Esaya 16 - NTSHOB NSI

Ben bo kù ndem Moab là

¹ Bin tum njùmbwe mèn ndùb ntùm ngô. Bin tswe Séla ntum tshen njùmbwe l'a nze kônkwa, bin tum yub num mbat tusô Sion.

² Ngonngon Moab nsi be dut Arnon b'a mba ta' saṅ s'a tshwèt nkù la' là, mba nsaṅ mi bo kam yub nkàn, tu tshob tshu', bo nke nkù nèn bag bag là.

³ Ba Moab bètte ba Yérusalém ndù: Fà ntage, ghù nunetsine, lo' netshaṅ o nkabte yag yi nka mbwôgtshù mba tèttswe' là. Lem ben tse bo tshwèt ndiag yub là, kà to tun nkùla'.

⁴ Bam ndù ze Moab z'a kù la' là tswe la' o. A bwô ndù o kabte yub num nesate dù'. Nummbe nema'ni nsi tsine, nesate dù' nsi mi; mèn z'a na' ndo' la' là ke bèn mbe.

⁵ Diaṅkwa nsi ta nsi njam bwôntù. Mo' ngatsho'te, nshun nu ndaṅndaṅ, ngakô nunetsin nsi tswe num diaṅkwa là yàme, ntùm ndà David.

⁶ Bag lèn ko'tewut Moab, ko'tewul i z'a zi neshu là, ndèn ze ta'te bo neṅwatewut, ndèn mi nta'nsoṅ bo mi ntshob fùte.

⁷ A bwô ndù Moab làn wul i, a bwô mba zit mèn no làn Moab. Ṅ, bin làne, ntsham zwe mba bin bi makela' nkun z'a fe mfe Kir-Haréset là bin tshwèt ntsham zwe mba Kir-Haréset tù' fam, ngwù kua' koṅkoṅ nà.

⁸ Nummbe tse nà Hesbon jum tshwèt fa, fenfen ngôngô lo be'te ntù ndu' mi a be Sibma là; mbu ntù là lo ke nyit tà nkum Yaezer, nke ndam tà nkum kônkwa. Nkaṅ mi lo ke nsage, nèn tà nkum yoṅ dibantse.

⁹ A ndùlala me tshwèt ndàn bag Yaezer num tù ndu' Sibma; me tshwèt ndo' ntsenyà màm nzwi' zin yi me Hesbon, me Eléalé! Nummbe nkua' soyé se' num zin ngelaṅ netsho' tshu, mba ze nekab tshu.

¹⁰ Tsiaṅte bo ṅwate ke' bèn mbe tshwèt. Nkwi boa tsiaṅte ke' be ntùm nà ntù ndu'! Ghatshàb ndu' ke' bèn netshàb ndu' ntùm nkab. Me bètte ndù tshu'te tsiaṅte tsine.

¹¹ Ndùlala me tshwèt nzi' num Moab à mba loṅ nse' num nzi' là, ndém àm nke ntam à mum Kir-Harès.

¹² Moab tshwèt ndab wul i nke nèn ba mbwe', nke nèn ntùm dù' nele'te nsi, nke nde'te nsi, mbe ndù sàm ywimte ke nsi se' yi.

¹³ Men ni b'a ntshob mi Tshùaben na' ntshob num Moab fe ndùke lo là.

¹⁴ Ndonni Tshùaben bèn ntshob nu, a nsi be kum ngu'njù tat, tse bo siaṅ à mba ngu'njù ngalo' nkàb ṅwù là, ze mba' Moab fi. A be ze mba' zi be ndùke lo là, mb'a nsi tù' ju banban. Ntshùa ze mba' z'a nsi tù' là ke nsi bèn tum sàm ju.