Esaya 2 - NTSHOB NSI

¹ Njem ze ngatshob ntshob Nsi Esaya nshum Amots na' njen mfà num Yuda bo Yérusalém nà.

Njoṅ ngô fa nsi be Yérusalém

² A nsi be ngelaṅ mànjam mbat Tshùaben b'a num ntshùa tsemo' mbale. Yen mbat là nsi nèn tù tshùa nkônga fa, njoṅ ngôngô fa ke nkù nda' nèn bwe.

³ Ntumntum nsi nèn bwe bwoṅ, ke ntshob ndù: Bin se' be ko' nèn num mbat Tshùaben, ntùm ndà Nsi Yakob, ndù a la'te be tse manze, be ke nzin num tse ntshagnze. Nummbe ntshù' nsi tum Sion, ntshob Tshùaben tum Yérusalém.

⁴ A nsi be ngayab kam netèt ngôngô, be ngatshagte ntumntum yàme. Bo nsi lo' ṅwi tshob tswe nsofa' yi, lo' nkô mub tswe mbitshwèt mub yi. Mo' ngô ke nsi bèn tsho' ṅwi num mo' ngô; nezi'te nema' ntsho ke nsi bèn be.

⁵ Tunndà Yakob, bin se' bag bin zin ntùm nelàn Tshùaben.

Lé'njù Tshùaben, lé' netsho'te ntsha

⁶ O ghua' kua' yu nzwit mèn, tunndà Yakob kua' nenùne, nummbe matnu ba bag ntumnyam gha' mbu ntùm bwe. ghaka be bwe, mba netèt ba Filistia là; bo wat kàn boa ghùn.

⁷ Silba bo gol yàm ntùm ngô neshu, tshunkàb be kà nga' mbu. Nyàmdiaṅ boa nkalig dun ntùm ngô.

⁸ Neto lo' dù' fa ntùm ngô. Bo tshwèt ngwù nsi mbwe mfa' mbu mube, mbwe ju ze ntu mbu mub nabte là.

⁹ Bo nsi biagte ben nke'nke'e, kôg ben ndùbndùb fà nsi. O ke nsi ghù ntù lagte.

¹⁰ Tsho ntùm ngabndoṅ, lem ntùm tsha'a, ndù o tum ntshu tshùagntù Tshùaben bo nelàn nkuni mi mi a ziag là.

¹¹ Bo nsi kôg ngaka'te fà nsi, so tuswe tu ghako'tewut. Nda' Tshùaben bèn bù' tu i tù sen lé'njù là.

¹² Nummbe Tshùaben tàndà ntsho nsi ghù mo' lé'njù, yab nge' num ghako'tewut boa ghaka'te, kôg yub fà nsi.

¹³ Tshùaben nsi lo nsi num sédra mi a Liban ndù a sage, nèn tù là, lo nsi num ntshalon mi a Basan nà.

¹⁴ Tshùaben nsi lo nsi num njoṅ mbat nesag fa boa njoṅ nkônga neṅate fa.

¹⁵ Tshùaben nsi lo nsi num mba' mi a sag là boa njoṅ kàbngô fa tse bo kut là.

¹⁶ Tshùaben nsi lo nsi num nsitima Tarsis boa njoṅ tshu fa ts'a be mbwô num miag là.

¹⁷ Tuswe nsi ko ngako'tewut, ngaka'te nsi kôg vù nsi. Nda' Tshùaben nsi bèn bù' tu i nsi sen lé'njù là.

¹⁸ Njoṅ neto fa ke nsi bèn be.

¹⁹ Bo nsi tsho ntùm ngabndoṅ mba ntùm tsha' z'a tsho neshu là. ndùlala ndù bo le' tshùagntù Tshùaben bo nelàn nkuni mi mi a ziag là, ndùs'a nsi lo nsi kag bwôg num nsitsha' là.

²⁰ A nsi be num sen lé'njù là, benntùn ghua' neto silba boa neto gol tshob tse bo nabte neke ngamte là, ba tshetku boa ba neleme.

²¹ Bo nsi tshote ntùm mfé' ngabndoṅ, boa ntô ndoṅ, ndù bo le' tshùagntù Tshùaben bo nelàn nkuni mi mi a ziag là, ndùs'a nsi lo nsi kag bwôg num nsitsha' là.

²² Bin tsin neyab ntù num mènntùn, ze nda' ywèt bèn nke ntum ntselag i là. Kua' ke ze mènntùn ku'ni neghù à?