Esaya 25 - NTSHOB NSI

Tshùaben Ngabéb mèn nebole

¹ Wù Tshùaben, o b'a Nsi àm. Me nsi nyàmt'o, me nsi ghamte lén so. Nummb'o ghù tshu ts'a bwô neshu là. Nu ts'o na' ntàmte tà fe ndùke lo là bumte kua' ndaṅndaṅ.

² Nummb'o lo' tusô ngù a tù' ta' tse ndoṅ, ndo' neta tusô nkaṅ a tù' fam; tusô se bagkèt benntùn ghù là ke' bèn nebe, mbe ndù bo zi ke bèn nkul i.

³ A ndùlala ze ngôngô tse neta tshwèt ngamt'o, ntusô ngôngô tse bo ghù neta là num mbwôg o.

⁴ O na' mb'a ze ndàlem mèn nebole, mbe ze ndàlem njennge' ntùm nge' i. Mbe ndàlem num ngelaṅ fetmbaṅ, mbe dù' nefite bwe ngelaṅ nyam. Nummbe fet ghatshùagntù b'a mba neta fetmbaṅ z'a be ntam mbaṅ ta' kàbngô là.

⁵ O lo fèn tshu'te ghabag nsi ndaṅndaṅ mb'o num mfèn ndum nyam nsi num dù' tsha' neton nà. Nkwi ngu' ghatshùag lo fam ndaṅndaṅ mba ndum nyam be mfam bam netshaṅ ndot là.

Jùa num ngôngô fa

⁶ Tshùaben tàndà ntsho tshwèt nabte ta' jùa njoṅ ngôngô fa num yen mbat li. Jujù ts'a nsi be bwe là bwô neshu, jùa ndu', nsam ndu' ntùn, jujù ts'a bwô là, ndù a ghù nzile, nsam ndu' ntùn mi bo tshét là.

⁷ A nsi keb nzwe z'a be nkabte njoṅ ngôngô fa là num yen mbat là, nzwe z'a be nkabte njoṅ ntumntum fa là.

⁸ A biagte vùkob matmat. Tshùaben Nsi tshwètte ntsenyà se njoṅ benntùn fa. A ghù tuswe z'a ke nko ze nzwit mèn nà mi num nsitsha' fa. Nummbe Tshùaben tshob ndùlala.

⁹ Bo nsi tshob num sen lé'njù là ndù: A b'a Nsi ze be yab ntù num i là, a b'a yi bèn nke njôg be. A b'a Tshùaben ze be yab ntù num i là; a bwô ndù be ṅwate, ntsiaṅte num yôg s'a fe yi là.

¹⁰ Nummbe bu Tshùaben yab num yen mbat li; bo nyiaṅte Moab nku be dù' i, ndaṅndaṅ mba bo num nyiaṅte nyi'nga nku ntùm tô nenà là.

¹¹ A tsin ntùm tô nenà nyit mbu mi mba ngala ntse be nyit mbu mi num nelo' nda ntse yi là. Là, Tshùaben be' ze ko'tewut, ngù mbu mi mi a nyit là yub.

¹² A sate, ntèn nkummba' mi o kul a ta là, a ghù bo kôg ngwùte num tsha'a, ngwùte tà ntùm mbabe.