Esaya 51 - NTSHOB NSI

Tshùaben so ntsha mum ntù benntùn, tse bo diag neyôg mà Sion nà

¹ Bin tse bin tshwèt ndiag nunetsine, nke ndiag Tshùaben nà, bin ju'u. Bin te lag sin num gholoṅ se bo sô zin bwe là, nte lag sin ntùm tô dù' ze bin na' ntum nà.

² Bin yen tà zin Abraham bo mà zin Sara z'a bwe zin njene! Nummbe me na' ntsiaṅ Abraham à ndùs'a na' nke' à tù' i là. Me lo tam ntse yi, ngù nzwil i yàm.

³ A ndùlala, Tshùaben nsi fite ntù Sion, a nsi fite ntù i mum dù' tse ts'a tù' fam nà. A nsi lo' ze kônkwa kaṅ ta' Edèn yi, lo' fam i ghù ta' nka' Tshùaben yi. Bo nsi ju' tshu'te tsiaṅte bo ṅwate netèl i, ju' nkwi nyàmte boa nkwi mi a tum ntùm njobnkwi là.

⁴ Yàm nzwit mèn, wù z'o be yàm ngô, a bwô ndù o kù' toṅ nju'u, a bwô ndù o fà toṅ o me. Nummbe ntshù' nsi fe à me. Me nsi te ntshù' àm, a bèn mbe nelàn ngôngô.

⁵ Yàm nunetsin ghebte, yôg sàm tù' neṅwage. Mbu màm nsi tsho'te ngôngô. Ngô ts'a tètntse là nsi nywinte num àm, bo nsi yab ntù mum bu àm.

⁶ Bin bù' miag min mfe kamànyam, bin lôte num nsitsha'a. Nummbe kamànyam nsi sate mba nzembwôg là. Tsha' nsi vù mfémfé mba nzwe là; ba la' tse nsi vùt'a mba nzenze là. Là, yôg sàm nsi tswe matmat, yàm nunetsin be ke ghù ndù i.

⁷ A bwô ndù bin tse bin lèn nunetsin nà ju' àm, wù nzwit mèn z'o ghù ntshù' àm ntù o là. Kà bin ghù tuswe z'a fe à benntùn nà, ke vètte mbwe tshabte tshobe.

⁸ Nummbe mbàn nsi fèt yub mba nzwe là, bangùa jù yub mb'a ke njù tùn nà. Là, yàm nunetsin nsi tswe matmat, yôg sàm tswe ngu'ngu'.

Netsiaṅ Nsi ngayôg benntùn

⁹ Bu Tshùaben, bame, bam num miaglo! Bam mb'o na' nke mbam num tsemo' lé'njù, mbwembwe là, mum ngu'njù ts'a tswe neshu là. A ke b'a wù na' mbèn nkôg Egipto mfà nsi ké? A ke wù na' mbèn nsobte ngamnyu ké?

¹⁰ A ke wù na' ngù dibantse jumte ké? A wù na' ngù ntse mi a ghem nà jumte. A ke wù na' nto nze netèt dibantse ndù ben ts'o tshu' yub là tshùa bwe ké?

¹¹ A ndùlala, ben Tshùaben ts'a tshu' yub là nsi bèn njam. Bo nsi be nèn Sion ke yob ngu'u; tsiaṅte z'a tswe matmat là nsi kabte tu yube. Ṅwate bo tsiaṅte nsi ghebte, ya bo netsham zwe kù nène.

¹² A b'a me, a kua' me bèn nke mfite ntù tsine. O b'a we kà nke mbwôg mènntùn z'a be nkwù, mén mènntùn z'a be mba nenà l'à?

¹³ B'o lag Tshùaben z'a na' mbom o, z'a nyitte kamànyam, z'a te tsha' nsi là ké? Ndù o a' ke mvètte njoṅ ndù fa mbwe yantù ngafétt'o mb'a tshwèt ndiag nesat'o là ké? Ndùlala yantù ngafétte b'a yà?

¹⁴ A tù' mén nda'nda' bo tshu' mèn z'a be ntùm mvèt tùn nà; a ke nsi kwù ntùm tô. Jujù ke nsi bwoṅe.

¹⁵ Me b'a Tshùaben Nsi o, z'a be nkamte dibantse, ngù ntu' ntse nke ntshu' là. Lén sàm b'a Tshùaben tàndà ntsho.

¹⁶ Me so ntshob màm ntshu o, ndo' netshaṅ bu àm nkabt'o yi, num nete kamànyam nswe, bo tsha' nswe, mba netshob Sion ndù: O b'a yàm nzwit mèn.

Tshùaben a' bèn mbù' Yérusalém tù

¹⁷ Yérusalém, bame, bam num miaglo, lo nsi. Wù z'o nu ntu' yantù z'a tum bu Tshùaben, wù z'o fin ntu' là tà nkum bwe tse ts'a be nshùmte miag mèn nà.

¹⁸ Num njoṅ nshum fa ts'a ghù là, mba ta' i ntshù' ke' soṅte bu i, num njoṅ bon fa ts'a kwiagte là, mba ta' i ze ntshù' ke' tshùb bu i ntshagt'é.

¹⁹ Tshen nukebwô bàa li lo tsho o, we z'a tshàm o mba nda' netshàm à? Bo lag ntsha' o, o tù' fam. Nziku' bo ṅwi vù netèl o. Be we fite ntù o à?

²⁰ Bon tsho kôge, ngwùte num ntôg manze, mba njuanyàm ze nkù ghom i là. Yantù Tshùaben kab mbu num bo, Nsi o bèn nke nshùte bu ntshu mèn.

²¹ Njennge' mba wù là, kù' ntoṅ nju'u, nummb'o bum ndu' ke be ndù o nu.

²² Tshù ju ze Tshùaben o, Tshùaben Nsi z'a tshwèt ntshètte nzwit mèn i tshob li: M'a' kwé ntu' z'a num mfà shùmte miag là bu o. M'a' kwé ntu' yantù àm wù, o ke bèn nenu i.

²³ M'a' fà yen ntu' là bu ghafétt'o tse bo ke ntshob ndù: Ben tu o nsi bag tshùa là! Nummb'o lo ke ndo' mvèn o ngù tsha' yi, a be mba manze ze benntùn ghù netshùa bwe là.