Esaya 44 - NTSHOB NSI

Israél kà bèn mbwôg ndonni

¹ Ju' ndonni me Yakob ngafa' àm. Israél ze me na' ntsho' i là ju'u.

² Kà bwôg me ngafa' àm Yakob, me Israél àm ze me na' ntsho'o. A Tshùaben z'a nabt'o, mbom o fe bam màan nà bèn ntshobe; a yi bèn mbe yu ntom.

³ Nummbe me nsi naṅ ntse num dù' tsha' njum, ngù bon netsha' ntse swe' num tsha' neghage; me nsi so ywèt tshàm num yu nzwit, me nsi tam ntse num bon tobntù.

⁴ Bo nsi ku' a mba bo b'a tèt nenà là, mba nkewakob ts'a be nkaṅ ntse là.

⁵ Yen ni nsi tshob ndù: Me b'a mèn Tshùaben; yen nà tshob ndù lén se b'a Yakob. Mo' bèn nkite num bu i ndù: Me b'a ze mèn Tshùaben, tswi lén se ndù Israél.

Ba kom nkatu mi mbe

⁶ Tshùaben, mfen Israél, ngatshu' i, Tshùaben tàndà ntsho tshob ndù: Me b'a mbwe i mbèn mbe njam i, Mo' nsi ke' bèn mbe bwe k'a ke nda' me.

⁷ We z'a na' ntshob nu mba m'à? Yen mèn nà se' ntote là, a se' ntshob là. We z'a na' ntshob nu ndamnjù fe neto't'à? A be ndùlala bo soṅ yag nu z'a nsi se' là.

⁸ Kà bin bwôg, kà tu zin tshu'. Me lo ke yà ntshob bin, me lo ke yà soṅ zin tà mbwe ké? Bin b'a tshàm ghakwénta. Mo' nsi ke' bèn mbe mba me là. Mo' gholoṅ bèn mbe bwe k'a ke nda' me ké?

⁹ Ben tse bo num nabte ba neto là njoṅ yub fa ke mi neka'te tshobe; mbwô mbwô mfa' mbu mi mbe tse; mba mfa' mbit be nkwé nta tu wut tshobe. Bo ke' be yen, ke ghù nkwate, ndùlala ndù bo tsho ntùm tuswe.

¹⁰ We z'a b'a nabte ta' nsi, ke nekom ta' neto ke be ndù a nsi jù bin i à?

¹¹ Bin yen mbe tuswe nsi ko ben tse bo num mfa' bwe là; ghafa' fa ne mb'a benntùn. A be ze bo kùmte njoṅ yub fa, ntamte nse' là, mba njoṅ yub fa nsi vètte, tuswe bèn ngom yube.

¹² Tàlàm be ndo' tùn nton num nge'mbwôge, ndo' ghama ndab tùn yi, ndo' ghama bo ngù' bu i ndab yi, tà nziku' ya i, ngù' ke bèn mbe yi. A num mbole, a be z'a ke' nu ntse là.

¹³ Ngakwim tuba' be ntaṅ nkù num ntù, ndo' kekùt ntsha' dù' i yi; a be ndo' ngwat ntshebte dù' i yi, ndo' ju fa' mfi' yi; a be ntshebte se mènntùn num bwe, a fute ta' mènntùn; a nabte ndùlala te a ntùm ta' ndà.

¹⁴ A be nèn nkeb ba sédra; nèn netèt ntù mi a fèn nà ntsho' tù tô bo ntsenze'. A be mbwe tù tshalone, mbaṅ lo bwe a ku'.

¹⁵ Sen tù là be mfà ntshwèn mènntùn, a nke nton njôge, mbèn nton na bàn yi. A num mbèn ndo' nabte nsi yi, tà ngwù nsi mbwe i. A be ndo' i nkom neto yi tà nke ngamt'é.

¹⁶ A be nton mo' bag ntshwèn nà, ndo' yen nà nton mbàb yi, ka mo' yi neka mfèle; mo' ndù mbèn njôg nke ntshob ndù: Ṅ, ṅ, ke lèn mbwô mbwôg li à! Me yen kua' lambwôge.

¹⁷ Mbèn ndo' mo' tshé' ntshwèn nà nkom nsi, neto i yi; a num ngamt'é, ngwù nsi mbwe i, nde't'é ntshob ndù: Kabt'àm, nummb'o b'a yàm nsi.

¹⁸ Bo ke' ghù nkwate, ke ke nju'u, nummbe bo biag miag mub ndù kà bo yen nze, mem ntù yub ndù kà bo ju' sàm ju.

¹⁹ Sàm mèn netèt bo ke' ghom wul i, nkwate ntshob ndù: Me bèn nton mo' bag i ndo' na bàn yi, nton mbàb num nge'mbwôg mi mfèle. Ndonni me bèn ndo' tshé' i nkom meju neto yi! Me tshwèt ngwù nsi mbwe ta' kam ntshwèn!

²⁰ A be ntshàm ntù num bwembwôge, ntù i z'a fàn nze là bi. A ke nsi yôg tu wul i tshob ndù: A ke tatte li ze me tshùb bu àm ké?

²¹ Yakob, kwimte tshen tshu là Israél, kwimte ndù o b'a ngafa' àm. Me lo nabt'o, o b'a yàm ngafa'. Israél, me ke nsi lag o.

²² Bèn njam ntèl àm nummbe me tshu' o. Me nsi bwete nukebwô tsho ts'a be mba ṅam nà.

²³ Kamànyam tsiaṅte nummbe Tshùaben fa'a. bam tsha' ṅwate! Ba mbat tshag nze yub tù ntùm tsiaṅte. Mfèn boa ntù mub tsiaṅte nummbe Tshùaben tshu' Yakob. A tswite nkuni mi num Israél.

Mba Nsi lo' ngafa' i Sirus ndù a tù' ngabéb njùmbwe tse là. Mi mfa'

²⁴ Tshùaben ngatshu' o, z'a na' nabt'o fe lé'njù se bo bwe o là tshob ndù: Tu wul àm me Tshùaben bèn nabte njoṅ tshu fa. Me nyitte kamànyam à tù' me. Nyitte tsha' à tù' me.

²⁵ Me lo biagte keki ba ghatshob ntshob Nsi tse tatte, ntshob ghangàm ndù bo b'a kagni. Me lo ghù ghazenu bènte tuntun, me ghù yub nesiaṅte kaṅ ntù' bà.

²⁶ Me saṅlaṅ num ntshob ngafa' àm, me ke nzwiagt'a ju ghantum tshàm na' mbùt là. Me tshob num Yérusalém ndù bo nsi tswe bwe; ntshob num ntusô Yuda ndù bo nsi bèn kut yube. Me nsi bèn bù'te fam yub.

²⁷ Me tshob ghem ndù a jume. Me nsi ghù nta'ntse mi jumte.

²⁸ Me tshob num Kirus ndù: A bèn mbe yàm ngabéb mbwe; a nsi ghù njoṅ yàm nekô fa bumte. A nsi tshob num Yérusalém ndù: Bo bèn nkul i! Tshob num Ndà Nsi ndù: Bo bèn nte i tù!