Esaya 14 - NTSHOB NSI

Nsi a' ko ndèn ben tse

¹ Nummbe Tshùaben nsi ko ndèn Yakob. A nsi bèn tsho' Israél. A nsi bèn te yub ntùm ngô yube; Ba ghùn nsi tsho num bo, boa bo tamte num tunndà Yakob.

² Ngôngô nsi nèn diag yub, lo' yub bèn yi la' bo. Tunndà Israél nsi tô yub ntùm ngô Tshùaben, bo nsi b'a ghafa' tse bandum mba tse bènnzwi; ben tse bo na' ndo' yub ngù nkuan yi là nsi tù' kuan mum mbu mube. Bo nsi tô ben tse bo na' nke ma'ni yub là.

Ze nemiagte mfen Babilon

³ Ndùse Tshùaben nsi fà fite wù, mb'o bole, mb'o ghùtni wul o, mb'o yen nge' neshu ntùm ndà kuan z'o tsiag bwe là,

⁴ mb'a bwô ndù o yob sen kwi li num mfen Babilon, ntshob ntùm bwe ndù: Tshù là! Nduku ke' bèn mbe, nema'ni tsin!

⁵ Tshùaben be' zwit ghatshùagntù, mbe' shua' ghatshagte.

⁶ Mèn z'a na' nke ndab ngôngô ntùm tshùagntù i, nke ntsham ke tsin nà, mèn z'a na' nke ndo' fa ntô ngôngô yi ntùm yantù i là, bo te njam i, mbe ndù a ke nsi tum bwe.

⁷ Njoṅ nsitsha' fa b'a ntùm fite bo mbétni, nke ntshag nze tù ntùm kwi ṅwate.

⁸ Mba ntù tô boa sédra Liban b'a ntùm tsiaṅte mb'o vù là. Fe mb'o na' ngwù là, sàm mèn ke' to' bèn nko' nse' keb yage.

⁹ Ngô fe ben tshwèt nyi'te bam tsha'a, nke nabte nelo' o ndùs'o ṅwag là. A tshwèt mbam ben ndùb tse bo na' nkwù là, ben ndùbndùb tse bo na' mbe num nsitsha' là; a tshwèt ntsho' fenfen num ndiaṅkwa mube, njoṅ fenfen ngôngô fa.

¹⁰ Njoṅ fe ben fa lo' ntshobe, ntshob ndù: Tshù o là o tù' mèn nebot mba bag là, tshù o là z'o fute yag là.

¹¹ Nkuni mu swe' nèn ntùm ngô fe ben, boa nze ndoṅ ntùn. O nô a num ywèt, ywèt bèn ntù' be yu nzwe mfùag.

¹² A b'a ndùke! Tshù o là z'o tsho' tù ngwù nsi là, sa se neké'é, mbe mén mfôgnjù! Bo lab o ma' nsi, wù z'o na' nte ku tu ngôngô là.

¹³ O lo ke ntshob ntù o ndù: M'a' ko' nèn kamànyam, nte diaṅkwa sàm mfe num nsa maṅwù Nsi; m'a' tswe num tu mbat mbumte, num tôg i z'a be tu là.

¹⁴ M'a' ko' num tu ndot, me nsi be ndaṅndaṅ mba Nsi z'a tà mfe tù là.

¹⁵ Là, bo lo tèn o ma' ntùm ngô fe ben, tà mà tun bam tô.

¹⁶ Ben tse bo be njen o là num nte miag num o, ndôt'o kua' mebwô, ntshob ndù: A kua' mèn z'a ke nyi'te njù, nke ngù nufen nzenze nke mvètte li à?

¹⁷ Z'a ke ndo' njù nkaṅ kônkwa yi, nke nsate ntusô, ke be kag ghandàtsha tse li à?

¹⁸ Njoṅ fenfen ngôngô fa, mba zit lo netèt bo lo' à ghamte kà nke mfite yi ntùm se fi.

¹⁹ Là, tu wul o, bo lo ma' o ngùanesà mbaṅ fi so, mba ta' ntshùatù ze bo wage, mba ta' fe mèn netèt ben bo wat yub ṅwi, ma' fe tshob num ndoṅ ta' tô, mba ta' fe ju ze bo nyaṅte nku là.

²⁰ Bo ke' yab o mbaṅ bo ntùm fi, nummb'o lo sate yu ngô, mbiagte tsho ben. Bo ke nsi zi bèn tshob nu fà num nzwit ghatshùagntù.

²¹ Bin nabte wut nezwite nshumnshum, num mfànnu tà tshobe! A ke' bwô bo bèn ndo nsi, ndo' njù, nkut ntusô num nsitsha'a.

²² Tshùaben tàndà ntsho tshob ndù: Me nsi lo nsi num bo. Me nsi biagte lén Babilon bo ntshùa mi, biagte nzwil i bo tunndà i. Tshùaben bèn ntshob ndùlala.

²³ Me nsi lo' i ghù nkàn bu'nyàm yi bo ta' ntshe'. Me nsi lo' swandà sate dù' bét'é yi. Tshùaben tàndà ntsho bèn ntshobe.

²⁴ Tshùaben tàndà ntsho tshob nsaṅlaṅ bwe num yen nu là ntshob ndù: Ṅ, a nsi bumte mba me tshob là, ju ze me jù' là nsi bumte.

²⁵ M'a' be'te ze Asiria ntùm yàm ngô, m'a' nyiaṅt'é nku num tshàm mbale. M'a' so kele' se tô ben tshàm, ndé' ze lèt num nkembe' yub ndo yi.

²⁶ Tshù mba me jù' num nsitsha' fa là, tshù mba me nyit bu àm mum ngôngô là.

²⁷ Tshùaben tàndà ntsho jù' ndùlala, we z'a ghù netshob nu bwe à? A nyit bu i, we z'a ghù nekaṅ bu i à?

Nema'ni ba Filistia

²⁸ Men ntshob Nsi li na' mb'a ngu'njù mfen Akaz kwù là.

²⁹ Kà ngô ba Filistia tsiaṅte, mba shua' s'a ke ndab i be' là! Nummbe swenyu nsi tum num nzwit nyu, ju ze swenyu bwe ze là be mbanyu z'a num mfùt là.

³⁰ Ben nke'nke' nsi ghù jujù yàme, bwoṅbwoṅ zi ntùm fite, là me nsi lo' nziku' zwi nzwil o yi, zwite tshé' tse ts'a tù' là.

³¹ A bwô ndù ngô tsham zwe, tusô làn wul i; ngô ba Filistia fa vètte, nummbe nzembwôg tshwèt nswe' tu nse'e, ghakeban tam à kua' ntsha' ka nke nse'e.

³² Ke ze bo nsi bùnte tshob ghantum yen ngô l'à? A bwô netshob ndù Tshùaben bèn nte Sion mba ndù ben nke'nke' ntùm ze ngô be mfon ndàlem à bwe.