Esaya 4 - NTSHOB NSI

Fôg bènnzwi Yérusalém

¹ Bènnzwi sammbàa nsi ghom ta' mandum num sen lé'njù là tshob ndù: Mba bag nsi jù a yag bàn, bag nsi ma' tshag nzwe. Bam bag ndù bag yé'te num o! Sô tuswe z'a tu bag là.

Mbwe' vù Yérusalém

² A nsi be num sen lé'njù là, nzwit z'a b'a ze Tshùaben nà nsi bile, ghù nkuni bo ghamte, ntàmtù mi a be ntùm ngô là zitte, mbwô num miag tshé' Israél tse bo tù' là.

³ Bo nsi tsiaṅ tshé' ba Yérusalém boa tse Yérusalém ben nelàne, mba we lo ze bo kite lén se Sion netèt benntùn nà.

⁴ Yen nà nsi b'a ndùse Tshùaben nsi sôg ṅu' ngonngon Sion, lànte Yérusalém num lem ts'a be netèl i là. A nsi lo' a fet nunetsin bo fet ze nesate ghù njoṅ i fa yi.

⁵ Tshùaben nsi te ndot z'a tshwèt nsô nzembwôg là mbwôgtshù, tete mbwôg ze la se tshwèt nziag tèttswe' là num njoṅ mbat Yérusalém fa, num tse dù' mbumte fa. Mba ke lo z'a kuni là nsi b'a nge.

⁶ Dù' nelem nsi be num nefà netshaṅ mbwôgtshù ngelaṅ ze dù' num ndum nà. Dù' nelem be num fetmbaṅ bo mbaṅ.