Esaya 34 - NTSHOB NSI

Tshùaben nsi tsho'te njoṅ ngôngô fa

¹ Ngôngô, bin kù'te nju'u, ntumntum bin tswe ndù kam nju'u! A bwô ndù tsha' boa tshu ts'a ghù là ju'u, njù boa tshu ts'a be njam nà ju'u.

² Nummbe yantù Tshùaben kam mum ngôngô, tshùagntù lo num njoṅ ntshu ntsho yub fa. A tam bu nebiagte yube, a swèn yub ndù bo zwite yube.

³ Bo ghua' fe ben tshobe, fe tshob tshwèt ndame, lem tshob tshwèt nké num mbat nswe'e.

⁴ Ntshu ntsho mfe kamànyam nsi kaṅ tù' mbabe. Bo nsi bote kamànyam mba bu' ṅwa'ni là, ntshu ntsho i vù nsi mba fu tù ndu' là, mba fu tù mbatsi s'a tsho' là.

Nezwite ba Edom

⁵ Nummbe ṅwi àm bum ndu' mfe kamànyam; a nsi swe' se' num Edom, num nzwit mèn ze me tam bu àm nebiagte, nelo' nda'te yàm nunetsin yi là.

⁶ Ṅwi Tshùaben dun lem nzit ṅab num bwe fa, lem njùmbwe boa mfot mbwe, nzit zwe' nkomnjù. Nummbe Tshùaben ghù jule'te Botsra, nezwite b'a ze ndùb ntùm ngô Edom.

⁷ Ba nyatnyàm nsi vùte nsi boa bo, ba nyàmna' vùte nsi boa mfot mfô. Tsha' nsi ywèt lem; nzit nsi nywiaṅ ntùm tsha'a.

⁸ Nummb'a b'a lé'njù yagte mba' Tshùaben, mbe ngu'njù neyab nge' num ben tse bo num mbàn Sion nà.

⁹ Koṅntse ts'a ntùm ngô là nsi tù' zin, tsha' tù' njôg z'a nsi kù dù';

¹⁰ tèttswe' bo mbwôgtshù là; a ke nsi zi bi, nze mi nsi ke ko' nèn tù ngu'ngu'. A nsi tù' kônkwa matmat, sàm mèn be ke bèn ntshùa bwe.

¹¹ Ntshum bo bu'nyàm nsi se ka bwe; bwe' bo mala nsi te nkàn bwe. Bo nsi taṅ nkù yabnge' bwe, taṅ nkù nesate dù' bwe.

¹² Ben ndùbndùb tse bo be ngom fen nà ke nsi bèn mbe, bo nsi biagte kamkame.

¹³ Njô nsi bit bèn ku' ntùm mba' mi, kwékwénàndô boa nka' te ndà ntùm mba' mi bo kut tata là. A nsi b'a dù'ntswe ba nka'ghune, be ngab ze ba nkendoṅ ke ntswe bwe là.

¹⁴ Nyàm tse bo kônkwa là nsi bumte bwe boa mbù tshwèt, mfot mbwe nsi be bwe, mo' ke ntsiaṅ mo'. Bebun tèttswe' nsi ghù dù'ntswe bwe, fon dù' nefite bwe.

¹⁵ Nyu nsi ghù nkàn i bwe, ke'e, kùmte bon tse bam netshaṅ i; njoṅ nsaṅ bon mbwe fa nsi kùmte bwe.

¹⁶ Bin lôte ntùm ṅwa'ni Tshùaben, nsiaṅe. Lo' ke nsi tum mba num ze ntshù', sàm ta' i mba ntshù' ke nsi tsi, nummbe ntshu i bèn ntshob yen nu là. A ywèt tse bèn nkùmte njoṅ i fa.

¹⁷ A tam tô num bo, ndo' nkù ngabte tshen tsha' là yi bo. Tshen tsha' là nsi tù' b'a tshobe; bo nsi ke tswe bwe ngu'ngu'.