Esaya 47 - NTSHOB NSI

Babilon nsi vù nsi

¹ Tusô Babilon, wù z'o b'a mba ménngon ze bo ke' tabt'é là, swe' num diaṅkwa so, tam tun o ntùm mbabe; tswe ntùm mbabe, kà bèn ngù diaṅkwa me tusô ba Kaldéa z'a b'a mba ménngon nà. Bo ke bèn netsiaṅ o mbwô ngon bo ngakô ngùa.

² Lo' ngo' bàn, nèn ngo' ngefele, bù' nzwe z'o ma' tu o là, ṅwi'te kum so, nko'te yi num ntammbwe mu, ndù a fà bu o dut ntse.

³ Te wul o tunntôg, ndù bo yen o ntùm yu tuswe. M'a' yab nge' ntùm yagte mba'a. Me ke nsi tôg sàm mèn.

⁴ Ngatshu' ben ze lén se be Tshùaben tàndà ntsho là, Mèn Nelàn Israél bèn ntshobe.

⁵ Ngon ba Kaldéa, tswe nsi ntùm ntshu mi'i, nèn ntùm njame. Bo ke nsi bèn tsiaṅ o màmfen nufen nzenze.

⁶ Me lo ya ntù num yàm nzwit mèn. Me lo lo' ju ntsi' àm mba ju banban nà, me lo fà i mum mbu mu, o ma'ni i ke ko ndèn mi, njab yu lèt num njwèn mèn, a nke mfél i nsi.

⁷ O lo ke ntshob ndù: Me b'a màmfen matmat, ke kwate, ke siaṅte nu mfà num nemiagte.

⁸ Wù ngakô ngùa, z'o tswe num diaṅkwa, ke ke mbwôge, nke ntshob ntù o ndù: A b'a me, nda' me là, a bwô ndù o ju' ndonni. Nummb'o num ntshob ndù: Me ke nsi zi be mfôge, bon ke nsi zi bwoṅ me tshàm.

⁹ Tshen nge' bàa li nsi kab mbu num o mum ta' lé'njù ntshù'. Nebwoṅ bon bo fôge. Tshen nge' li nsi tsho o kua' ndaṅndaṅ, mba mb'o ghù nka yàme, mba mb'o lèn netshaṅ nka yàm yàm nà.

¹⁰ O lo ke njab ntù num tshùagntù o, nke ntshob ntù o ndù: Sàm mèn ke tshwèt njen àm. Zenu o bo yu nkwate fùt'o, o nke ntshob ntù o ndù: A b'a me, nda' me!

¹¹ Là, nge' nsi tsho o, ke be ndù o lène. Mo' gha' nge' nsi tsho o; o be ke lèn netum bwe. O nsi vù, tù' fam a koṅkoṅ, t'o be ke le'te bwe nze.

¹² Tsiag ntùm nka mi o be bwe là, ntùm nka mi o be bwe fe mônke' là. Be mo' ndù o jù bin i; be mo' ndù o tù' nduku.

¹³ O lo ke ndab wut nke mbètte ghalèn kamànyam, ghalèn nsa nu. Tshen ben nà be ndôte ntshùa ṅwù, nke ntshob tshu ts'a nsi se' là. Tshen ben nà lo nsi njôg o là di!

¹⁴ Bo b'a mba nyi'nga ze mbwôg kù i là. Bo ke nsi yôg yôg sob ntùm mbwôge. A ke nsi b'a nge'mbwôg ze mèn be njôg là, ke be mbwôg ze mèn be ntswe mbaṅ bwe là.

¹⁵ Tshù mb'a nsi be num ben ts'o be njen nge' nke mbètte yub nu là. A nsi be be ndaṅndaṅ num ben bin a bo ke nta ntàn fe mônke' là. Bo nsi kù nèn bag bag. Sàm mèn ke nsi tum se' ywimt'o.