Esaya 27 - NTSHOB NSI

¹ Num sen lé'njù là, Tshùaben nsi lo' ṅwi i z'a lèle, nta là lab Léviatan, mbanyu, Léviatan, nyu z'a ṅu'te là yi, a nsi zwi yen ngùnyu là z'a ntùm dibantse là.

Tshùaben bo nkùa i

² Num sen lé'njù là bo nsi tshob ndù: Bin yob kwi num tù ndu' se mebwô.

³ Me Tshùaben bèn nke mbéb i; me num nzwi' i num ngelaṅ i, mbwôg ndù kà ju kwag i. Me num mbéb i tèttswe' bo mbwôgtshù.

⁴ Yantù ke ntù àm. Là, a be ze me yen ndù a bwô me ma' kwékwénàndô boa njô ntsho là, mba me nsi tamte njoṅ i fa ton mbwôge.

⁵ Kà ntag nda' ndùse bo lo' àm mba ndà lem, bag à bo wat kàn, ngù fite netèt bag là.

⁶ Nzwit ba Israél nsi taṅ nga, sàme, bèt nkaṅ num ngelaṅ z'a tshwèt nse' là. A nsi sa ntàm mi ntùm njù a dune.

⁷ Tshùaben lab Israél a kua' mb'a na' ndab tse ghakeban Israél là ké? A zwi i mb'a na' nzwi ben tse bo zwi i là ké?

⁸ Là, o fi'i, ndo' kùla' nte ntsha yi tu i, ndo' fèl o z'a ta neshu là nkel i yi mba fetmbaṅ z'a fe bag ntumnyam nà.

Lagte mfànnu nzwit Yakob

⁹ Tshù mba me nsi bwete mfànnu nzwit Israél li, mbèn njen lèn tàm se nelagte nukebwô i nsi yàm ni: A nyute ndoṅ tômbwôg a mba bo be nyute nke' mbem nà. Tse neto Astarté boa bebun lagnyam ke nsi bèn be tù;

¹⁰ nummbe ngô neta tù' dù' banban, dù'ntswe ze bo ghua' là, ze bo kag nsi mba kônkwa là. Mfô nsi se' fèt bwe, nô bwe, ke fèt mbu ntù.

¹¹ Ndùse mbu ntù nsi jum nà, bo nsi be'te, bènnzwi se' nso mbwôg bwe. Nummbe yen nzwit mèn nà ke' ghù nkwate. A ndùlala ze Mbom i ke' ko ndèn mi là. Mèn z'a nabt'é là ke' tshàm ndèn mi.

Netum mbèn njam

¹² Num yen ngelaṅ nà, Tshùaben nsi nyi'te ntù, ntàm mi tsho'o, neto' num ta'ntse Efrat tà nkum fub s'a ndùnsi ngô Egipto là. Bon Israél, bo nsi tswitte zin ntshù'ntshù'.

¹³ Bo nsi tô nta ndùb num sen lé'njù là; ben tse bo nèn kùla' Asiria là nsi bèn njam. boa tse bo nèn Egipto là. Bo nsi te nkekwi' mub nsi mbwe Tshùaben, num mbat nelàne, z'a Yérusalém nà.