Esaya 3 - NTSHOB NSI

Va' ntùm nufen mà Yuda

¹ Tshùaben Nsi tàndà ntsho nsi sô njoṅ ywimte fa Yérusalém bo Yuda. A nsi sô njoṅ ywimte bàn fa, sô njoṅ ywimte ntse fa,

² sô njoṅ ywimte ghama' ntsho fa. A nsi sô ngatshob ntshob Nsi sô ngangàm bo nkum mèn,

³ sô ngalôte ben ṅam ntàn bo nkame, sô ngafà ntag bo nkum ngatshob nu ndamnjù mba zete ngaka.

⁴ Fenfen tshob nsi b'a nshumnshum, bontsit bônke' ke ntô yube.

⁵ Ngôngô nsi ke zwite wut tshob bo bo. Mèn nsi ghùtni mèn, mèn ghùtni mfèl i. Ménnshum nsi kam njwèn mèn ntsha fenyu' mèn ghù be ndaṅndaṅ num mèn ze lén se ju'ni là.

⁶ Mèn nsi nèn ntùm ndà tàab ghom mfèl i tshob yi ndù: Be yag mfen mb'o ghù nzwe là! A bwô ndù o lo' men mfam ni nke ndôte.

⁷ Ng'é nsi gha num sen lé'njù là, bùnte tshob ndù: Me ke' b'a ngatshwimte, mbèn mbe, bàn ke nzwe lo, ke ndà àm. Kà bin te àm num fen.

Tshùaben tsho'te ghatshagte

⁸ Yérusalém tshwèt ngwù bag bag, Yuda nke nkôg ngwù nsi. Yen nà b'a nummbe ntshob mub boa mfa' mub b'a nelo' mban Tshùaben yi, bo nelo' nkamte yantù i yi, yi mèn nekuni.

⁹ Ntshù mub tshwèt nkwé nta kebwô num bo, bo nke nsa nukebwô ke lemte ndaṅndaṅ mba Sodom nà. Nge' tu bo là, nummbe bo ke nzwi à be tu wut tshobe.

¹⁰ Mènfen b'a mèn netsine, nummb'a nsi jù ntàm fa' mi,

¹¹ Nge' tu ngatshùagntù là, nummb'a ke nsi ghù sàm ju. Ntsho'fa' mi nsi b'a mba mbu mi na' mfa' yi là.

¹² Ghafétte yàm nzwit mèn b'a bônke', ben bo tshwèt ntô yub là b'a bènnzwi. Ben tshàm tse bo tshagt'o là ghù o fàn manze. Bo bagte nze z'o be nzin num bwe là.

¹³ Tshùaben se' nesa' kame, a tsin tù netsho'te ngôngô.

¹⁴ Tshùaben b'a nsi kam boa kamkam ze ngô, boa fenfen tshobe, nke ntshob ndù: Bin lo jù nkùa, ndagte ntsha' mbwoṅ mèn nèn yi ntùm ndà tsine!

¹⁵ Tshùaben Nsi tàndà ntsho tshob ndù: Bin ke njé't'a yà kà nke nyiaṅte yàm nzwit mèn nku, kà nke nyiaṅte se njennge' à?

Ntsha tu ngonngon Yérusalém

¹⁶ Tshùaben tshob ndù: Mba ngonngon Yérusalém be ghako'tewut, nke mbe zin nsô kekot yub, nke ndôte miag ke bwôg là, mba bo be mbe zin nke nsoṅ nku nsi, nke ngù nkwa nke nyi'te nku bo là,

¹⁷ Tshùaben be nsi ghù tèt tu ngonngon Yérusalém tsho'te, Tshùaben bèn ntèt yub tù tunntôg.

¹⁸ Tshùaben nsi sô nkwa mi a be nku bo là num sen lé'njù là, tsho' ntùn mi bo sote num nyiaṅtu tshobe, boa nkwa mi bo ma' tô bo là.

¹⁹ A nsi sô mba'ntoṅ, sô mbuo, lé' nzwe ze bo ma' tu bo là.

²⁰ A nsi sô kétmbùn, mba tshan num bo, sô nkob tun bo, ké' tshu nelam boa nkim num bo.

²¹ Tshùaben nsi sô nkwa ndùb boa mi nke' num ntselag yub;

²² a sô nzwe tanjoṅ boa nkum mi a zi là, nsô nkummbaṅ, nkwé mbàm.

²³ A lo' ba yente boa nkum mebwô, nké' ba kuttu boa nzwe nema' tu mèn ts'a fùag là.

²⁴ Nelam nsi be num dù' nelamte, mfèt be num kob, tu netsho'te be num dù' tu nebote, nke'bàm be num dù' kummbaṅ se nezi, mfaṅ be num dù' mebwô.

²⁵ Ben tsho nsi vù num ntshùag ṅwi, tsho sa'nde' ghô tshwèt ntsho.

²⁶ Netsham zwe bo ntsenyà nsi be num nsém Yérusalém, Yérusalém, mba mènnzwi là tam tun num tsha' mba bo sat'é fa là.