Esaya 40 - NTSHOB NSI

NKAM MBÀA Mba Nsi na' ntshob ba Israél ndù a nsi yôg yub là

¹ Tshùaben Nsi zin tshob ndù: Bin fite ntù, bin fite ntù yàm nzwit mèn

² Bin lo' nku'ni ntshob nu yi Yérusalém, nkua' neta ntshob yi ndù ze ngelaṅ sobni mi mba di, bin tshob yi mbe mfànnu mi mi mba di! Bin tshob yi ndù a lo kwé nevù ntsha mum mbu Tshùaben yoṅ tse bàa, mbe ndùlal'a num nukebwô tse.

³ Mo' nze kua' num kônkwa ntshob ndù: Bin nabte manze Tshùaben. Bin nabte ta' manze Nsi be num dù' z'a jum nà, ngù a tsine.

⁴ A bwô nezwiag njoṅ tômbo' fa, nkôg njoṅ mbat fa bo njoṅ kônga fa. A bwô ndù dù' ṅaṅa tù' dù' kù'kù', dù' ts'a be nkônkô là tù' bu'to'o.

⁵ A nsi tshùa ndùlala nkuni Tshùaben la'te wul i. Njoṅ benntùn fa nsi yen i be num yen ngelaṅ nà. Nummbe ntshu Tshùaben bèn ntshobe.

⁶ Mo' nze tshob ndù: Kua'a! Ngatshob ntshob Nsi bùnte ndù: Me kua' tshob à mbe ke? Njoṅ benntùn fa b'a mba nenà là, njoṅ ghamt'o fa be mba nsàm nenà mi a be bén nà.

⁷ Nenà num njume, nsàm mi vù nsi, ndùse fetmbaṅ Tshùaben tshùa num bwe là. Kua' nenùn ngô b'a mba nenà là.

⁸ Nenà be njume, nsàm mi vù nsi; là, ntshob Nsi be tswe ts'a matmat.

⁹ Ko' num mbat z'a nèn tù neshu là, num netswi nkùn mebwô Sion; tshag nz'o tù neta, num netswi nkùn mebwô Yérusalém. Tshag nz'o tù kà bwôg. Tshob ntusô Yuda ndù tshù Nsi yub li.

¹⁰ Tshù Tshùaben Nsi là z'a tshwèt nse' à bo ngù' là; a tshwèt ndo' bu i nsa' yi. Bo nkàbfa' bèn mbe, mbe ndù nevù ntsha nsi b'a njam bwe.

¹¹ A nsi tshagte bwoṅ nyàm i mba ngabéb mbwe là; a nsi ket njùmbwe num ndaṅ bu i, kab yub ndàntù i. A nsi tshagte mbwe tse bo tshwèt nyô bon nà.

We ze be bo lo' mfi' (mba') Nsi num i à?

¹² We z'a fi' ntse ntùm tôbu se à? We z'a gha'te ntu mbu mi mfi' kamànyam yi à? We z'a ṅwat mbab tsha' ntùm metsit mfi' z'a b'a bag i ntshù' num tse tal à? We z'a lo' kilô ghub mfi' ba mbat yi à? We z'a fi' nkônga num kilô à?

¹³ We z'a lèn nkwatenu Tshùaben à? Ze ngafà ntag b'a we?

¹⁴ A we ze bo yi tsin tsham k'a nzi'te netsho'te bu i à? We z'a la't'é manze nunetsin à? We z'a tswit'é zenu à? We z'a la't'é manze nesiaṅte nu à?

¹⁵ Tshù, ngôngô b'a mba tàm ntse s'a ntùm lônga là; bo b'a mba mbab tsha' là num kilô. Tshù, ngô tse bo tètntse là ke' lèt ntshùa mbab tsha' mi a tshwèt ndo là.

¹⁶ Be ntshwèn ke tum Liban kà nku' njoṅ ze bo nsi yab tômbwôg se là. Nyàm ts'a be bwe là kag num ts'a bwô ndù bo ton num jule'te là.

¹⁷ Njoṅ ngôngô fa b'a banban mbwe i, bo b'a banban, mi mb'a ka'te num miag mi.

¹⁸ Bin ke ndiag fi' Nsi à num zit ju à? Bin nsi tshob mb'a b'a njoṅ zit ju nekom à?

¹⁹ Ngafa' be njag tùn nabte neto yi, ngakwite lo' gol njo' yi, njoṅte ntshan silba num bwe.

²⁰ Mèn ze bwoṅ to' i nefà yàm nà, be ndiag z'a ntshwèn z'a ke' be bagte ndende là. Yen nà be mbe tôg a diag ngafa' z'a ku'ni là, a kom neto yi z'a ke' ku'ni nevù nsi là.

²¹ Bin lo ke yoṅ ndèn ké? Bin lo ke yoṅ nju' ké? Bo lo ke yoṅ nsoṅ zin fe neto'te ké? Bin lo ke yoṅ nto' siaṅte nu mfà num mba tsha' lo' nte yi là ké?

²² A yi bèn ntswe num ngoṅntsi z'a diaṅ tsha' mbum nà. Ben tse bo be ntswe num bwe là b'a mba ngamntàn nà. A be nsette kamànyam à mba nzwe z'a fùag là, nga'te mba ntàb là num nelo' ngù dù'ntswe i yi.

²³ A yi ke ndo' fenfen nsitsha' nkaṅ ju banban yi, nke ndo' ghatsho'te num nsitsha' nkaṅ ju komzwi yi.

²⁴ Bo be njoṅ mbe bwe yube, njoṅ mbe ywit yube, tun yub ke yoṅ mfi'i, nga tshob ke yoṅ ntsho nsi, a shùm fet num bo, bo jum, fetmbaṅ se' nket yub mba bén nà nèn yi.

²⁵ Bin nsi lo' mfi' àm à num we kà me fu i à? A Mèn Nelàn bèn mbètte.

²⁶ Bin bù' miag min mfe tù, ndôte! We z'a nabte tshen tshu là fa à? We z'a num ngù bo tum fafa mba ntshu ntsho z'a bwô l'à? A be ntsiaṅ njoṅ yub fa lén sobe. A tshùa njam mba' i ze ndùb bo neta ngù' i, sàm ta' i mba ntshù' ke be fàn nze.

²⁷ Nzwit Israél, numk'o ntshob ndù a, numk'o ntshob ndù yu nebe lem num miag Tshùaben, yu mba' ke' bèn netsin ndaṅndaṅ mbwe Nsi o à?

²⁸ O ke' lèn, ke ju' ndù a b'a Nsi z'a tswe matmat, yi Tshùaben z'a nabte ntôgnjù là ké? A ke' be bot, ke be fite wul i. Be mèn ke tswe' ntun num zenu i.

²⁹ A be mfà ngù' mèn z'a bot là, nkwi'te neta mèn ze neta i kôgte là.

³⁰ Nguanmèn bot, njube, Ghuan benntùn tshwèt ngwù bag bag.

³¹ Là, ben tse bo yab ntù num Tshùaben nà tshwèt njen neta yub nkwi'te. Bo tshwèt mfùt mba ghammàtat là; bo be nkù nde ke bot, nke nzine, neta ke bwoṅ bo.