Esaya 32 - NTSHOB NSI

Nunenùn nsi lo' dù'

¹ Ndùlala mfen nsi tô ntùm netsine, kamkam sa' ntùm ndaṅndaṅ.

² Mba we lo nsi b'a mba ndà lem num fetmbaṅ nà, mba koṅntse num dù' tsha' z'a ghag là.

³ Miag ghayennze ke nsi bèn kabte, ben bo tshwèt nju' là nsi kù' ntoṅ.

⁴ Ntù fùag benntùn nsi siaṅte ju'u, lém ghatshù'te ké'te bo tshob à làne, mbèn ntshob kua' ndende.

⁵ Bo ke nsi bèn tsiaṅ nkagni ndùb, ke bèn ntsiaṅ ngafùte ndù ngakondèn.

⁶ Nummbe nkagni ke ntshob a tshu bà; ntù i be njab num nukebwô, a nke ngù tshu ts'a ke' bwô là, nke ntshob tatte nzenze num Tshùaben, num nefaṅ mèn ze nziku' ya i là bam nge, mba ndù a tsho' ntse ntshu mèn ze ntù i kù là.

⁷ Ngafùte ghù a tshuntshùag ts'a num mbatte mèn nà. A be njo'te mi ntàmtenu, num netshùa njam ntshob tatte nsoṅ ghayennge'. A be ngù ndùlala mba ndùse ze nu mbwoṅ tsin nà.

⁸ Là nkum mèn ke ntàmt'a nu ndùbndùb, nke nkagtùn à be ntùm men ntàmtenu là.

Nete bu num bènnzwi ntùn

⁹ Bin lo nsi nju' nz'àm me bènnzwi tse bo tswe mebwô. Bin kù' ntoṅ num ntshob màm me ngonngon tse bo tshwèt nde'te nge'.

¹⁰ A tù' tamngu' ngù bon ntswe'njù bin vètte, bin tse bin tshwèt nde'te nge' là, nummbe bo ke nsi kàb ntàmtù ndu', ke bèn ntsho' tshu.

¹¹ A bwô ndù wut tsin fét me bènnzwi bo tswe mebwô. Bin vètte me ngonngon tse bo tshwèt nde'te nge'. Bin sô nzwe num bin, ntù' b'a tunntôg. Bin tôg nke'mbàm tun bin;

¹² mba we lo tshwèt ndab ntù i, nke nkua' mbwô mbwô nà mba num ntù ndu' mi a na' nke njàm yi là.

¹³ Njô boa kwékwénàndô tshwèt mbit num tsha' yàm nzwit mèn, mba num njoṅ mba' ngùa fa mi a ntùm tusô tsiaṅte là.

¹⁴ Bo ghua' ntshwèt, ngua' tusô tshu'te; kônga bo dù' netsin bwe ndôte dù' nsi tù' b'a ngab, dù' nkekwèn tshwèt nsi ke tam ngùa bwe bo dù' ze bwoṅ nyàm nsi ke fèt bwe là.

¹⁵ A nsi be ndùlala tà kum ndùse ywèt Nsi a' swe' mfe tù se' num be, kônkwa bèn nkaṅ ntù' nà ntù, bo bèn ndo' nà ntù là mba fèn nà.

Nunenùn nsi fà fite

¹⁶ Yen ngelaṅ nà, nu ndaṅndaṅ nsi tswe kônkwa, nunetsin ghù ze dù'ntswe ntùm nà ntù.

¹⁷ Nunetsin nsi yam fite, nu ndaṅndaṅ lo' la' be tshaṅ nse' yi, a ghô matmat.

¹⁸ Yàm nzwit mèn nsi tswe ntùm dù' fite, ntùm ndà tse bwôg ke bwe là, ntùm ndà lem tse nebétni.

¹⁹ Bo nsi tem fèn, tusô vù ntùm tuswe.

²⁰ Ghafen b'a bin tse bin be nke njwil à nkaṅntse njoṅ dù' là là, bin tse bin ke' be so nkù ku nyàmna' bo kekwèn nà.