Daniel 9 - NTSHOB NSI

Le'te Nsi Daniel: Tshùaben, lagte

¹ A lo be num mbwe ngu'njù Darius, ze Media, nshum Asuérus z'a na' nsa' bag ngô Kaldéa là,

² a be mbwe ngu' mb'a be num fen nà, tu wul àm Daniel, me nke nsiaṅe, nke ntswe' ntun num Ṅwa'ni Nsi, njen ndù Yérusalém z'a vù là nsi tswe ngu'njù ṅam sammbàa, ndaṅndaṅ mba Tshùaben tshùa num ntshu ngatshob ntshob Nsi i Yérémia ntshob là.

³ Me kaṅ wul àm ndôte Tshùaben Nsi, ndù me le't'é, ma' mbu yi ntùm netswe nziku'u, netôg nke'bàm bo nese' bwembwôge.

⁴ Me lo ke nde'te Tshùaben Nsi àm, nke ntshob yi ndù: Tshùaben Nsi ndùb bo ze nekuni, wù z'o be ndé' kàn so, nke nko ndèn ben tse bo be nkô o mbèn nke nze ntshù' mu là;

⁵ bag lo ghù nukebwô, bag lo fàn nu, bag lo be ghatshùagntù, mbe ghatatu, nkag ntshù' mu bo ntag mu nsi.

⁶ Bag lo ke ju' ju ze ghafa' tsho ghatshob ntshob Nsi tse bo tshob nu num yu tu, na' ntshob fenfen tshage, kamkam tshage, tà tshage, mba njoṅ benntùn fa mum ngô là.

⁷ Tshùaben, nunetsin tù' fe à nda' wù. Mba bag là, nda' tuswe bèn ko yag sen lé'njù li, ba Yuda, ba Yérusalém, njoṅ ba Israél fa, tse bo ghebte mba tse bo be ngùanesà, ntùm njoṅ ngôngô fa ts'o sate yub ntshag bwe num mba bo ta tu wù là.

⁸ Tshùaben, tuswe ko à bag, fenfen tshage, kamkam tshage, mba tà tshage, nummbe bag lo ghù nukebwô wù.

⁹ Tshùaben Nsi yag, kondèn bo lagte tù' lôt'a nda' wù, nummbe bag lèn ndù bag ta tu wù.

¹⁰ Bag lo ke ju' nze Tshùaben Nsi yag, ke zin mb'a be mum ntshù' mi a na' ntshùa njam ghafa' tse ghatshob ntshob Nsi njab mbwe be là.

¹¹ Njoṅ ba Israél fa fàn ntshù' o, nkaṅ wut tshob ke ju' nz'o. Ndùlala ndon bo ngùtni ts'a be num ntshù' Mosé ngafa' Nsi là tsho num bag, nummbe bag lo ghù nukebwô num Nsi.

¹² A ghù ntshob mi a na' ntshob num bag mba num fenfen tse bo ke ntô yag là bumte. A ghù mo' mà nge' ndùb se' num bag, nge' ze lèn i ke' yoṅ nto' fut'é tun bam kamànyam nà. Lèn yen nge' là se' num Yérusalém.

¹³ Yen nge' là se' num bag mb'a be ntùm ntshù' Mosé là, là bag lo ke bu' mbu Tshùaben Nsi yag, ke lo' mvèn yag ntam mfànnu mag yi, ke kù' ntoṅ num nenùn o.

¹⁴ Tshùaben lo zi tshùalo num yen nge' là, ngù a se' num bag; nummbe Tshùaben b'a mèn netsin num njoṅ tshu fa ts'a be ngù là, là bag lo ke ju' nz'é.

¹⁵ Ndonni me Tshùaben Nsi yag, wù z'o na' ndo' bu o ze neta nsô yu nzwit mèn yi mà Egipto, wù z'o ghù lén so s'a kum sènni là, bag lo ghù nukebwô, bag lo fàn nu.

¹⁶ Tshùaben, tshùa njam kondèn o ze ndùb, nsô yantù o bo tshùagntù o mum ngô Yérusalém, mba num mbal o ze nelàne. Nummb'a tshùa njam nukebwô mba mfànnu tà tshag Yérusalém bo yu nzwit mèn tù' ju tuswe num miag ben tse bo diaṅ yag mbum nà.

¹⁷ Nsi yag, ndonni ju' le'te mba ma' mbu ngafa' o, ntshùa njam nkôni Tshùaben ngù ndù se o ké' num ndà o ze nelàn ze bo sate là.

¹⁸ Nsi àm, kù' ntoṅ nju'u, gha' miag mu njen mba bo sate yag njene! Tshù ngô ze bo be ntsiaṅ lén so mum bwe njene! Bag ke ke ntshùa à njam yag nunenùn kà nke ma' mbu wù, a b'a nda' njam kondèn o z'a b'a ze ndùb là.

¹⁹ Tshùaben ju'u! Tshùaben lagte bag, Tshùaben kù' ntoṅ, ghù ndende, ke ghubte. Nsi àm, ghù ndùlala num nkôni tu wul o, nummbe bo be ntsiaṅ lén so mum ngô o mba netèt yu nzwit mèn.

Gabrièl bo ngabnjù ṅam sammbàa

²⁰ Me lo ke nke' ntshobe, nke nde'te Nsi, nke mbam nukebwô àm bo nukebwô yàm nzwit mèn, Israél; me lo ke nke' ma' mbu Tshùaben Nsi àm, num nu mbat nelàn z'a be ze Nsi àm nà;

²¹ me lo ke nke' ntshob nu num yàm le'te Nsi, ndùse mandum, Gabrièl, ze me bwôgmbwe njen i mum njem, fùt ndende nkù' nse' mbaṅ àm nà. A na' mb'a ngelaṅ nefà ju bwôntù ze mfetnjù.

²² A tswit'àm, bag yi bèn ntshobe. A tshob me ndù: Me se' à ndù me gha' nkwatenu mu ndonni.

²³ Ndùs'o na' nto' nele'te Nsi là, mo' ta' ntshob tum, me se' soṅ o à yi. Nummbe Nsi kô o. Kù' ntoṅ num ntshob là mebwô mbèn nju' njem n'a bwô.

²⁴ Bo yab ngabnjù ṅam sammbàa num yu nzwit mèn mba ngô o ze nelàne, num neghù ndù mfànnu tsine, nukebwô mi, num nebiagte mfànnu, ndo' nunetsin z'a tswe matmat là nse' yi. Bo yab tshen ngabnjù l'a num neghù ndù njem ze ghatshob ntshob Nsi yen ntshob là bumte mba ndù bo yo' Mèn nelàn dù' z'a làn neshu là.

²⁵ Lèn ndùlala, nju'u. A be ndonni à ngabnjù sammbàa mba ntshob se' wù ndù bo nsi bèn kut Yérusalém nà. A nsi be ndùlala tà nkum ndùse Ngayo', Ngatshagte be là. A nsi be kum ngabnjù ntshob bàa ṅam ntôg bo kut ba dù', ntsiagte ba nsam. Là njoṅ i fa nsi tôg à mum ngelaṅ zwentù.

²⁶ Ngabnjù ntshob bàa ṅam ntôg nsi be tshùa bo biagte ta' Ngayo' z'a ke bèn mbe là. Mbe se' mba ngô bo mbwe' là, nzwit mo' mfen z'a nsi se' là nsi sate yube. Ze nemiagte nsi b'a mba ntse nedun nà. Nsi jù' ndù nesate bo ntsho nsi be tà kum num miagt'é.

²⁷ Benntùn yàm nsi ghua' kàn num ta' ngabnjù, jule'te Nsi mba ju bwôntù tsin num kam ngabnjù. Ngasate dù' nsi ghù tshu ts'a bag ntshùate là tà kum ndùse ngô tù' fam, ju z'a vù num ngasate dù' vù num i là.