Esaya 48 - NTSHOB NSI

Nsi tshwèt ntshobte ben tse num sagntù yube, là, ntam njam nunenùn num numebwô bo nka'ni num yôg sube

¹ Tunndà Yakob, bin ju'u, bin tse bin be ndo' lén Israél, ndù bin tum à ntùm ntse Yuda là; bin be ndo' lén Tshùaben nkàn mfe yi, nke ntsiaṅ lén Nsi Israél. Là, nunenùn bo nu ndaṅndaṅ ke be nsi!

² Nummbe bo lo' lén sob à num se tusô nelàne, nke njé't'a num Nsi Israél ze lén se be Tshùaben tàndà ntsho là.

³ Me lo à bùt tshu ts'a tôg là tà mbwe. A lo tum ntshu àm, me soṅ yen nu là, njoṅ mbèn ngù ndù a bumte.

⁴ Nummbe me lo lèn ndù o ghù ntù nesage, ndèn ndù kekol o b'a mba ta' tùn nà, mbunse o bèn mb'a mba tùn meba là.

⁵ Me lo soṅ tshen tshu là tà mbwe. Me lo tshob wù k'a njôg nse'e. Ndùlala ndù k'o tshob ndù: A neto àm bèn ngù yen nu là, a mfuni màm mi nekom bo mi tùn netswe bèn ngù tshen tshu là mbe.

⁶ O ju' à! Tshùb njoṅ i fa! Mba bin nà, bin nsi bam ndùlala ké? Ndonni, me ke nsoṅ o à nu nswe, ts'a leme, ts'o ke' lèn nà.

⁷ Tshen tshu là tshwèt ntum ndonni, a ke b'a tshu ts'a yà tôg là. A lo be tum ndù o ke yoṅ ndène. Ndùlala ndù k'o tshob ndù: Me lo à lène.

⁸ O lo ke yoṅ nju'u. Yen nu là lo ke yoṅ ntam toṅ o. Nummbe me lo lèn ndù o ke nsi be mèn nenùne, mba ndù bo lo à tsiaṅ o ngatatu fe lé'njù se bo bwe o là.

⁹ Me tshùb yantù àm num nu lén sàm. Me kabte yantù àm num nu nkuni màm, ndùlala ndù kà me biagt'o.

¹⁰ Me lo ma' o ntùm kab mbwôg mba tùn nà, là, ke b'a ndù me sô nkàb bwe; me lo laṅt'o ntùm ndà mbwôg laṅte.

¹¹ A tshùa num nkôni yàm tu wut, nkôni ze me ghù num tu wul àm nà, kà me mfa' ndùlala.

¹² Yakob, ju' me! Mba wù Israél ze me tsiaṅ o là! A b'a me, kua' me bèn mbe mbwe mèn. A b'a be kua' me bèn mbèn mbe miagt'é.

¹³ Bu àm bèn nte tsha' nsi, bu àm ze zwim bèn nyitte kamànyam. Me be ntsiaṅ yub bo tum ntsine.

¹⁴ Bin kùmte njoṅ zin fa nju'u! We z'a tum netèt bo nsoṅ tshen tshu l'à? Mèn ze Tshùaben num nkô i là nsi ghù ju Tshùaben kô là num Babilon, bu i nsi lèt num ba Kaldéa.

¹⁵ Me tu wul àm na' ntshobe, me lo tsiaṅ i. Me lo ghù a se', mbe ndù fa' se nsi vù lag.

¹⁶ Bin kù'te nse' mbaṅ àm nju'u! Me lo tshob nu fe neto'te, ke tshob à njamnjam. Me lo be nsi fe ndùse tshen tshu là to'te là. Ndonni Tshùaben Nsi tum àm bo Ywèt tse.

¹⁷ Tshùaben, ngatshu' o, Mèn Nelàn Israél, a b'a me Tshùaben Nsi o z'a tshwèt nzi't'o, ndù o tshùa num bwe njù bin nà. Me ke ntshagt'o à num manze z'a bwô ndù o zin bwe là.

¹⁸ Wù, o na' nkù' ntoṅ num ntshù' màm, mba so fen b'a mba ta'ntse là, mba fu' so b'a mba ntu' koṅ dibantse là.

¹⁹ Mba nzwil o b'a mba kwango' là, mba nzwit z'a tum zwe' o là b'a mba nkwango' là. mba bo ke nsi bwete lén so, ke biagte lén so mbwe àm.

²⁰ Bin tum Babilon, bin tum netèt ba Kaldéa nkù. Bin lo' a nze neṅwate nsoṅ yen nu là yi, bin sa i, ngù bo lèn tà nèn nkum num tôg tsha'a, nke ntshob ndù: Tshùaben tshu' ngafa' i Yakob.

²¹ Ntù yub ke nsi kù kônkwa dù' z'a lo' yub tshùa yi bwe là. A nsi ghù ntse tum bo num gholoṅ. A nsi ghù gholoṅ bèle, ntse swe' bwe.

²² Fite ke nsi be ghatshùagntù. Tshùaben bèn ntshobe.