaṅte, nummbe kua' miag mub bèn njen mba Tshùaben tshwèt mbèn njam Sion nà.

⁹ A bwô ndù fam Yérusalém bèt zwi ntùm tsiaṅte, nummbe Tshùaben ko ndèn ze nzwit mèn, a tshwèt ntshu' Yérusalém.

¹⁰ Tshùaben bù' bu i ze nelàn nsi num miag njoṅ ngôngô fa, mbe ndù njoṅ ntôg tsha' fa nsi yen yôg s'a fe Nsi be là.

¹¹ Bin nène, bin nène, bin tum bwe; kà bin kwag sàm ju z'a sagte là. Bin tum netèl i, bin lànte wut tsine, bin tse bin num nket ntu' Tshùaben nà.

¹² Nummbe bin ke nsi be nèn ke nànte, bin ke nsi be nèn kù a nekù, nummbe Tshùaben nsi tsin mbwe bin, Nsi Israél tshèt njam ndùse bin ke zin nà.

Ngafa' Tshùaben yen nge' ma' ntshùa

¹³ Yen mbe ngafa' àm nsi sine, ku'u; a nsi zi, bo nyàmt'é.

¹⁴ A be ze ze nebe na' nkag bwôg num benntùn yàme, num mba ntshù' mi na' nkaṅe, bo ke bèn ngù nelèn i, nummb'a lo ke bèn nefute benntùn nà,

¹⁵ mb'a nsi ghù ndù ngôngô tsiaṅte, fenfen tswe ntshu mi' mbwe i. Bo nsi yen ju ze sàm mèn ke' to' soṅ yub là. Bo lôte ju ze bo ke' to' yen nà, a be nu netshàme.