Efésô 3 - NTSHOB NSI

Tsham netsiaṅ ghakelèn Nsi

¹ A ndùlala, me Paulo, ngandàtsha Kristô Yésu num bin ghakelèn Nsi,

² me kwate ndù bin lo ju' fa' se kondèn Nsi na' mfà me num bin nà;

³ a lo tshùa num ju z'a la'te me là, ngù me lèn tsham se me lo nekite bin nda' metsili là,

⁴ bin a' be siaṅ i nku'ni nelèn mba me lo' nju' tsham Kristô yi là.

⁵ Bo lo ke la't'é bon benntùn ntùm zwiaṅ benntùn ts'a tôg là mba bo la't'é ndonni ghantum tse nelàn mba ghatshob ntshob Nsi ntùm Ywèt là.

⁶ Sen tsham nà b'a ndù mba ghakelèn Nsi be yub à jùndà, mbe be nkam wut ntshù' ngù yub bag i num nka'ni num Kristô Yésu njam nkùn mebwô,

⁷ ze me tù' ngafa' bwe njam ju ze kondèn Nsi na' mfà me ntùm fa' neta i là.

⁸ Me ze me b'a metsit mèn netèt njoṅ ben nelàn fa là, Nsi lo fà yen kondèn nà me ndù me tshob mfu' Kristô mi mènntùn ke' ku'ni neyen nà ghakelèn Nsi,

⁹ mba ndù me ké'te fa' tsham s'a na' ndem num Nsi, nganabte njoṅ tshu fa fe mbwe là,

¹⁰ ndùlala ndù ba neto mba ngù' tse bo mfe kamànyam nà tshùa num ntse'te Kristô, ndèn nzenze zenu Nsi ndonni,

¹¹ ndaṅndaṅ mb'a na' nabte ntùm nkwatenu mi tà fe mbwe num Kristô Yésu, Tshùaben be,

¹² ze be ghù fènntù num i, mba nenywinte nenèn mbaṅ Nsi njam bamntù ze be ghù num i là,

¹³ ndùlala, me le'te zine, kà bin bot num nge' tse me be ntùm bwe num bin nà; tshen nge' là b'a nkuni bin.

Nkôni Kristô ke' ghù ndù i

¹⁴ A ndùlala, me kwim ntunkekwi' màm mbwe Tà

¹⁵ ze njoṅ tunndà fa mfe kamànyam mba num nsitsha' num ndo' lén sub bwe là.

¹⁶ Ndù a fà neta bin ntùm nkuni mi mi ndùb, njam Ywèt tse, ndù bin ta num mèn ntùm bwe;

¹⁷ ndù Kristô tswe ntùm ntù tsin njam bamntù, ndù bin taṅ nga, ntsho nsi ntùm nkôni.

¹⁸ Ndùlala ndù bin ku'ni netshùb ju ze neghu' mba nesage, mba mfe tù mba mànjam nsi be yi là, bin à ben nelàn fa,

¹⁹ mba ndù bin lèn nkôni Kristô z'a tshùate njoṅ nelèn fa là, ndun njoṅ nedun Nsi fa.

²⁰ Ghamte be mèn z'a ku'ni neghù njoṅ i fa ntshùa mba be bètte, mbèn nkwate, njam neta i z'a num mfa' num be là,

²¹ ghamte be yi ntùm ntse'te benkristô mba num Kristô Yésu, num njoṅ zwiaṅ benntùn fa, njoṅ ngu'ngu' fa. Amén.