Esaya 42 - NTSHOB NSI

Tshù ngafa' àm ni

¹ Tshù ngafa' àm ze me nsi tomt'é li. A b'a mèn ze me tsho' i, ntù àm yab num i là. Me so ywèt tshàm num i. A nsi soṅ ngôngô nunetsine.

² A ke nsi kua'a, nz'é ke nsi tum tù. A ke nsi ghù bo ju' nz'é num manze.

³ A ke nsi miagte nka'nesoṅ z'a be' là, ke biag nka' z'a tshwèt nke' na' nkù là. A nsi tshob nunetsin à ntùm nenùne.

⁴ Ywèn ke nsi ko i, a ke bèn mbole, tà nkum ndùs'a te nunetsin num nsitsha' là, mba ngô ts'a tètntse nke nywinte num ntshù' i là.

⁵ Tshùaben Nsi z'a nabte kamànyam, nké't'é, z'a nabte tsha' mba tshu ts'a be ntum bwe, z'a fà zwiag ben bo be ntswe num bwe, mfà ywèt ben tse bo be nzinte num bwe là tshob ndù:

⁶ Me Tshùaben, me lo tsiaṅ o num yôg. Me nsi tshùb bu o, lem o. Me nsi te o ndù o wat kàn bin ngô, ndù o be nelàn ngôngô,

⁷ ndù o gha' miag ba mfùmiag, ngù ba kuan tum ndàtsha, ngù ben bo num ntswe ntùm njam nà tum ntô.

⁸ Me b'a Tshùaben, tshù lén sàm nà. Me ke nsi fà yàm ghamte mo' mèn, ke fà yàm nku'ni ba neto.

⁹ Tshù mbwe tshu là ts'a bumte là; me tù' soṅ zin à tse nswe. Me te bu num bin k'a se'e.

Tshùaben zwiagte mfa' mi

¹⁰ Bin tse bin num nzinte num dibantse, nke ntswe bwe là, ngô ts'a tètntse là boa ba la' tse, bin yob ta' kwi nswe Tshùaben, bin yob nyàmt'é yi tà nèn nkum num ntôg tsha'a.

¹¹ A bwô ndù kônkwa boa ntusô mi tshag nze yub tù! A bwô ndù ngô tse Kedar tsho bwe là tshag nze yub tù! A bwô ndù ghatswe num ngondoṅ ṅwate, tshu'te tsiaṅte tum mfe num tu ba mbale.

¹² A bwô neghamte Tshùaben, bo ke njob nyàmt'é yi ntùm ngô ts'a be tètntse là.

¹³ Tshùaben ke nkù' nse' à mba ta' sa'nde' là. A tshwèt nkamte tshùagt'é à mba ngale' ntsho là. A tshag nz'é tù, nkua'a; a la'te ngù' i num ghakeban tse.

¹⁴ Me lo tswe ntshu mi' tà ndùke lo, me lo ke tshob nu, me lo tshùb ntù àm. Là ndonni me nsi kua' mba mènnzwi z'a tshwèt ndùbte là. Me nsi tswe, zwiag sàm tum à kua' nenànte.

¹⁵ Me nsi tswe' ba mbat boa nkônga, ghù nenà jumte fa. Me nsi ghù nta'ntse tù' tsha' njum, me ghù ndiaṅnkat ntse jume.

¹⁶ Me nsi ghù ba mfùmiag zin num manze ze bo ke' lèn nà. M'a' lo' yub ntshùa yi num ntshagnze tse bo ke' lèn nà. M'a' lo' njam ts'a mbwe bo là nkaṅ nelàn yi. M'a' kaṅ dù' ts'a ṅatte l'a tù' tômbo'o. Tshù ju ze me nsi ghù là. Me ke nsi ghua' yube.

¹⁷ Bo nsi bèn tuntun, tuswe ko yube. Me tshob à ben tse bo num njab ntù num neto tse bo kome, nke ntshob neto ts'a b'a tse tùn ndù: Bin b'a tshag nsi là.

Bwoṅ ghatatu ke ju'

¹⁸ A bwô ndù ba mbu'ntoṅ ju'u, ba mfùmiag lôte njene.

¹⁹ Mfùmiag b'a we ke ne mb'a ngafa' àm à? Mbu'ntoṅ b'a we z'a be mba ngantum ze me tum à? We z'a be mfùmiag mba ngantum àm à, mbu'ntoṅ mba ngafa' Tshùaben à?

²⁰ O yen tshu yàm neshu, nda' ndù ke lo' mba nu là. Bo lo gha' ntoṅ tà, là ke ju' sàm ju.

²¹ Tshùaben lo fà ta' ntshù' ndùb, ntshù' mebwô. Yen nà b'a num se fu' Israél.

²² A b'a ta' nzwit mèn ndù bo lagt'é fa, ndù bo tswil i fa. Bo taṅte yub tshan ntùm ngabndoṅ; bo ma' yub ntùm ndàtsha. Bo lo tam yub mfà, ngatshu' yub ke tum. Bo tswit yub fa, sàm mèn ke tshob ndù: Ba' yub njam.

²³ We netèt bin z'a nsi kù' ntoṅ num tshen tshu l'à? We z'a kô neyab tu i bwe, we z'a kô nekwimte ndamnjù nju' yen nu l'à?

²⁴ We z'a bam bo lag ntsha' Yakob à, we z'a bam bo lag ntsha' Israél à? A ke' b'a Tshùaben ké? Bo lo ghù nukebwô num i. Be lo ke kô nezin num manze tse, ke kô neju' ntshù' mi.

²⁵ A ndùlala z'a tshwèt nsa tonkèt yantù i num Israél, ntshwèt kuni fet ntsho num i là. Ntsho lo tsho i taṅtaṅ, a ke lèn ju z'a nsi là. Ntsho ton i, a ke lo' mba nu là.