Esaya 18 - NTSHOB NSI

Nete bu num ghantum ba Etiopia

¹ Wù tsha' tse tshuntshùag tshwèt nkua bwe là, tsha' ts'a be yoṅ nta'ntse mi a be Nubia là.

² O be ntshag ghantum num dibantse, ntùm nsitima bo lo' nkewakob nabte yi, a nke nda num ntse là! O be ntshob bo ndù: Ghantum tse wut tshob fùag, bin nèn mbaṅ neta ngô, ngô ngù', mbaṅ nduku ngô là z'a b'a mb'a be fe mb'a be ze là. A b'a neta ngô, ndù a num ntô tsemo'o. Nta'ntse kebte yen ngô là.

³ Njoṅ zin fa bin num ntswe num tsha' là, bin yen keki là bo te mfe num tu ba mbat là. Bin ju' nta là ze bo tshwèt ntô là.

⁴ Nummbe Tshùaben tshob me ndù: Me be ntswe ntùm dù'ntswe àm ndù kam, nke njen ntùm làn z'a ké' num ta' mbwô lé'njù là, nke njen mba ṅam meme' tshwèt ntôg ndù netsho' tshu là.

⁵ Nummbe bo nsi lo' ṅwi keb mbu ntù yi, féte ntù ndu', fagte; yen nu là nsi b'a ndùse ntù ndu' sàme, mfi' ntàm mi là. Sen fa' li nsi tôg kà ndù netsho' tshu ku'u.

⁶ Bo nsi yèn njoṅ i fa ghammàtat tse bo num mbat là, nyàm tshwèt tse bo tômbo' là; ba ghammàtat nsi ghù jujù yub yi ndù dum, nyàm tshwèt tse bo tômbo' là ghù jujù yub yi ndù sàne.

⁷ Bo nsi fà tshu bwôntù Tshùaben tàndà ntsho yen ngelaṅ nà. Neta ngô, ngô ngù', nduku ngô là z'a be mb'a be fe mb'a be ze là, neta ngô ndù a num ntô tsemo'o. Nta'ntse kebte yen ngô là. A yen ngô là bèn nèn tshu bwôntù dù' ze lén Tshùaben tàndà ntsho be là. A b'a num mbat Sion.