Esaya 13 - NTSHOB NSI

Nkembàn num Babilon

¹ Ntshob Nsi mi a na' nda'te Esaya nshum Amots, num Babilon nà.

² Bin te ta' keki num mbat ze ju ke' be bwe là. Bin tshag nze zin bo, bin ma'te bu bo, bo tôg num nzendà ba nduku.

³ Me fà mfa' yàm ntshu ntsho nelàne, m'a tsiaṅ yàm ntshu ntsho num yantù àm, m'a tsiaṅ ba sa'nde'e; bo be ṅwate num nkuni màm mi a zi neshu là.

⁴ Mo' tshu'te num mfe num tu ba mbale, mba tshu'te mo' bwoṅ benntùn. Bo tshwèt nju' tshu'te nufen boa ngôngô tse bo tse'te là. Tshùaben tàndà ntsho ke ntsha' à ntshu ntsho z'a nsi nèn ma' ntsho là.

⁵ Bo fet'a ntùm ngô z'a sag là, bo fet'a num ntôg njù. Tshùaben boa tshu yantù i nsi biagte yen bag ngô là.

⁶ Bin tsham zwe, nummbe lé'njù Tshùaben ghebte. A tum num bin à mba nge' ze Nganeta Ntshùate se' yi là.

⁷ A ndùlala ze mbu yube, ntù mba zit mèn no tum nà.

⁸ Bwôg ghom yube, ntànntàn tshùb bam sobe, ya mem yube, bo nke ndù' wut yub mba mènnzwi z'a tshwèt ndùbte là. Bo tshwèt nke ndôte wut tshob bo bo, miag mub nke mba tu bo.

⁹ Tshù lé'njù Tshùaben li a se' là, lé'njù bag, lé'njù yantù bo tshùagntù kebwô. Sen lé'njù là nsi lo' tsha' kaṅ kônkwa yi, biagte ben kebwô fa.

¹⁰ Ke nsa maṅwù, ke mo' bwoṅ nsa là lo ke nsi bèn ké'te yub nelàne; lagnyam nsi tam njam a kua' ndùs'a yoṅ tum tù là, maṅwù ke nsi bèn fà nelàn i.

¹¹ M'a' naṅ ntsha tu njù num ngùninu mi, naṅ ntsha tu ben kebwô num nukebwô yub. M'a' mem ntshu ghako'tewut, nkôg ba nduku ntùm ka'te yub.

¹² M'a' ghù neyen mènntùn ta ntshùa gol mebwô, nta ntshùa gol z'a fe Ofir là.

¹³ A ndùlala ze me nsi nyi'te kamànyam, tsha' kumte tà tun bwe là. A nsi b'a njam yantù Tshùaben tàndà ntsho, num lé'njù tonkèt tshùagntù i.

¹⁴ Mba we lo nsi kaṅ wul i kù nèn mbaṅ ze nzwit mèn, nèn ntùm ze ngô, nummbe bo nsi b'a mba bwoṅ nyàm ze ngabéb yub ke bwe là, mba nga' ze tu i tshu' là.

¹⁵ Bo nsi tamte ben tse bo tèt yub nsi là, watte ben tse bo tshùb yub là.

¹⁶ Bo nsi zwite bon tshob kua' num miag mube. Bo nsi lagte ndà tshobe, lo' zwi tshobe.

¹⁷ M'a' tènte ba Media, bo lo nsi num bo, bo ke' be lo' silba mba mo' ju là, ke be ghe'te tshob gol.

¹⁸ Nkét mub nsi zwite ghuan benntùn, bo be ndèn ke ko vù num ju z'a tum bam mènnzwi là. Lag sob ke nsi kô neyen bon.

¹⁹ Ndùlala Babilon z'a be tôgtse nufen nzenze, mbe ntshèn mi a be ngù ba Kaldéa ka'te là, nsi b'a mba Sodom bo Gomora tse Nsi na' nsate yub là.

²⁰ Mèn ke nsi bèn tswe bwe, benntùn ke nsi bèn be bwe, ze Arab ke nsi bèn te ntàb i bwe. Ghabéb nyàm ke nsi bèn ma' bwoṅ nyàm tshob bwe.

²¹ Nyàm tse bo kônkwa là nsi te ndà bwe, ba bwe' nsi tswete ntùm mba' mi dune. Ba ntshum nsi lo' la' ntùm mba' mi, mfot mbwe ke ntam ngùa bwe.

²² Ba nka'ghun nsi ke kua' ntùm mba' mfen, ba mbù tshwèt ke ntshu' ntùm mi mba' ngùa. Ze ngelaṅ tshwèt ngebte neku'u, tse lé'njù ke nsi bèn sage.