Esaya 26 - NTSHOB NSI

Yobkwi: Bag ghù ta' tusô neta

¹ Num sen lé'njù là, bo nsi yob sen kwi li ntùm ngô Yuda ndù: Bag ghù ta' tusô neta. A fà yôg bag num ba kàbngô, mba num tshètntsho.

² Bin gha' nzendà ntete nge. Bin faṅ ngô netsin bo nenùn tsho.

³ Fà fite, fite z'a ku'ni là mèn z'a ghù tànntù là, nummb'a yab ntù num o.

⁴ Bin yab ntù num Tshùaben matmat. Nummbe Tshùaben, kua' yi b'a gholoṅ s'a tswe ngu'ngu' là.

⁵ A tèn ben bo tswe dù' ṅaṅa là ma' nsi. A tèn mbwô tusô, nkôg i tà ma' num tsha'a. A ghù t'a kwag mbabe.

⁶ Bo nyiaṅt'é nku, nku bwoṅbwoṅ nyiaṅt'é, a vù tun nku ghayennge'.

⁷ Manze mèn netsin b'a ndaṅndaṅ; wù z'o b'a mèn netsin nà, tsiagte ntshagnze mèn netsine.

⁸ Wù Tshùaben, bag tshwèt mbéb o num manze tsho tsho'te ntsha. Ntù yag num ntam ndùse bag tsi lén so, nkwimt'o là.

⁹ Ntù àm num nkô o tèttswe', ywèt tshàm nke ndiag o kua' neshu. Nummb'a num be ndùs'o tshwèt ntsho'te njù ntsha là, ba ntùm njù nke nzi'te nunetsine.

¹⁰ Là, a be ze bo ghù kondèn num ngatshùagntù là, mb'a ke zi'te tse nunetsin ntùm ngô nu ndaṅndaṅ, mb'a nsi fà wul i num nukebwô, be ke kô nenyàmte nkuni Tshùaben.

¹¹ Tshùaben, bu o ghù neta neshu, bo ke yen tshobe. Bo nsi yen nkôni z'o ghù mum ngô o là, tuswe ko yube. mbwôg nsi kù ghakeban tsho.

¹² Tshùaben, fà fite bag, nummbe mba ke lo ze bag ghù là, o bèn nke ngù a mbumte num bag.

¹³ Tshùaben Nsi yag, tsemo' tàfa' mba tu wul o là lo tô yage. Là, bag ke ntsiaṅ lén so mb'a tshùa nda' njam kondèn o.

¹⁴ Nummbe fe ben ke nsi bam num vù, zwiag sob ke nsi bèn bèn num bo, nummb'o naṅ ntsha tu bo, nsate yube. O ke' bam mbe mèn nkwimte yub mba nekwimte.

Sèn nzwit benntùn me Tshùaben

¹⁵ Tshùaben, kwi'te ngô, kwi'te ngô, nda'te nkuni mu, kù'te tshag ndùnsi.

¹⁶ Tshùaben, bo lo diag o ndùse bo be ntùm nge' là; bo lo vùte nsi ntùm nele't'o ndùs'o na' naṅ ntsha tu bo là.

¹⁷ Tshùaben, bag na' mbe ngùanesà mbwe o ntùm nge', ndaṅndaṅ mba mènnzwi jùm z'a tshwèt ndùbte, mbe ntùm nge', nke ndù' wul i, nke nkua' ntùm ya bwe là.

¹⁸ Bag lo lèle, njen nge', mbwe à mfùag. Bag ke' yôg ngô, ke ghù la' bèn nse' nsitsha'a.

¹⁹ A bwô ndù tsho fe ben bèn njôge, tshàm bèn mbam num vù. Ben tse bo nô ntùm mbab là nsi bam bèn tsiaṅte nummbe mu meme' b'a mi a num mfà yôg là. A be ndùlala mba tsha' nsi bèn fà zwiag fe ben.

²⁰ Yàm nzwit mèn, nèn ntsho ntùm to'ndà o, mfùn nzendà num o. Lem wul o num tsemo' bon ngelaṅ, tà nkum ndùse yantù nsi tshùa là.

²¹ Tshù Tshùaben nà z'a tum dù'ntswe i là, a nsi naṅ ntsha tu mfànnu ba ntùm njù. Yen ngelaṅ nà tsha' nsi la'te lem ts'a ke nkabte là, ke bèn nku'ni nelem fe ben ts'a ghù bam nsi là.