Esaya 10 - NTSHOB NSI

¹ Ndon tu ben tse bo be ndo' ntshù' kebwô là, mbèn mbe tu ghakite ntshù' tse bo be ndo' nkàn mi a ke' tsin nà.

² Bo be ntshùa bwe nke nga nunetsin bwoṅbwoṅ. Bo num nga ju ze ghayennge' ku'ni nekwé ntùm ngô àm nà. Bo num mfétte fôg bènnzwi, nke ndag ntsha' bontse.

³ Bin nsi ghù à ndùke lé'njù se nenaṅ ntsha nsi se' à? Bin nsi ghù à ndùke nevù z'a fe à ngùanesà nsi kab mbu num bin nà? Bin nsi nèn bètte ywimt'a we? Bin nsi lem zin nkàb à yà?

⁴ Mb'a b'a nda' neket lèt netèt kuan ntsho, ke nevù fe ben no. Mba tà ndùlala ntù i ke' yoṅ mfite. bu i ke' à be nenyile.

Ndon tu Asiria bo mfen i là

⁵ Ndon tu ze Asiria, z'a be shua' yantù àm nà, z'a be zwit se tshùagntù àm tshùb bu i là.

⁶ Me lo tum i mum ngô z'a ghù nukebwô là, me lo ma' i ntùm ngô z'a ghù ntù àm ya là, ndù a lagte yen ngô là, ṅwat ntsha', ndù a nyiaṅte yen ngô là nku mba bo num nyiaṅ netob num manze là.

⁷ Là Asiria ke' ghù ts'a ndùlala; a ke nkwate z'a be z'a ntù i là. Ze nkwate b'a ndù a sate, mbiagte ngôngô yàme.

⁸ Nummb'a be ntshob ndù: Kamkam tshàm ke' b'a fenfen njoṅ yub fa ké?

⁹ Nu a na' ntsho Karkémish là ke' tsho Kalno ké? Nu a na' ntsho Arpad là ke' tsho Hamat ké? Nu a na' ntsho Damas là ke' tsho Samaria ké?

¹⁰ Ndaṅndaṅ mba bu àm na' ntshu ntù nufen tse bo ghù nsi neto, neto be bwe ntshùa Yérusalém bo Samaria là,

¹¹ ndaṅndaṅ mba me na' ngù num Samaria boa nsi neto tse là, me ke nsi ghù mba num Yérusalém boa neto tse be ndaṅndaṅ ké?

¹² Là, ndùse Tshùaben nsi miagte njoṅ fa' se fa num mbat Sion mba Yérusalém nà, mba tu wul i nsi naṅ ntsha tu nkwate ko'tewut mfen Asiria boa ta'te mba ka'te ts'a ghù ntù i là.

¹³ Nummb'a tshob ndù: Me lo' à neta z'a tum bu àm nà kà ngù yi, ndo' à zenu àm kà ngù yi, nummbe me b'a ngasiaṅte; me lo tsho' ndùnsi ngôngô nkù'te yi, ndagte njoṅ tshunkàb tshob fa. Me lo tèn ben bo tswe ndiaṅkwa là ma' nsi, ngù a mba ta' sa'nde' là.

¹⁴ Me kab mbu num tshunkàb ngôngô, mb'a b'a ta' nkàn saṅ nà. Me lo kùmte njoṅ njù nsitsha' fa mba bo be nkùmte mbum mi bo ghua' là, sàm ta' i mba ntshù' ke lab bàb se, ke gha' ntshu i, ke kua'.

¹⁵ Be njàm nke nyàmte wul i mbwe mèn z'a tshwèt ndo' i mfa' yi là ké? Sô ngakom ntshwèn ghù neka'te mbwe mèn z'a tshwèt nkaṅt'é là ké? Mb'a tswe à mba shua' bèn nke nyi'te mèn z'a bù' i tù là. Mb'a tswe à mba zwit bèn nke mbù' bu mèn z'a tshwèt nshùmt'é là.

¹⁶ A ndùlala, Tshùaben Nsi, Tshùaben tàndà ntsho nsi zwite tse neta soyé, mbwôg bèn ndo ntùm nkuni mi, be mba ta' mbwôgnga là.

¹⁷ Nelàne Israél nsi tù' ta' mbwôge, ze Mèn Nelàne be ta' lambwôge. A nsi kù bèn biagte njô boa kwékwénàndô num ta' lé'njù ntshù'.

¹⁸ A nsi kù wut mba ntù, ghamte fèn se bo ze tshwèt. A nsi tù' b'a mba ta' ngangokèt z'a vù, ntshù mi kôg là.

¹⁹ Bo nsi siaṅ tshé' ntù mi a tù' ntùm fèn se là kà mba metsit mônke' kite njoṅ i.

Mo' tshé'é nsi se'e

²⁰ Tshé' Israél boa ben bo tum ntshu vùkob ntùm tunndà Yuda là, nsi be ke bèn njé'te num mèn z'a ke ndab yub là num sen lé'njù là. Bo nsi yé'te num Tshùaben, Mèn Nelàn Israél yab ntù num i.

²¹ Tshé' i nsi bèn njam, tshé' Yakob, se' tèt Nsi Nganeta.

²² Israél, a be ben tsho yàm be mba nkwango' dibantse là, mba nda' metshé' i nsi bèn bène; m'a jù' nesate dù', a nsi ghù nunetsin dun ntsho' ntshèt.

²³ Yen nesate là z'a na' njù' nu tse là, tu wul i Tshùaben Nsi, tàndà ntsho nsi zwiagte yen nu là ntùm ngô fa.

²⁴ A ndùlala Tshùaben Nsi tàndà ntsho tshob ndù: Ngô àm, wù z'o be ntswe Sion nà, kà bwôg Asiria. A num ndab o shua'a, nke mbù' zwit se nsi num o, mba ba Egipto na' nke ngù là.

²⁵ Là, a tù' metsil i me be ke bèn naṅ ntsha tu mèn, a tshùa ndùlala yantù àm kaṅ njam num i, me biagt'é.

²⁶ Tshùaben tàndà ntsho nsi shùmte shua' num i, ndaṅndaṅ mb'a na' ndab Madian num gholoṅ Oréb là, ndaṅndaṅ mb'a na' mbù' kôg se num dibantse là, a nsi bèn bù' i be mb'a na' mbe Egipto là.

²⁷ Lèl i nsi lo num nkembe' o num sen lé'njù là, kele' se nsi tum tô o num sen lé'njù là. Nzit nsi ghù kele' fiage.

²⁸ A be nzin num Ayat, ndut tusô Migron, mfaṅ tshu tse Mikmash.

²⁹ Bo num nyiaṅ nka, nzi Guéba; Rama nke nyi'te. Guéba Saulo tsho' kù.

³⁰ Ngon Gallim, tshag nz'o tù! Lais, a bwô ndù o zete!

³¹ Anatot, ndon be tu o là! Madména sate, ba Guéba tsho' kù.

³² A tsin Nob ta' lé'njù, a shùte bu i num mbat tusô Sion, num kônga Yérusalém.

³³ Tshù, Tshùaben Nsi tàndà ntsho là z'a tshwèt ndo' tshùagntù mbe'te nkaṅntù yi là: Bo ke' mi ndùb à neke'e, mfagte mi nke' à nefagte.

³⁴ A nsi lo' tùn tshu'te mbu ntù yi ntùm fèn, Liban vù nsi tun nku Nganeta Ntshùate.