Efésô 5 - NTSHOB NSI

Ntag num yôg nelàne

¹ Ndùlala, bin be ghafi'te Nsi, ndaṅndaṅ mba bon tse Nsi kô yub là.

² Bin zin ntùm nkôni mba Kristô na' nkô zin mfà tu wul i num tu be mba jule'te Nsi, mba ju neghamte Nsi z'a lamte mebwô là.

³ Là, a ke' bwô ndù bo tswi lén nu nekale, njoṅ yôg ṅu' fa, ke ze'te lo netèt bin, nummbe bin b'a ben nelàne.

⁴ Kà nko'nko' ntshobe, ntshob kagni ke ntshob komzwi lo be netèt bin, a ke' ywimte, là, a lo mbwô ndù bin le't'a Nsi.

⁵ Bin lèn mebwô ndù njoṅ kattù fa, njoṅ yôg ṅu' fa, ke njoṅ ghaze'te fa lo, bo b'a ghaghamte nsi neto; ke ghù yub bag i ntùm nufen Kristô mba Nsi.

⁶ Kà sàm mèn tatte zin ntshob banban. Nummbe tshen tshu là bèn nke ngù kà yantù Nsi nse' num bon tse bo ke' ju' ntshu i là.

⁷ Ndùlala kà bin à bo tamte num sàm ju!

⁸ A lo be ngelaṅ mbwe bin b'a njame, là ndonni bin b'a nka' num Tshùaben, bin zin mba bon nka' là,

⁹ nummbe ntàm nka' b'a njoṅ bwôntù fa, nunetsine, mba nenùne.

¹⁰ Bin lôt'a ju z'a bwô Tshùaben nà.

¹¹ Kà bin tsho mum mfa' njame, mi a ke' be yam ntàm nà, là, a bwô nekag tuswe tu bo.

¹² Nummbe a b'a tuswe netshob ju ze bo num ngù ntùm nelemte là.

¹³ Là nka' num nké'te njoṅ tshu fa tse bo kag tuswe tu i là.

¹⁴ Njoṅ ju fa ze nka' ké't'é là b'a nka', a ndùlala, a tshob ndù: Wù z'o tshwèt nzi là, bame, lo netèt fe ben, Kristô nsi ké't'o.

¹⁵ Ndùlala, bin zete kua' mebwô num mat ze bin tshwèt ndo' nzin yi là, kà bin zin à mba kagni là, là mba ghazenu là;

¹⁶ bin tshu' ngelaṅ, nummbe ba lé'njù ke' bwô.

¹⁷ A ndùlala, kà bin be kagni, là bin lèn ju z'a be ze Tshùaben nà.

¹⁸ Kà bin be mbum ndu'; a num mfà yôg kebwô, là bin dun ntùm Ywèle.

¹⁹ Bin tswe'te ntù tsin bin bin ntùm kwi ma'mbu, ntùm kwi nenyàmte mba ntùm kwi Ywèle, bin nyàmte, ma' mbu Tshùaben ntùm njoṅ ntù tsin fa.

²⁰ Nke ngamte Nsi mba Tà njoṅ ngelaṅ fa, num njoṅ tshu fa, num lén Tshùaben be Yésu Kristô.

Tunndà mènkristô

²¹ Bin ke nju'ni bin bin ntùm nebwôg Kristô.

²² Bènnzwi, bin ke nju'ni du tsine, mba bin num nju'ni Tshùaben nà,

²³ nummbe mandum b'a tu nzwi i, ndaṅndaṅ mba Kristô be tu ntse'te benkristô là; tu wul i b'a ngayôg wut,

²⁴ là ndaṅndaṅ mba ntse'te benkristô num nju'ni Kristô là, be ndaṅndaṅ bènnzwi ju'ni du tshob num njoṅ tshu fa.

²⁵ Bandum, bin ke nkô zwi tsin ndaṅndaṅ mba Kristô kô ntse'te benkristô, mfà tu wul i num tu i,

²⁶ ndùlala ndù a lànt'é, nsôg i ntse, ntùm ntshobe, nte i mbaṅ tu wul i ntùm nkuni,

²⁷ ndù a tsin mbwe i ke ṅu'u, ke be ndù a ṅu'te ke bèn ngù sàm mo' ju z'a fute yen ni là, là ndù a be nelàne, ke lo'.

²⁸ Ndùlala a bwô ndù mba bandum kô zwi tshob mba ko' tu wut tshob là. Mèn z'a num nkô nzwi i là ke nkô à ko' tu wul i.

²⁹ Nummbe sàm mèn ke' yoṅ nto' bàn ko' mbàb wul i, a num nabt'é, ndôt'é, ndaṅndaṅ mba Kristô num ngù ntse'te benkristô là,

³⁰ nummbe bag à bin b'a nkam wut mi.

³¹ A ndùlala, mèn nsi faṅ tàab mba màab, lat num nzwi i, ntu tshob bàa tù' ta' mbàb wut ntshù'.

³² Sen tsham ni b'a kua' se ndùb; me tshob yen nu li à num Kristô bo ntse'te benkristô.

³³ Mba ndùlala, mbe se' mba bin nà, a bwô ndù mba we lo ke nkô nzwi i mba tu wul i là, mènnzwi bèn nke mbwôg ndu i.