Esaya 19 - NTSHOB NSI

Nkembàn num Egipto

¹ Ntshob Nsi num Egipto. Tshù Tshùaben l'a tshwèt nse' Egipto, ndù a ko' num ndot z'a tshwèt nèn ndende ta là. Neto tse bo Egipto là tshwèt mvètte mbwe i, ntù ba Egipto kôg ntam ntùm bwe.

² Me nsi fà juntshùag bu mén Egipto, a lo' nde' mén Egipto yi. Mèn nsi ma' mfèl i ntsho, mèn nsi ma' nshun i ntsho. Ta' tusô nsi ma' mo' ntsho, ta' nufen ma' mo' ntsho.

³ Tu Egipto nsi tshu'u, me biagte ze nezete. Bo nsi bètte ba neto boa ghaka nu, bètte ghangàm boa ghabètte fe ben nu.

⁴ M'a' fà Egipto mum mbu mfen z'a be ntshùag là. Ta' mfen kebwô nsi tô i, Tshùaben tàndà ntsho bèn ntshob ndùlala.

⁵ Dibantse nsi jume, ta'ntse jum kà ntshwa.

⁶ Ntse mi a ntùm bontsit ntse là nsi b'a mi kebwô, nku ntse mi a be Egipto là kôge, njume. Ba nkewakob boa nka'nesoṅ nsi labe.

⁷ Njoṅ nenà fa ts'a mbaṅ ta'ntse, tshen nà ts'a be ngaṅ bwe boa njoṅ tshen nà fa bo dù' num nkaṅ mi là, njoṅ i fa nsi labe, vùte nsi, tù' mbabe, bèn mi ze ndùlala.

⁸ Ghaghom ngontse nsi tsham zwe; njoṅ ghama' lub ntùm ta'ntse fa nsi làn wut yub. Nu nsi tshùa ben bo ke ma' mbunjà ntse là.

⁹ Tuswe nsi ko ghaba' Silik fôgtab boa nzwe fôgtab.

¹⁰ Ben ndùbndùb ntùm ngô nsi b'a ntùm nge'. Njoṅ ghalo' nkàb fa nsi nywine;

¹¹ fenfen Soan b'a kagni. Tse kum ghafà ntag Faraon fa b'a ba tshen. B'o kagtùn netshob Faraon ndù: Me b'a nshum kum benntùn, nzwit fenfen tse bo be mbwe là ndù ke?

¹² Tsho kum benntùn mbit là yà, bo la'te tshu ts'a nsi là, be lèn ju ze Tshùaben tàndà ntsho jù' neghù mum Egipto là.

¹³ Fenfen Tsoan b'a mbabune, fenfen Nof b'a ghafùte wut tshobe, fenfen tse bo ntùm tse bo tum ntùm nzwit nzenze là tshwèt ntshag Egipto tshwèt.

¹⁴ Tshùaben ma' ywèt tamnsi netèl i, ndù a ghù ba Egipto ke nzwiaṅte ntùm ngùninu mub fa, nke ngù mba mbumndu' be nzwiaṅte ndùs'a ywi' là.

¹⁵ Egipto ke nsi ku'ni neghù ju ze tu bo nkum ghù là, ju ze tshaten bo nka'nesoṅ ghù là.

¹⁶ Egipto nsi be sen lé'njù l'a mba bènnzwi là. A nsi bètte bèn bwôg ndùs'a nsi yen nu bu Tshùaben tàndà ntsho, z'a nsi bù' nsi num i là.

¹⁷ Ngô Yuda nsi b'a tunu bwôg Egipto. Bwôg nsi ghom i ndùse bo nsi yoṅ tshob yi là. Yen nà b'a nummbe Tshùaben tàndà ntsho jù' i.

¹⁸ Num yen ngelaṅ nà, ntusô ntàn ntùm ngô Egipto nsi tshob à ntshob Kanaan, ke lo' à lén Tshùaben tàndà ntsho kàn mfe yi: Bo nsi tswi lén semo' tusô là ndù tusô sate.

Tshùaben a' yate ba Egipto

¹⁹ Tshùaben nsi ghù ta' tômbwôg netèt Egipto num yen ngelaṅ nà. Bo bèn mbom ta' ju ndùnsi num lén Tshùaben.

²⁰ Yen nà nsi b'a ta' lèn bo ta' kwénta num Tshùaben tàndà ntsho ntùm ngô Egipto; bo nsi kua' tsiaṅ Tshùaben num ben tse bo tshwèt ma'ni yub là, a tum ngayôg yube, ngatshu' yub z'a nsi kwé yub là.

²¹ Tshùaben nsi la'te wul i ba Egipto, ba Egipto lèn i num sen lé'njù là; bo nsi fà tshule'te Nsi boa tshu bwôntù, ghù ba nka'ni bèn zwiagte.

²² A ndùlala, Tshùaben nsi lab ba Egipto. A nsi lab yube, là bèn tshwinte yube. Bo nsi bèn njam tèt Tshùaben, a ju' nze yub njate yube.

²³ Be kua' num yen ngelaṅ nà, ta' manze nsi lo Egipto nèn Asiria. Ba Asiria nsi ke nèn Egipto, ba Egipto ke nèn Asiria. Ba Egipto boa ba Asiria nsi fa' Tshùaben.

²⁴ Num yen ngelaṅ nà, Israél z'a b'a mbatte tat là nsi tamte num Egipto bo Asiria, tshen ngô li ghù mbotni netèt nsitsha'a.

²⁵ Tshùaben tàndà ntsho nsi naṅ mbotni num bo tshob ndù: Mbotni be Egipto, ngô àm, mbotni be Asiria z'a be fa' mbu màm nà, mbotni be Israél, ju ntsi' àm.