Daniel 8 - NTSHOB NSI

Njem mbatte bàa; komnjù bo fot mbwe

¹ A lo be kum ngu'njù tat mba mfen Baltazar be num fen nà, me Daniel, me yen mo' njem, njam ze me mbwôgmbwe njen nà.

² Ndùse me yen yen njem nà là, a tswe mba me b'a Suse tètla' bag ngô Elam nà; ndùse me be mum njem nà, me tù' be tshù mb'a kaṅ ta'ntse Ulaï.

³ Me bù' miag màm ndôte, njen komnjù ndù a tsin mbaṅ ta'ntse, ndù a ghù ndô tu i; men ndô là lo sage, là mo' sag neshu ntshùa mo'o. Ndô z'a sag ntshùa mo' là bil à njam.

⁴ Me yen komnjù lo' ndô mi ntsham bag mbinyam yi, ntsham bag tu yi, ntsham bag ntèn yi. Sàm nyàm mba ntshù' ke bù' tu nsi mbwe i, sàm ju ke bèn nku'ni netum ntshu i. A lo ke ngù a mb'a kô là, nke nta ts'a neta.

⁵ Mba me ke nte lag num bwe là, me yen mo' fot mbwe s'a fe bag mbinyam nà, a nke nzinte num njoṅ nsitsha' fa, ke kwag tsha'a. Sen fot mbwe là lo ghù mo' ndô ndùb netèt miag mi.

⁶ A kù'te nèn mbaṅ komnjù se me yen a tsin mbaṅ ta'ntse ndù a ghù ndô mi mbàa là; a kù nde ndo' zwentù nèn yi num komnjù.

⁷ Me yen i a lo' à yantù nèn yi num komnjù; a tsham komnjù, mbe' ndô mi mbàa, komnjù ke ku'ni nebù' tu i nsi mbwe i. A ma' i nsi, nyiaṅt'é, sàm mèn ke ku'ni nekwé komnjù ntshu i.

⁸ Fot mbwe tù' tse nganeta, là ndùs'a tù' nganeta là, ndô i ze ndùb be'. Ndô ndùbndùb kuà ko' num ze dù' ndô ndùb, num bag njù kuà.

⁹ Mo' metsit ndô nke' lo tum num mo' ndô netèt tse kuà, nku' neshu nze bag mà ntèn, nze bag mbinyam mba nze bag ngô z'a bwô neshu là (yen nà b'a ndù nze Palèstina).

¹⁰ Metsit ndô là ku' tà nèn nkum num ntshu ntsho mfe kamànyam, ngù mo' bag yen ntshu ntsho là boa nsa vùte nsi; a nyiaṅte yub nku.

¹¹ A ku' tà nko' nèn nkum mba num tàndà ntsho, nsô jule'te Nsi ngu'ngu', mbèn nsate mba ze mbwe'.

¹² Bo lo swèn mba ntshu ntsho yi bo jule'te Nsi ngu'ngu' num mfànnu. Ndô nke' là ma' nunenùn nsi, ngù ndùlala sàm ju ke tshètt'é.

¹³ Me ju' Mèn nelàn nke ntshobe, mo' Mèn nelàn tshob z'a ke ntshob là ndù: Njem num jule'te Nsi ngu'ngu' bo mfànnu ngasate nsi ke be tà kum à zit ngelaṅ à? Bo nsi nyiaṅte mbwe' bo ntshu ntsho nku tà kum à zit ngelaṅ à?

¹⁴ A tshob yi ndù: A bèn ntù' nkebnjù bo mfetnjù ntsha' bàa ngù nkù tat, kà bo bèn ntsiagte mbwe'.

Ntote ntun njem mbatte bàa

¹⁵ Me Daniel, me nke nze yen njem nà, nke ndiag nelèn ntun mi, mbe yene, mo' mèn tsin mbwe àm ndù a ghù ntshù mènntùn.

¹⁶ Me ju' nze mènntùn kua' num ta'ntse Ulaï ntshob ndù: Gabrièl, tote ntun yen njem nà yi!

¹⁷ A kù' nse' nze dù' ze me tsin bwe là; ndùs'a se' là, me bwôg, ntum ngwù nsi kabkab. A tshob me ndù: Mén mènntùn, ju'u, nummbe yen njem ni ke ndôt'a miagte ngelaṅ.

¹⁸ Mb'a ke nke' ntshob me là, ndém àm tum, me ghô be nsi kabkab. A kwag àm, mbù' àm nsi dù' ze me be là.

¹⁹ A bèn ntshob me ndù: Tshù, m'a' soṅ o ju z'a nsi se' ndùse yantù nsi mi là, nummbe ngelaṅ num bwe ze bo nabte là.

²⁰ Komnjù s'o lo njen nà, ndô mi mbàa b'a fenfen Media bo Persia.

²¹ Fot mbwe nyiaṅnyiaṅ b'a mfen Javan, ndô ndùb z'a be netèt miag mi là b'a mbwe mfen.

²² Ndô z'a be'e, ndô kuà ts'a ko' num ze dù' là, b'a nufen kuà ts'a tum mum ze ngô là. Là bo ke nsi ghù neta mba yi là.

²³ Ndùse yub nufen nsi mi, ndùse nukebwô yub nsi zwiagte dun nà, mba mo' mfen ze se i foṅte, a lèn fùte là nsi lo nsi.

²⁴ Ze ngù' nsi sin à be nesine, ke b'a num ze neta; a nsi sate dù' kà bage, mba ke lo z'a to'te là nsi zin mebwô. A nsi sate ben neta bo nzwit ben nelàne.

²⁵ A tshùa num mb'a ke nzi, nke nèn mbwe ntùm njoṅ mi mfù là, ka'te nke nko' ntù i. A nsi biagte benntùn yàm tse bo ke njôg ntùm fite là, lo nsi num mfen fenfen; là bo nsi be't'é ke be ndù sàm bu fà ywimte.

²⁶ Njoṅ ba mfetnjù boa ba nkebnjù tse bo tshob là b'a nenùne. Lem yen njem nà num yu tu, nummb'a ke ntshob nu mfà à num ngelaṅ ts'a sag là.

²⁷ Tu wul àm Daniel, ndém àm lo tume, me tam ngokèt, ngon tsemo' bon lé'njù. Yen nà be tôge, me lo nsi, mfa' sàm fa' mfen, ke tshob sàm ju num yen njem nà, ntswe ke ju' sàm ju bwe.