Esaya 41 - NTSHOB NSI

A bwô ndù Israél yab ntù i num Nsi z'a tswe ntùn nà

¹ Ngô tètntse, bin tswe ndù kam, nju' àm! A bwô ndù ngôngô bèn mbù'te yub neta. A bwô ndù bo kù'te nse' ntshob nu, bag à bo zin kam ku ntshù'.

² We z'a tsho' mèn z'a ntumnyam, mèn ze yôg tshwèt ntsiaṅ i njam i à? We z'a fà ngôngô boa fenfen mum mbu mi à? We z'a kaṅ ṅwi yub a tù' mbab à? We z'a kaṅ ngoṅkét yub a tù' bène, nke mfùl à?

³ A yab njam bo, nta' yub à ntùm nku'ni, num manze ze ku i ke' to' te bwe là.

⁴ A we z'a nabte mbèn ngù tshen tshu li à? A mèn z'a na' ntsiaṅ nzwit benntùn fe neto'te nke ntshob ndù: Me Tshùaben ze me be mbwe mèn nà, me nsi b'a be ndùlala bag à miagte benntùn.

⁵ Ngô tètntse tse bo yen i là b'a ntùm bwôg. Ntôgnjù tshwèt mvètte. Bo tshwèt ngebte, bo tshwèt nse'e.

⁶ Bo be njwimte wut tshob bo bo, mba zit lo nke ntshob mfèl i ndù: Kagtùn!

⁷ Ngakom ju be ntshob ngatswe ju ndù a kagtùn. Mèn z'a be ntshua'te ju bo ghama là num ntshob ngalab ju num loṅ lam ndù a kagtùn. A be ntshob ndù neyoṅte ju bwô. A be ndo' ntùn nkwim neto yi, ndù k'a vù nsi.

Israél ngafa' àm

⁸ Là, wù Israél, ngafa' àm, Yakob ze me na' ntsho' là, nzwit Abraham ze me na' nkô i là!

⁹ Wù ze me na' ndo' o num ntôg tsha'a, ntsiaṅ tà dù' z'a sag là, me lo tshob wù ndù: O b'a ngafa' àm, ndù me tsho'o, mbe ndù me ke ghua' o!

¹⁰ Kà bwôg sàm ju, nummbe bag wù bèn mbe. Kà ke ma' miag ngabwôg, nummbe me b'a Nsi o. Me so neta num o, me se' ywimt'o; me lo' bu àm ze tshùa ntsho ze zwim ntomt'o yi.

¹¹ Tshù, njoṅ benntùn fa tse bo ghù yantù num o là, tuswe a' ko yube, tuswe nsi ghom yube. Ben tse bo tshwèt nkam ntanta num o là nsi tù' ju banban, bite fa.

¹² O nsi diag ben tse bo ke nkam o ntsha là be ke bèn neyen yube. Ben tse bo ke nkam o ntsho là nsi tù' ju banban, be ke bèn mbe sàm ju.

¹³ Nummbe me b'a Tshùaben Nsi o, nke nso neta mum bu o ze zwim, me bèn ntshob wù ndù k'o bwôg; me tshwèt nse' ywimt'o.

¹⁴ Kà bwôg me fenyu' nzwit Yakob, me fikèt tshé' Israél z'a tù'ù, me tshwèt nse' ywimt'o. Tshùaben Mèn Nelàn Israél, Ngatshu' o bèn ntshobe.

¹⁵ M'a' lo' o ngù masin netsham nsa yi, masin netshùage, ze ntoṅ be num bwe yàm nà. O nsi to ba mbale, tswe' yube, lo' nkônga kaṅ a tù' béne, nummbe bin nsi b'a ba sa'nde'e.

¹⁶ O nsi ke'te yube, fetmbaṅ ket yub nèn yi. Zim nsi sate yub fa. Là wù, o nsi tsiaṅte num Tshùaben. O nsi yab yu ghamt'â num Mèn Nelàn Israél.

¹⁷ Ghayennge' boa bwoṅ be ndiag ntse ke yen, lém sob nke njumte. Me Tshùaben nsi ju' nze yub, me Nsi Israél, me ke nsi ghua' yube.

¹⁸ Me nsi ghù nta'ntse bèt mfe num nkônga, ghù ntumnsi ntse tum ntômbo'o; me nsi ghù kônkwa tù' diaṅnkat ntse, tsha' ts'a ghag là tù' koṅntse.

¹⁹ Me nsi ywit sédra bo tù bù, ywit tsinkém bo mbatsi num kônkwa; me nsi ghù tù tô bit kônkwa, mbit mbaṅ netshùm bo fiaṅe.

²⁰ A nsi tshùa ndùlala bo lène, bo tsha'a, njen ndù a b'a bu Tshùaben bèn ngù tshen tshu là mba ndù Mèn Nelàn Israél bèn mbe njoṅ nu fa.

Bamnà num ba nsi neto

²¹ Tshùaben tshob ndù: Bin tshètte zin njam; mfen Yakob tshob ndù: Bin tshob nu ndo' mbéb zin njam yi.

²² A bwô ndù bo tshobe, ntshob nu z'a nsi se' là be. Nu tse bin na' ntshob mbwembwe là na' mb'a tsil à? Bin tshob bag, bag lo' nzenu bwe, ndèn mb'a nsi bumte là, ntag ndùlala bin soṅ yag nu ndamnjù.

²³ Bin soṅ yag nu a nsi tum mànjam nà, bag lèn ndù bin b'a ba nsi; bin ghù nda' numebwô ke nukebwô lo, ndù bag yene, ntamte ndôte.

²⁴ Me soṅ zin ndù bin ke' b'a sàm ju, fa' sin b'a ju banban; a b'a tshùaya'nu neyen mbe mèn tshwèt nke njé'te num bin.

²⁵ Me lo tsho' mfen neta tu a se'. A tsin ntumnyam nke ntsiaṅ lén sàm. A ke nyiaṅ ben neta nsi a mba netob là, mba tsha' nete kab yi ze ntetsha' tshwèt nyiaṅte nku là.

²⁶ We z'a na' ntshob yen nu là fe neto'te kà ndèn fe tà ndùke lo, kà be ndèn nke ntshob ndù a b'a nenùn à? Sàm mèn ke' to' tshob, sàm mèn ke' to' bùt. Sàm mèn ke' to' ju' ntshob mine.

²⁷ A b'a me bèn mbe mbwe mèn netshob Sion ndù: Tshù bo li! Tshù bo li! Mbèn ntshob Yérusalém ndù: Me tum ngantum boa nkùn mebwô!

²⁸ Me lôte netèt ben bo num ntshob ntshob Nsi là, ke yen sàm mèn ze b'a bùnte nu me, a be ze me bètt'é nu là.

²⁹ Njoṅ yub fa b'a nda' ka'te, mfa' mub be mi banban, neto tshob fùag à mba ywèt banban nà.